အာဇာနည်နေ့ လှုပ်ရှားမှုပြုလုပ်တယ်ဆိုပြီး သာယာဝတီထောင်မှာ ဒီနေ့အထိတိုက်ပိတ်ခံရသူနိုင်ငံရေးအကျဉ်းသားဦးရေဟာ ၃၁ ဦးထိရှိလာပြီလို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်ဆီကသိရပါတယ်။
ကနဦးက အမျိုးသမီးနိုင်ငံရေးအကျဉ်းသူ ၁၅ ဦး ကို အာဇာနည်နေ့မှာ အနက်ရောင် ဖဲကြိုး လှုပ်ရှားမှု ထောင်တွင်းမှာပြုလုပ်လို့ တိုက်ပိတ်ထားတဲ့သတင်းသာထွက်ခဲ့တာပါ။
အဲဒီနောက် အမျိုးသားအဆောင်မှာလည်း ဇူလိုင် ၁၉ အာဇာနည်နေ့မှာ အခမ်းအနားလုပ်တယ်ဆိုပြီး ၁၆ ဦး တိုက်ပိတ်ခံထားရတယ်ဆိုတာကို ထပ်သိရတာဖြစ်ပါတယ်။
” မနေ့ကမှ ယောင်္ကျားလေးတွေပါ တိုက်ပိတ်ခံရတယ်ဆိုတာသိရတာပါ” လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် ရဲ့တာဝန်ရှိသူ ကိုသိုက်ထွန်းဦးက ပြောပါတယ်။
Public Service Announcement
ထောင်တွင်း အာဇာနည်နေ့အခမ်းအနားကို NLD သန်လျင်မြို့နယ် လူငယ်လုပ်ငန်းအဖွဲ့ ကိုသန်းတိုးအောင်က ဦးဆောင်တယ်လို့ ထောင်အာဏာပိုင်တွေစွပ်စွဲပါတယ်။
ကိုသန်းတိုးအောင်နဲ့ နိုင်ငံရေးအကျဉ်းသား ၁၅ ဦးကို သာယာဝတီထောင်တွင်း မင်းဂံဓမ္မာရုံမှာ ထောင်ပုံစံပေးပြီး ရိုက်နှက်ကာ တိုက်ပိတ်တာလို့ သိရပါတယ်။
ကိုသန်းတိုးအောင် အပါအဝင် အမျိုးသား ၄ ဦးဟာ မေ့မျောတဲ့အထိ ရိုက်နှက်ခံပြီး ထောင်တွင်းဆေးရုံတင်ထားရတယ်လို့ သာယာဝတီထောင်နဲ့ နီးစပ်သူက ပြောပြပါတယ်။
ရိုက်နှက်ခံရသူတွေထဲမှာ ကိုသန်းတိုးအောင်ရဲ့ အခြေအနေစိုးရိမ်ရတယ်လို့လည်းသိရပါတယ်။
သာယာဝတီထောင်ဟာ ခေတ်အဆက်ဆက် မှာ နိုင်ငံရေးအကျဉ်းသားတွေကို ဖိနှိပ်တဲ့ ပုံစံထောင်အဖြစ် နာမည်ဆိုးနဲ့ကျော်ကြားပါတယ်။
စစ်အာဏာသိမ်းပြီးနောက် ဖမ်းခံရတဲ့ နိုင်ငံရေးအကျဉ်းသားတွေ သာယာဝတီထောင်ကို ပြောင်းရွှေ့ခံရရင် ထောင်အဝင်မှာတင် မော်တာကြိုးနဲ့ အပြင်းအထန် ရိုက်နှက်တာမျိုး ပြုလုပ်တယ်လို့ လွတ်မြောက်လာတဲ့ နိုင်ငံရေးအကျဉ်းသားတွေထံက သိရပါတယ်။
