ထိုင်းရွေးကောက်ပွဲမှာ မဲအများဆုံးနဲ့ အနိုင်ရခဲ့တဲ့ Move Forward ပါတီ (MFP)ဟာ မဟာမိတ် ဖျူထိုင်းပါတီ (PTP)ကို ညွန့်ပေါင်း အစိုးရ ဦးဆောင် ဖွဲ့စည်းဖို့ သဘောတူလိုက်ပြီ ဖြစ်ပါတယ်။
လွှတ်တော် မဲခွဲမှုတွေအတွင်းမှာ MFPရဲ့ ခေါင်းဆောင်ဖြစ်တဲ့ ဖီထာ လင်မ်ဂျာရွတ်ရတ် ဝန်ကြီးချုပ် ဖြစ်ခွင့်ကို ရွေးကောက်ခံ မဟုတ်တဲ့ အထက်လွှတ်တော် အမတ်တွေက ပြင်းပြင်းထန်ထန် ကန့်ကွက် ဆန့်ကျင်ခဲ့တဲ့အပြင် အခြေခံ ဥပဒေ ခုံရုံးကလည်း ဖီထာဟာ ရွေးကောက်ခံ အမတ်တစ်ဦးအတွက် သတ်မှတ်ထားတဲ့ စည်းမျဉ်းတွေကို ချိုးဖောက်ခဲ့ကြောင်း စွပ်စွဲပြီး အမတ်အဖြစ်ကပါ ဆိုင်းငံ့စေခဲ့ပါတယ်။
ဖီထာက ဝန်ကြီးချုပ် နေရာအတွက် လွှတ်တော်ထဲမှာ ထပ်ပြီး အဆိုတင်ဖို့ အဆင်မပြေနိုင်တော့တာ သေချာသွားတဲ့နောက် MFPဟာ ရွေးကောက်ပွဲမှာ ဒုတိယ မဲအများဆုံး ရခဲ့တဲ့ PTPက အဆိုတင်မယ့် ဝန်ကြီးချုပ်လောင်းကို ပြောင်းလဲ ထောက်ခံသွားတော့မယ်လို့ ဇူလိုင် ၂၁ ရက်မှာ အတည်ပြုခဲ့ပါတယ်။
MFPရဲ့ အတွင်းရေးမှူး ချိုင်သာဝပ် တူလာသွန်က MFPဟာ PTPက အဆိုတင်သွင်းမယ့် ဘယ်ဝန်ကြီးချုပ်လောင်းကိုမဆို လွှတ်တော်မှာ ထောက်ခံမဲ ပေးသွားမယ်လို့ သတင်းထောက်တွေကို ပြောကြားသွားပါတယ်။ နောက်ထပ် ဝန်ကြီးချုပ်နေရာ အဆိုတင် မဲခွဲမှုကို ဇူလိုင် ၂၇ ရက် လွှတ်တော် အစည်းအဝေးမှာ ပြုလုပ်မှာပါ။
Public Service Announcement
PTPနဲ့ MFPတို့ဟာ ၈ ပါတီ ပါဝင်တဲ့ နိုင်ငံရေး မဟာမိတ် အင်အားစုကို စည်းရုံးထားပြီး ညွန့်ပေါင်း အစိုးရ ဖွဲ့စည်းဖို့ ရည်ရွယ်ထားပါတယ်။ MFPနဲ့ ဖီထာတို့ဟာ ရွေးကောက်ပွဲကြို မဲဆွယ်မှုတွေမှာ သူတို့ဦးဆောင်တဲ့ အစိုးရ အာဏာရလာရင် ထိုင်းဘုရင်စနစ်ကို အလွန်အကျွံ အကာအကွယ် ပေးထားတဲ့ အငြင်းပွားစရာ ဥပဒေတစ်ခုကို ပြင်ဆင်မယ်လို့ ကတိပြုခဲ့ပြီး အဲဒီ အချက်ကြောင့်ပဲ ကွန်ဆာဗေးတစ် အထက်လွှတ်တော် အမတ် အများစုရဲ့ အတိုက်အခံ ပြုမှုကို ခံခဲ့ရတာ ဖြစ်ပါတယ်။
PTPက ဘယ်သူ့ကို ဝန်ကြီးချုပ်လောင်းအဖြစ် အဆိုတင်မလဲ ဆိုတာကို မကြေညာသေးပေမယ့် ရေပန်းအစားဆုံးကတော့ ပါတီရဲ့ ဝါရင့် ခေါင်းဆောင် တစ်ဦးဖြစ်တဲ့ ဆရက်သာ သာဗင်ဆင် ဖြစ်ပါတယ်။ အသက် ၆၀ အရွယ် ဆရက်သာဟာ ထိုင်းဝန်ကြီးချုပ်ဟောင်း သက်ဆင် ရှီနာဝပ်ထရာ၊ ယင်လပ် ရှီနာဝပ်ထရာတို့ရဲ့ လူယုံတစ်ဦးအဖြစ် သတ်မှတ် ခံရပြီး သဘောထား ပျော့ပျောင်းသူ အလယ်အလတ် လမ်းစဉ်ဝါဒီ တစ်ဦးလို့လည်း လူသိများပါတယ်။ သူက PTP ဦးဆောင်တဲ့ အစိုးရအဖွဲ့ဟာ ဘုရင်စနစ်ကို ကာကွယ်ထားတဲ့ ဥပဒေတွေ ပြင်ဆင်ဖို့ လုပ်ဆောင်မှာ မဟုတ်ကြောင်း အတိအလင်း ပြောဆိုထားတာကြောင့် အထက်လွှတ်တော်ရဲ့ ထောက်ခံမဲတွေ ပိုမိုရလာမယ့် အလားအလာ ရှိနေပါတယ်။
မေလလယ် ရွေးကောက်ပွဲမှာ PTPဟာ ရေပန်းအစားဆုံး ဖြစ်ခဲ့ပေမယ့်လည်း လက်တွေ့မှာတော့ ကြီးမားတဲ့ အပြောင်းအလဲတွေကို အကောင်အထည်ဖော်ဖို့ ကတိပြုခဲ့တဲ့ PTPဟာ လူထုထောက်ခံမှုကို အံ့ဩစရာ ကောင်းလောက်အောင် ရရှိပြီး ရွေးကောက်ခံ အောက်လွှတ်တော် အမတ်အရေအတွက် အများဆုံး ပါတီအဖြစ် အောင်ပွဲခံခဲ့ပါတယ်။ ဒါပေမဲ့လည်း ထိုင်းမှာ စစ်အစိုးရ အုပ်စိုးစဉ် ကာလက တစ်ဖက်သတ် ရေးဆွဲထားခဲ့တဲ့ အခြေခံ ဥပဒေနဲ့ ရွေးကောက်ခံ မဟုတ်တဲ့ အထက်လွှတ်တော် အမတ်တွေရဲ့ နှောင့်ယှက် တားဆီးမှုကြောင့် ပြည်သူအများစုက ယုံကြည် အပ်နှင်းတဲ့ ဝန်ကြီးချုပ်လောင်းက ဘေးဖယ်ပေးလိုက်ရတာ ဖြစ်ပါတယ်။
