အရပ်သားပြည်သူ ၄၀ ဦးသေဆုံး၊ ၁၅၀နီးပါး ဒဏ်ရာရ
ကရင်အမျိုးသားအစည်းအရုံး(KNU) နယ်မြေအတွင်း အာဏာသိမ်းစစ်ကောင်စီက ကျူးလွန်ခဲ့သည့် လူ့အခွင့်အရေးချိုးဖောက်မှု အခြေအနေများကို KNUက ယနေ့ ထုတ်ပြန်ခဲ့ရာ ယခုနှစ် ဇန်နဝါရီမှ မတ်လကုန်အထိ သုံးလအတွင်း လူ့အခွင့်အရေးချိုးဖောက်မှု အကြိမ်ပေါင်း ၆၂၈ကြိမ်ရှိခဲ့သည်ဟု ဖော်ပြသည်။
ထိုသို့ လူ့အခွင့်အရေး ချိုးဖောက်မှုများအနက် ဒေသခံရွာသားများကို ပစ်မှတ်ထားတိုက်ခိုက်သည့် လုပ်ရပ်များကို ဖော်ပြခဲ့ရာ လေယာဉ်ဖြင့် တိုက်ခိုက်မှု ၁၁၆ကြိမ်၊ လက်နက်ကြီးဖြင့် ပစ်ခတ်မှု ၄၃၈ ကြိမ်ရှိခဲ့သည်ဟု ဆိုသည်။
လေကြောင်း တိုက်ခိုက်မှုကြောင့် အရပ်သားပြည်သူ ၁၅ဦးသေဆုံးပြီး ၂၀ ဦးဒဏ်ရာရရှိခဲ့ကြောင်း၊ လက်နက်ကြီးများ ပစ်ခတ်တိုက်ခိုက်ခဲ့၍ ပြည်သူ ၂၅ဦး သေဆုံးပြီး ပြည်သူ ၁၂၂ဦး ဒဏ်ရာရခဲ့ကြောင်း ထုတ်ပြန်သည်။
စစ်ကောင်စီတပ်၏ တိုက်ခိုက်မှုကြောင့် ဆေးရုံ၊ကျောင်း၊ ဘာသာရေး အဆောက်အအုံများနှင့် နေအိမ်များ ထိခိုက်ပျက်စီးခဲ့ရကြောင်း ဖော်ပြသည်။
Public Service Announcement
စစ်ကောင်စီတပ်ကျူးလွန်ခဲ့သည့် လူ့အခွင့်အရေးချိုးဖောက်မှု ဖြစ်စဉ်များထဲတွင် ငွေကြေးတောင်းခံခြင်း၊ နေအိမ်များကို ဖျက်ဆီးခြင်း၊ နေအိမ်မီးရှို့ခြင်း၊ ပစ္စည်းဥစ္စာများ အတင်းအဓမ္မယူဆောင်ခြင်း၊ ဖမ်းဆီးခြင်း၊ သတ်ဖြတ်ခြင်း၊ ရွာသားများ အသုံးပြုသည့် လမ်းများတွင် မိုင်းထောင်ခြင်း၊ ရွာသားများအား သေနတ်ဖြင့် အကြောင်းမဲ့ပစ်ခတ်ခြင်း၊ လူသားဒိုင်းအဖြစ် ဖမ်းဆီးခေါ်ဆောင်ခြင်း၊ အတင်းအဓမ္မ ခိုင်းစေခြင်း၊ အတင်းအဓမ္မရွှေကပြောင်းစေခြင်း၊ ပြည်သူ့စိုက်ပျိုးခြံများအား ဖျက်ဆီးခြင်း တို့ ပါဝင်ကြောင်း KNUက ထုတ်ပြန်သည်။
