ကချင်ပြည်နယ် မိုးမောက်မြို့နယ် လွယ်ဂျယ်မြို့ဘက်သို့လာသည့် စစ်ကောင်စီယာဉ်များကို ကချင်လွတ်လပ်ရေးတပ်မတော်(KIA) တပ်က တိုက်ခိုက်ခဲ့၍ တိုက်ပွဲဖြစ်ပွားခဲ့ကြောင်း KIA သတင်းပြန်ကြားရေးဌာနက ဖော်ပြသည်။
အောက်တိုဘာ ၁၁ရက် နေ့လယ်က ဒေါ့ဖုန်းယန်အောက်ဘက် နောင်ကွန်ကျေးရွာ၌ တပ်စွဲထားသည့် စစ်ကောင်စီ၏ အမတ(၃၇၀) တပ်များက စစ်ရေးလှုပ်ရှားလာ၍ တိုက်ပွဲဖြစ်ပွားခဲ့ခြင်းဖြစ်သည်ဟု ဆိုသည်။
စစ်ကောင်စီတပ်က အင်အား ၃၀ကျော်ဖြင့် လက်နက်ခဲယမ်းများအပါ အဝင် ကား ၅စီးဖြင့် လွယ်ဂျယ်အလာတွင် KIA လှုပ်ရှားတပ်ရင်း(၄၇) တပ်ဖွဲ့များက တိုက်ခိုက်ခဲ့ကြောင်း သတင်းဖော်ပြခဲ့ပြီး နှစ်ဖက်ထိခိုက်ကျဆုံး ရှိ၊မရှိ အခြေအနေကို ဖော်ပြမထားပေ။
မိုးမောက်မြို့နယ် အောင်ဂျာကျေးရွာ အပါအဝင် မြစ်ကြီးနား – ဗန်းမော်လမ်းပိုင်း၌ တိုက်ပွဲများနေ့စဉ်ရှိနေပြီး စစ်ကောင်စီတပ်က လေကြောင်း တိုက်ခိုက်မှုများ ပြုလုပ်လျက်ရှိသည်ဟုလည်း KIA သတင်းပြန်ကြားရေးက အသိပေးထားသည်။
