စစ်ကိုင်းတိုင်း၊ ဘုတလင်မြို့နယ်ရှိ ကျေးရွာ သုံးရွာအား အကြမ်းဖက် စစ်ကောင်စီတပ်က မီးရှို့ဖျက်ဆီးခဲ့ရာ နေအိမ် ၈၀ထက်မနည်း မီးလောင်ပျက်စီးခဲ့ကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့ (ဧပြီ ၈ ရက်) နံနက် ၆ နာရီခွဲခန့်ကဘုတလင်မြို့နယ်၊ ယုန်လှေးကုန်းရွာတွင် ညအိပ်ခဲ့သော စစ်ကောင်စီတပ်သည် ယုန်လှေးကုန်းရွာသစ်၊တရော်တောရွာနှင့် ကုက္ကိုစုရွာများကို မီးရှို့ဖျက်ဆီးသွားကြောင်း ဒေသခံများက ပြောသည်။
“ယုန်လှေးကုန်းရွာက အိမ်ခြေ ၅၀ နီးပါး၊ တရော်တောရွာက အိမ်ခြေ ၃၀ နီးပါး မီးလောင်ပျက်စီးခဲ့တယ်လို့သိရပါတယ်။ ကုက္ကိုစုကတော့ မသိရသေးဘူး။”ဟု ဒေသခံတစ်ဦးက ပြောသည်။
ကျေးရွာများအား မီးရှို့ပြီးနောက် စစ်ကောင်စီတပ်သည် ဘုတလင်နယ်တောင်ဘက်ပိုင်းသို့ဦးတည်ထွက်ခွာသွားသည်ဟု ဆိုသည်။
Public Service Announcement
“မီးရှို့ခံရတဲ့ရွာတွေအပါအဝင် ဘေးနားကရွာတွေပါလူဦးရေ ၁၅၀၀ကျော်ခန့် တိမ်းရှောင်နေရပါတယ်။”ဟု ဘုတလင်မြို့နယ်သတင်းမှန်ပြန်ကြားရေးအဖွဲ့ဝင်တစ်ဦးက ပြောသည်။
အာဏာသိမ်းကာလအတွင်း ၂၀၂၃ ဖေဖော်ဝါရီ ၂၈ ရက်အထိ စစ်ကောင်စီတပ်၏ မီးရှို့ဖျက်ဆီးမှုကြောင့် အရပ်သားပြည်သူများ၏ နေအိမ်ပေါင်း ၆၀,၄၅၉ လုံး မီးရှို့ဖျက်ဆီးခံခဲ့ရပြီး စစ်ကိုင်းတိုင်းမှာ အများဆုံးဖြစ်ကာ ၄၇,၇၇၈ လုံး ပျက်စီးဆုံးရှုံးခဲ့သည်။
