▪︎လက်နက်ခဲယမ်းအချို့ သိမ်းဆည်းရရှိ
ပျဥ်းမနားမြို့နယ်ရှိ စစ်ကောင်စီတပ်စခန်းတစ်ခုဖြစ်သည့် မြွေဟောက်မြောင် ဘုရားကုန်းစခန်းကို PDF ပူးပေါင်းတပ်များက စီးနင်းတိုက်ခိုက်ခဲ့ကြောင်း ပြည်သူ့ကာကွယ်ရေးတပ်မတော်(နေပြည်တော်)မှ တာဝန်ရှိသူတစ်ဦးက People’s Spring သတင်းဌာနသို့ ပြောသည်။
ယမန်နေ့(ဇွန် ၁၂)နံနက် ၇ နာရီခန့်က ပျဥ်းမနားမြို့ နယ် တောင်တန်းဒေသရှိ ကိုးတစ်ကျေးရွာအုပ်စု၊ မြွေဟောက်မြှောင်ဘုရားကုန်းမှ စစ်ကောင်စီတပ်စခန်းကို နေပြည်တော် PDF တပ်ရင်း ၁၀၀၄၊ သံ တောင်မြောက်ပိုင်း အထူးဒေသ တပ်ခွဲ ၃၊ KA စသည့် ပူးပေါင်းတပ်များက ဝင်ရောက်စီးနင်းခဲ့ခြင်း ဖြစ်သည်။
အဆိုပါစစ်တပ်စခန်းစီးနင်းမှုတွင် စစ်ကောင်စီတပ်ဘက်မှ ထိခိုက်သေဆုံးမှုရှိသော်လည်း စာရင်းအတိအကျမသိရသေးဘဲ ရန်သူ့ထံမှ ငါးကြင်းမြီး စက်လက် ၁ လက်၊ MA 3- ၁ လက်နှင့် ခဲယမ်းများသိမ်းဆည်းရရှိခဲ့ကြောင်း နေပြည်တော် PDF မှ တာဝန်ရှိသူတစ်ဦးက People’s Spring သို့ ပြော သည်။
“စခန်းသိမ်းနိုင်လိုက်တဲ့ အခြေနေပါ။ လက်နက်တွေပါရလိုက်တယ်”ဟု ၎င်း တာဝန်ရှိသူက ပြောသည်။
Public Service Announcement
စီးနင်းတိုက်ခိုက်ခဲ့သော မြွေဟောက်မြောင် ဘုရားကုန်းတပ်စခန်းတွင် ပုံမှန်အားဖြင့် စစ်ကောင်စီတပ်မှ အင်အား ၆၀ ဝန်းကျင် အထိုင်ချတပ်စွဲထားလေ့ရှိရာ ယမန်နေ့တိုက်ခိုက်မှုတွင် နံနက် ၇ နာရီမှ ၁၀ နာရီအထိ ၃ နာရီကြာ အပြင်းအထန်တိုက်ခိုက်ခဲ့ရပြီး တော်လှန်ရေးရဲဘော်တစ်ဦး မစိုးရိမ်ရဒဏ်ရာရရှိခဲ့ကြောင်း နေပြည်တော် PDF က ပြောသည်။
အထက်ပါ စစ်ကောင်စီတပ်စခန်းတိုက်ခိုက်ခံရပြီးနောက် ယနေ့(ဇွန် ၁၃)နံနက်ပိုင်းမှစတင်ပြီး ပျဥ်းမနားနယ် တောင်တန်းဒေသတွင် စစ်ကောင်စီတပ်များ တောနင်းရှာဖွေမှုများကို အင်အားအလုံးအရင်းဖြင့်လုပ်ဆောင်နေကြောင်း စုံစမ်းသိရသည်။
