စစ်ကိုင်းတိုင်း ယင်းမာပင်မြို့နယ်တွင် အမျိုးသမီးနှစ်ဦးအပါအဝင် ရှစ်ဦးကို သတ်ဖြတ်ခဲ့သည့် စစ်ကောင်စီစစ်ကြောင်းက ယနေ့(ဩဂုတ် ၁၇ရက်) နံနက်တွင် နောက်ထပ်စစ်ကြောင်းတစ်ကြောင်းနှင့် ထပ်ပေါင်းကာ ကနီမြို့နယ်သို့ ဝင်ရောက်လာ၍ ကျေးရွာငါးရွာမှ ဒေသခံများ ဘေးလွတ်ရာ ထွက်ပြေးနေကြရသည်။
စစ်ကြောင်းနှစ်ခု အင်အား ၃၀၀ထက်မနည်းသည့် စစ်ကောင်စီတပ်ဖွဲ့သည် ယနေ့နံနက် ၈နာရီခန့်တွင် ကနီမြို့နယ် ကျောက်မှော်ရွာသို့ လက်နက်ကြီးများပစ်ခတ်ပြီး စတင်ဝင်ရောက်လာခြင်းဟုပြည်သူ့ကာကွယ်ရေးရဲဘော်တစ်ဦးက ပြောသည်။
“မော်တော်တွေနဲ့ ဆန်လာတာရော၊ အောင်ဇေယျကုန်းပေါ်ကနေ ဆင်းလာတာရော အားလုံးပေါင်း ၃၀၀ ကျော်တယ်။ အခု ရွာတွေကို ဝင်နေပြီ”ဟု ၎င်းက ပြောသည်။
စစ်ကောင်စီ၏လက်နက်ကြီးပစ်ခတ်သံများသည် ကနီနှင့် ယင်းမာပင်နယ်စပ်ကျေးရွာများအားလုံးမှ ကြားနေရသည်ဟု ဒေသခံများက ပြောသည်။
” စာသင်တာ မဖြောင့်လို့ ကျောင်းဆင်းပေးလိုက်ရတယ်။ ကျွန်မတို့လည်း အသင့်ပြင်ထားရပါတယ်” ဟု ကနီမြို့နယ်မှ CDM ကျောင်းဆရာမတစ်ဦးကပြောသည်။
Public Service Announcement
စစ်ကောင်စီစစ်ကြောင်းကြောင့် ကျောက်ကုန်း၊အင်းပက်၊ နွားခြံကုန်း၊ ကျောက်မှော်၊ ကြက်လျှာရွာတို့မှ ဒေသခံများ ဘေးလွတ်ရာသို့ထွက်ပြေးတိမ်းရှောင်နေရကြောင်းသတင်းရရှိသည်။
အဆိုပါ စစ်ကြောင်းအား ဒေသကာကွယ်ရေးတပ်ဖွဲ့များကလည်း ကြားဖြတ်တိုက်ခိုက်နေကြောင်း သတင်းရရှိသည်။
ကနီမြို့နယ်သို့ ယခုဝင်ရောက်လာသောစစ်ကြောင်းသည် ပုလဲနှင့် ယင်းမာပင်နယ်စပ်မှ ဖမ်းဆီးလာသည့် ဒေသခံအရပ်သား ဆယ်ဦးအနက် အမျိုးသမီးနှစ်ဦးအပါအဝင် ရှစ်ဦးကို သတ်ဖြတ်ခဲ့သည့် စစ်ကြောင်းဟု ဒေသခံများကပြောသည်။ အဆိုပါ စစ်ကြောင်းက သတ်ဖြတ်ထားသည့် အလောင်းခြောက်လောင်းကို ယင်းမာပင်မြို့နယ်မှ မြောက်ူယမားချောင်းတံတားပေါ်တွင် ဩဂုတ် ၁၆ရက် နံနက်တက ထားခဲ့သည်။
