စစ်ကိုင်းတိုင်းအတွင်း မီးရှို့ခံရသည့်နေအိမ်များအတွက် S&C အဖွဲ့က တည်ဆောက်ပေးနေသော အိမ်အလုံးရေ ၅၀၀ ပြည့်မြောက်ခဲ့ကြောင်း S&C မီးဘေးစစ်ဘေး ပညာရေး ကူညီ စောင့်ရှောက်ရေးအဖွဲ့ အဖွဲ့ဝင်တစ်ဦးက ပြောသည်။
S&C မီးဘေးစစ်ဘေးပညာရေးကူညီစောင့်ရှောက်ရေးအဖွဲ့သည် မီးရှို့ခံရသည့် ပြည်သူများအတွက် မူလက တနိုင်တပိုင် အိမ်အလုံး ၁၀၀ ရအောင်တည်ဆောက်ပေးမည်ဟု ရည်ရွယ်ခဲ့သော်လည်း ပြည်တွင်းပြည်ပပြည်သူများ၏ အညာဒေသ အပေါ်ထားသော စေတနာကြောင့် အိမ်အလုံးရေ ၅၀၀ အထိ ရောက်ခဲ့ခြင်းဖြစ်ကြောင်း S&C အဖွဲ့ဝင်တစ်ဦးက ပြောသည်။
“ကျွန်တော်တို့က အိမ်အလုံး ၁၀၀၀ အထိတည်ဆောက်ဖို့အစီစဥ်ရှိပါတယ်။ နောက်ထပ် ၅၀၀ ထပ်တည်ဆောက်သွားမှာပါ။ အစီအစဉ် တွေကတော့အများကြီးရှိပါတယ်။”ဟု S&C အဖွဲ့ဝင်တစ်ဦးက ပြောသည်။
မြေပြင်အခက်အခဲများကြားမှ အလေအလွင့်မရှိအောင် လုပ်ဆောင်ပေးနေပြီး ပြည်သူများအနေဖြင့် နောက်ထပ် အိမ်အလုံး၅၀၀ ပြည့်မီအောင် တတပ်တအား ပါ၀င်ကြပါရန် S&C အဖွဲ့က တိုက်တွန်းထားသည်။
S&C အဖွဲ့သည် နေအိမ်ဆောက်လုပ်လှူဒါန်းမှုအပြင် မတ်လအတွင်း၌ အိမ်အလုံး၁၀၀၊ ကျောင်း ၃ ကျောင်း၊ မီးဘေးသင့်ရွာ ၁၃ ရွာ ဆန်ဆီလှူဒါန်းခြင်း၊ ရက်ကန်းစင် ၁၀စင်လှုဒါန်းခြင်း၊ ကွန်ပြူနာသင်တန်းကျောင်းဖွင့်ရန် စသည့်အစီအစဥ်များပြုလုပ်ခဲ့ရာ ၉၀ ရာခိုင်နှုန်းပြီးစီးခဲ့ကြောင်း S&C အဖွဲ့ဝင်တစ်ဦးက ပြောသည်။
စစ်ကောင်စီတပ်က နိုင်ငံတစ်ဝန်းရှိ ပြည်သူ့နေအိမ်များကို မီးရှို့ဖျက်ဆီး ခဲ့ရာ ဖေဖော်ဝါရီ လကုန်အထိ့နေအိမ်ပေါင်း၆၀၄၅၉လုံး မီးလောင်ကျွမ်းဆုံးရှုံးခဲ့ကြောင်း Data For Myanmar ကထုတ်ပြန်သည်။ စစ်ကိုင်းတိုင်းသည် စစ်တပ်ကမီးရှို့ဖျက်ဆီးမှု အများဆုံးဖြစ်ပြီး ဖေဖော်ဝါရီလကုန်အထိနေအိမ်ပေါင်း ၄၇၇၇၈ မီးလောင်ပျက်စီးခဲ့သည်။