စစ်ကောင်စီက နိုင်ငံရေးအကျဉ်းသားတွေကို လွှတ်ပေးလာတဲ့အပေါ် အားတက်မိပေမယ့် သမ္မတ ဦးဝင်းမြင့်နဲ့ ဒေါ်အောင်ဆန်းစုကြည်အပါအဝင် မတရားဖမ်းထားသူတွေအားလုံးကို ချက်ချင်းလွှတ်ဖို့ ကုလသမဂ္ဂအတွင်းရေးမှူးချုပ်က တောင်းဆိုလိုက်ပါတယ်။
ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားတွေအားလုံးလွှတ်ဖို့ ထပ်လောင်း တောင်းဆိုတာကို မနေ့က ပြုလုပ်တဲ့သတင်းစာရှင်းလင်းပွဲမှာ ကုလအတွင်းရေးမှူးချုပ်ကိုယ်စား သူရဲ့ ပြောခွင့်ရ ပုဂ္ဂိုလ်က ပြောလိုက်တာပါ။
နိုင်ငံရေးအကျဉ်းသားတွေကို လွှတ်ပေးတာဟာ ကုလအထူးကိုယ်စားလှယ်နိုလင်းဟေဇာ တရုတ်ကို သွားပြီး တရုတ်နိုင်ငံခြားရေးဝန်ကြီးနဲ့တွေ့ဆုံမှုရဲ့အကျိုးဆက်လားဆိုတဲ့ မေးခွန်းကို တော့ ကုလအတွင်းရေးမှူးချုပ်ရဲ့ ပြောခွင့်ရ ပုဂ္ဂိုလ်က မသိရှိကြောင်း ဖြေပါတယ်။
မနေ့က ကျရောက်တဲ့ ကဆုန်လပြည့်နေ့မှာ စစ်ကောင်စီဟာ ပုဒ်မ ၅၀၅ (က) နဲ့ ထောင်ချထားတဲ့ နိုင်ငံရေးအကျဉ်းသား ၂ ထောင်ကျော်ကို လွှတ်ပေးလိုက်တာပါ။
Public Service Announcement
ဒီလိုလွှတ်ပေးတာဟာ တရုတ်နိုင်ငံခြားရေးဝန်ကြီးနေပြည်တော်ကိုလာရောက်ခဲ့တဲ့ ခရီးစဉ်အပြီးနဲ့လည်း တိုက်ဆိုင်တာတွေ့ရပါတယ်။
စစ်ကောင်စီက နိုင်ကျဉ်း ၂ ထောင်ကျော်ကို လွှတ်ပေးတယ်ဆိုပေမယ့် မနေ့ညနေ ၅ နာရီအထိ ၁၂၇၇ ဦးကို ပဲအရေအတွက်အတည်ပြုနိုင်သေးတယ်လို့ နိုင်ငံရေးအကျဉ်းသားကူညီစောင့်ရှောက်ရေးအသင်း (AAPP) ကဆိုထားပါတယ်။
ဓာတ်ပုံ − UN
