ထီးချိုင့်မြို့ဆိပ်ကမ်းမှ ထွက်လာသော စစ်ကောင်စီရေယာဉ်သင်္ဘောအုပ်စုသည် ကသာမြို့နယ်အတွင်းရှိ မြစ်ကမ်းဘေးကျေးရွာများအား လက်နက်ကြီးဖြင့် အကြောင်းမဲ့ပစ်ခတ်ရာ (၁၀)နှစ်အရွယ်ကလေးငယ်တစ်ဦး သေဆုံးသွားကြောင်း အဆိုပါမြို့နယ်ပြည်သူ့အုပ်ချုပ်ရေးအဖွဲ့က ပြောသည်။
စစ်ကောင်စီရေယာဉ်သင်္ဘောအုပ်စုသည် ထီးချိုင့်မြို့ဆိပ်ကမ်းမှ ယနေ့(ဩဂုတ် ၃ရက်) နံနက်ပိုင်းတွင် ထွက်ခွာလာပြီး နံနက် ၁၁နာရီခွဲခန့်တွင် ကသာမြို့နယ်အတွင်းသို့ လက်နက်ကြီးများဖြင့် ပစ်ခတ်ဝင်ရောက်လာခဲ့သည်ဟု သိရသည်။
ဧရာဝတီမြစ်ကမ်းဘေးကျေးရွာဖြစ်သော ဦးစောကျွန်းရွာမှ ဦးဖိုးစိုင်၊ဒေါ်ဆယ်တို့၏ (၁၀)နှစ်ခန့်အရွယ် သမီးငယ်မဝါဆိုမိုးဦးသည် စစ်ကောင်စီပစ်သော လက်နက်ကြီးစ ထိမှန်ပြီး သေဆုံးခဲ့သည်ဟု ကသာမြို့နယ်ပြည်သူ့အုပ်ချုပ်ရေးအဖွဲ့တာဝန်ရှိသူက ပြောသည်။
Public Service Announcement
“စည်တီးသလိုကို ပစ်တာပါ” ဟု ဒေသခံတစ်ဦးက ပြောသည်။
စစ်ကောင်စီရေယာဉ်သင်္ဘောအုပ်စုသည် ယနေ့ညတွင် ကသာမြို့နယ်ရှိ သဖန်းဆိပ်ကျေးရွာ၌ ညအိပ်တပ်စွဲနေသည်။
ကသာမှထွက်ခွာပါက ကချင်ပြည်နယ် ရွှေကူမြို့သို့ ရောက်ရှိလာမည်ဖြစ်၍ မြစ်ကမ်းဘေးကျေးရွာနေပြည်သူများ သတိပြုနေထိုင်ကြရန် ပြည်သူ့ကာကွယ်ရေးတပ်ဖွဲ့များက သတိပေးထားသည်။
အဆိုပါ စစ်ကောင်စီရေယာဉ်အုပ်စုတွင် သင်္ဘာကိုးစီးပါဝင်ပြီး မန္တလေးမြို့၊ ဂေါဝိန်ဆိပ်ကမ်းမှ ဇူလိုင် ၂၆ရက်တွင် စတင်ထွက်ခွာလာခြင်းဖြစ်သည်။ ကချင်ပြည်နယ်သို့ သွားမည်ဖြစ်ပြီး ရိက္ခာ၊ လက်နက်ခဲယမ်းနှင့် ဆက်သွယ်ရေးပစ္စည်များ သယ်ဆောင်လာကြောင်းတော်လှန်ရေးအင်အားစုများက သတင်းရရှိထားသည်။
