ချင်းပြည်နယ် တီးတိန်မြို့တွင် စစ်ကောင်စီလက်အောက်ခံ ရဲတပ်ဖွဲ့ဝင် လေးဦးကို အောက်တိုဘာ ၂ရက်က ဖမ်းဆီးမိခဲ့ကြောင်း PDF-Zolandက သတင်းထုတ်ပြန်သည်။
အဆိုပါ ရဲတပ်ဖွဲ့ဝင်လေးဦးသည် တီးတိန် – ရိဒ်လမ်းမပေါ်ရှိ ခရီးသွားယာဥ်များနှင့် ကုန်သည်ယာဥ်များထံမှ အဆမတန်ငွေကြေးတောင်းခံနေမှုကြောင့် ဖမ်းဆီးရခြင်းဖြစ်သည်ဟု PDF-Zoland တာဝန်ရှိသူက ပြောသည်။
၎င်းတို့ကို တီးတိန် – လမ်ဇန်းရွာအနီးတွင် Zoland-PDFက အလစ်အငိုက် ဝင်ရောက်ဖမ်းဆီးခဲ့ခြင်းဖြစ်သည်ဟု အဆိုပါတာဝန်ရှိသူက ပြောသည်။ ဝင်ရောက်ဖမ်းဆီးရာတွင် အဆိုပါရဲတပ်ဖွဲ့များ အရပ်ဝတ်ဖြင့်ထွက်လာစဉ် ဖမ်းဆီးခဲ့ခြင်းဖြစ်သည်ဟုလည်း Zoland-PDFက ဆိုသည်။
ဖမ်းဆီးခံရသူများမှာ ရဲဒုတပ်ကြပ် ကျော်သူရစိုး၊ခုပ်ခပ်တုန်း၊ စည်သူမိုးနှင့် ချမ်းငြိမ်းကျော်တို့ဖြစ်ပြီး ၎င်းတို့ကို ကောင်းမွန်စွာဖြင့်လုံခြုံသည့်နေရာတွင် ထိန်းသိမ်းထားသည်ဟု PDFက အသိပေးသည်။
Public Service Announcement
“ဖမ်းခံရတဲ့ သူတွေက တီးတိန်မြို့နားမှာ ကုန်တင်ကားသမားတွေစီက သိန်းချီငွေတောင်းလေ့ရှိပြီး ခရီးသွားပြည်သူတွေကိုလည်း နည်းမျိုးစုံငွေကြေးကောက်ယူတာရှိတယ်”ဟု PDF-Zoland တာဝန်ရှိသူက ပြောသည်။
ဖမ်းဆီးထားသည့် ရဲလေးဦးတွင် မူးယစ်ဆေးဝါးသုံးစွဲထားသူရှိ၍ အရေးယူနိုင်ရေး ဆက်လက်ဆောင်ရွက်မည်ဟုလည်း PDF-Zolandက ဆိုသည်။
