ကာကွယ်ရေးရဲဘော်တစ်ဦး မိုင်းဆင်ရင်း မတော်တဆဖြစ် ကျဆုံးခဲ့ရ
ကာကွယ်ရေးရဲဘော်တစ်ဦး မိုင်းဆင်ရင်း မတော်တဆဖြစ် ကျဆုံးခဲ့ရစစ်ကိုင်းတိုင်း၊ ခင်ဦးမြို့နယ်တွင် စစ်ကောင်စီတပ်က နှစ်ရက်အတွင်း ကျေးရွာ သုံးရွာရှိ နေအိမ်များ မီးရှို့ဖျက်ဆီးခဲ့ကြောင်း ဒေသခံများက ပြောသည်။
ဧပြီ ၂၅ ရက်က စစ်ကောင်စီတပ်သည် အင်အား ၁၀၀ ကျော်ဖြင့် ခင်ဦးနယ်အနောက်တောင်ခြမ်းရှိ ကျေးရွာများအား စစ်ကြောင်းထိုးခဲ့သည်။
အဆိုပါ စစ်ကြောင်းသည် ညနေပိုင်းတွင် တပင်ကောင်း(တောင်)ရွာရှိ နေအိမ်များအား မီးရှို့ဖျက်ဆီးခဲ့ရာ နေအိမ်၂၅လုံး ပြာကျခဲ့ကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။
ယမန်နေ့ (ဧပြီ၂၆ ရက်)တွင် ကံကြီးကုန်းကျေးရွာရှိ နေအိမ် တစ်လုံးနှင့် ကွမ်းခြံတစ်ခုအား မီးရှို့ဖျက်ဆီးပြီး ညနေ ၅နာရီခန့်တွင် မြို့သစ်ကျေးရွာရှိ နေအိမ်များကိုလည်း ဆက်လက်မီးရှို့ဖျက်ဆီးသွားကြောင်း ဒေသခံများက ပြောသည်။
Public Service Announcement
“ဒီနေ့မနက်လည်း လက်နက်ကြီးတွေနဲ့ ရမ်းသမ်းပစ်ခတ်နေတယ်။ မြို့သစ်ကျေးရွာမှာ ညအိပ်ပြီး ဒီမနက်မီးထပ်ရှို့နေတယ်။”ဟု Khin U Special Force Organization-KSO အဖွဲ့ တာဝန်ရှိသူက ပြောသည်။
အဆိုပါ စစ်ကြောင်းအား တိုက်ခိုက်ရန် ကံကြီးကုန်းကျေးရွာဘက်ထွက်လာချိန် မိုင်းဆင်သော ရဲဘော်တစ်ဦးလည်း မိုင်းမတော်တဆဖြစ်၍ ကျရှုံးခဲ့ရကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။
“ရဲဘော်က မိုင်းဆင်ရင်းကွဲတာ။ ရပ်ရွာကာကွယ်ရေးရဲဘော်တစ်ယောက်ပါ။ အသက် ၂၃ နှစ်လောက်ပဲရှိပါသေးတယ်။”ဟု ဒေသတွင်းရဲဘော်တစ်ဦးက ပြောသည်။
ယင်းစစ်ကြောင်းကြောင့် သာဂရ၊မြို့သစ်၊ကံကြီးကုန်းနှင့် ရွှေယမင်း စသည့်ကျေးရွာများမှ ဒေသခံ ပြည်သူ ၃၀၀၀ ခန့် ထွက်ပြေးတိမ်းရှောင်နေရကြောင်း ဒေသခံများက ပြောသည်။
စစ်ကောင်စီ အာဏာသိမ်းပြီးနောက်ပိုင်းချိန်မှ၂၀၂၃ ဖေဖော်ဝါရီ ၂၈ ရက်အထိကာလအတွင်း စစ်ကောင်စီနှင့် လက်အောက်ခံအဖွဲ့အစည်းများက မီးရှို့ဖျက်ဆီးမှုကြောင့် အရပ်သားပြည်သူ နေအိမ်ပေါင်း ၆၀,၄၅၉ လုံး ပျက်စီးဆုံးရှုံးခဲ့ရပြီး စစ်ကိုင်းတိုင်းမှာ အများဆုံးဖြစ်ကာ နေအိမ်ပေါင်း ၄၇,၇၇၈ လုံး ပျက်စီးဆုံးရှုံးခဲ့သည်။
