ပြည်သူ့ကာကွယ်ရေးတပ်ဖွဲ့ဝင်(PDF) ၃ ဦးကို ထိုင်းဘက်ခြမ်းတွင်ဖမ်းဆီးပြီး အတင်းအကြပ်ပို့ဆောင်ခဲ့သည့်ကိစ္စအပေါ် အမြန်ဆုံးစုံစမ်းစစ်ဆေးရန် ထိုင်းအရပ်ဘက်အဖွဲ့အစည်း ၄၆ ဖွဲဲ့က ပူးတွဲထုတ်ပြန်သည်။
ပြည်သူ့ကာကွယ်ရေးတပ်ဖွဲ့မှ နိုင်ငံရေးခိုလှုံခွင့်တောင်းသူများကို မြန်မာစစ်အာဏာရှင်ထံ လွှဲပြောင်းပေးခြင်းအပေါ် ထိုင်းအရပ်ဘက်အဖွဲ့အစည်း ၄၆ ဖွဲ့က ယနေ့ သတင်းထုတ်ပြန်ခြင်းဖြစ်သည်။
ဧပြီ ၄ ရက်တွင် ထိုင်းနိုင်ငံ မဲဆောက်ရှိလူဝင်မှုကြီးကြပ်ရေးဌာနက Lion Battaliion ဗျူဟာစစ်ကြောင်းမှ တော်လှန်ရေးရဲဘော် ၃ ဦးကို အာဏာသိမ်းစစ်ကောင်စီ လက်အောက်ခံ နယ်ခြားစောင့်တပ်ဖွဲ့ BGF ကိုလွှဲပြောင်းပေးခဲ့သည်။ အဆိုပါ လုပ်ရပ်ကို ထိုင်းအရပ်ဘက်အဖွဲ့အစည်းများက ရှုတ်ချပြီး ထိုင်းအာဏာပိုင်များကို အချက်၅ ချက်ကို အကြံပြုတောင်းဆိုထားသည်။
မြန်မာစစ်အာဏာရှင်ကို ဆန့်ကျင်တော်လှန်လျက်ရှိကြသော ပြည်သူ့ကာကွယ်ရေးအင်အားစုများနှင့် တက်ကြွလှုပ်ရှားသူများကို မြန်မာနိုင်ငံသို့ အတင်းအကြပ်ပြန်လည်ပို့ဆောင်ခြင်းကို ရှောင်ကြဥ်ရမည်ဟူသော ပြဋ္ဌာန်းချက်ကို လိုက်နာရန်၊ ညှင်းပန်းနှိပ်စက်မှုများကြောင့် ထွက်ပြေးတိမ်းရှောင်လာရပြီီး မူလနိုင်ငံသို့ ပြန်မသွားနိုင်သူများကို ထိုင်းဝန်ကြီးရုံးက စည်းမျဥ်းစည်းကမ်းများထုတ်ပြန်ကာ စိစစ်အကာအကွယ်ပေးရေး လုပ်ငန်းစဥ်ကို အရှိန်အဟုန်မြှင့် လုပ်ဆောင်ရန် ထိုင်းအရပ်ဘက်အဖွဲ့များက တောင်းဆိိုသည်။
Public Service Announcement
ထို့အပြင် ပြည်သူ့ကာကွယ်ရေးတပ်ဖွဲ့ဝင် ၃ ဦးကို မြန်မာနိုင်ငံသို့ အတင်းအကြပ် ပြန်လည်ပို့ဆောင်ခြင်းကို အများပြည်သူအား ရှင်းလင်းတင်ပြရမည်ဖြစ်ပြီး ထိုင်းအစိုးရအနေဖြင့် ယင်းကိစ္စနှင့်စပ်လျဥ်း၍ ပြည်တွင်းဥပဒေများနှင့် နိုင်ငံတကာဥပဒေများကို မချိုးဖောက်ရန် ကတိပြုရမည်ဟု ဖော်ပြသည်။
ထိုင်းနိုင်ငံသည် အထက်ပါ ပြည်သူ့ကာကွယ်ရေးတပ်ဖွဲ့ဝင်များကို အတင်းအကြပ်ပို့ဆောင်သည့်ကိစ္စနှင့်ပတ်သက်၍ ပြည်တွင်းနှင့် နိုင်ငံတကာဥပဒေများကို ချိုးဖောက်ခြင်း ရှိ၊ မရှိကို အမြန်ဆုံး စုံစမ်းစစ်ဆေးသင့်ပြီး ချိုးဖောက်မှု တစ်စုံတစ်ရာတွေ့ရှိပါက ချိုးဖောက်ကျူးလွန်သူများကို ထိရောက်စွာ အပြစ်ပေးအရေးယူခြင်းဖြင့် တရားမျှတမှုကို ဖော်ဆောင်ရမည်ဖြစ်ကြောင်း ဆက်လက်ဖော်ပြသည်။
ထိုင်းအစိုးရ၏ အထက်ပါလုပ်ရပ်အပေါ် ထိုင်းပါတီအချို့ကလည်း ဝေဖန်ပြစ်တင်ပြီး မေးခွန်းထုတ်ထားကြသည်။
ဖမ်းဆီးခံရသူများမှကိုသီဟ၊ ကိုထက်နေဝင်း နှင့်ကိုစောဖြိုးလေးတို့ဖြစ်ပြီး ၎င်းတို့ထဲမှ တစ်ဦးမှာ BGF ကသေနတ်ဖြင့်ပစ်သောဒဏ်ရာဖြင့်ကျဆုံးပြီး နှစ်ဦးကို စစ်ကောင်စီကမော်လမြိုင်စစ်ကျောရေးစခန်းသို့ဖမ်းဆီးပို့ဆောင်စစ်ဆေးနေကြောင်းသတင်းများကျယ်ပြန့်စွာထွက်ပေါ်နေသည်။
