စေ့စပ်ဆွေးနွေးရေး လမ်းကြောင်းပေါ် ရောက်ရှိဖို့ အားထုတ်မှုတွေနဲ့ ပတ်သက်လို့ လတ်တလော မြန်မာနိုင်ငံမှာ စစ်ခင်းနေတဲ့ အင်အားစုတွေဆီက အားတက်စရာ အရိပ်အယောင်တွေ ပြသခဲ့တယ်လို့ အင်ဒိုနီးရှား အစိုးရက ဆိုတယ်လို့ ရိုက်တာသတင်းဌာနကဖော်ပြပါတယ်။
အင်ဒိုနီးရှားဟာ အာဆီယံရဲ့ အလှည့်ကျ ဥက္ကဋ္ဌ အနေနဲ့ မြန်မာ့ နိုင်ငံရေး အကျပ်အတည်းကို ဖြေရှင်းနိုင်ဖို့ ကြိုးစားနေခဲ့တာ ဖြစ်တယ်လို့ဆိုပါတယ်။ လက်ရှိ အခြေအနေအရ မြန်မာ့နိုင်ငံရေး ကဏ္ဍမှာ ဆက်နွှယ်ပါဝင်တဲ့ အရေးပါတဲ့ အင်အားစုတွေက အင်ဒိုနီးရှား ဦးစီးကျင်းပပေးမယ့် စေ့စပ် ဆွေးနွေးမှုမျိုးကို လက်ခံလိုကြောင်း အရိပ်အယောင် ပြသနေတယ်လို့ နိုဝင်ဘာ ၂၄ ရက်မှာ အင်ဒိုနီးရှား နိုင်ငံခြားရေး ဝန်ကြီးဌာနက ထုတ်ပြန်ပါတယ်။
နိုဝင်ဘာ ၂၀ ကနေ ၂၂ ရက်ထိ အတောအတွင်း ဂျကာတာမှာ ကျင်းပတဲ့ ဆွေးနွေးပွဲ တခုကို မြန်မာနိုင်ငံရဲ့ ဒီမိုကရေစီ လိုလားတဲ့ အင်အားစုတွေ၊ တိုင်းရင်းသား လက်နက်ကိုင် တပ်ဖွဲ့တွေနဲ့ အမျိုးသား ညီညွတ်ရေး အစိုးရ (NUG)ရဲ့ ကိုယ်စားလှယ်တွေ သီခြားစီ ပါဝင် တွေ့ဆုံခဲ့တယ်လို့ ဆိုပါတယ်။ အာဏာသိမ်း စစ်တပ်ကတော့ အဲဒီ ဆွေးနွေးပွဲမှာ မပါဝင်ဘဲ လေ့လာသူ သဘောမျိုးနဲ့သာ ရှိခဲ့တယ်လို့လည်း ထုတ်ပြန်ချက်မှာ ပါရှိခဲ့ပါတယ်။
ဒီတွေ့ဆုံးမှုမှာ အာဆီယံကိုယ်စားလှယ်နဲ့ တော်လှန်ရေးအဖွဲ့တွေက သီးခြားတွေဆုံခဲ့တာသာဖြစ်တယ်လို့လည်းစုံစမ်းသိရပါတယ် ။
အင်ဒိုနီးရှားနိုင်ငံခြားရေးဝန်ကြီးဌာန ထုတ်ပြန်ချက်နဲ့ ပတ်သပ်ပြီး တော့ NUG အနေနဲ့ စစ်ကောင်စီရဲ့ ဘယ်ကြားခံကိုယ်စားလှယ် နဲ့မှတွေ့ဆုံခဲ့တာမရှိဘူးလို့ NUG ဝန်ကြီး
ချုပ်ရုံးပြောရေးဆိုခွင့် ရှိသူ ဦးနေဘုန်းလတ်က ပြောပါတယ်။
အင်ဒိုနီးရှားဟာ အာဆီယံ ဥက္ကဋ္ဌ ဖြစ်လာချိန် ကတည်းက မြန်မာ့ နိုင်ငံရေး အကျပ်အတည်းကို အလုံးစုံ ပါဝင် ညှိနှိုင်း ဆွေးနွေးမှုတွေနဲ့ အဖြေရှာဖို့ အစဉ်တစိုက် တိုက်တွန်းခဲ့ပေမယ့် မအောင်မြင်ခဲ့ပါဘူး။
လတ်တလောမှာတော့ မြန်မာနိုင်ငံ အနှံ့မှာ စစ်အာဏာရှင် ဆန့်ကျင်ရေး တိုက်ပွဲတွေက ပိုမို ပြင်းထန်လာသလို အာဏာသိမ်းမှုအလွန် ကာလတွေမှာ စစ်ပွဲတွေကြောင့် နေရပ်စွန့်ခွာရသူ ၂ သန်းကျော် ရှိလာပြီလို့ ကုလသမဂ္ဂက ကြေညာထားပါတယ်။
အင်ဒိုနီးရှားက လမ်းကြောင်းဖန်တီးပေးချင်တဲ့ တွေ့ဆုံ ဆွေးနွေးမှု ဆိုတာက သက်ဆိုင်သူတွေ အစုံအလင် ပါဝင်တဲ့၊ အကြမ်းဖက်မှုတွေကို လျော့ကျစေမယ့်၊ ဒုက္ခသည်တွေအတွက် လူသားချင်း စာနာမှု အကူအညီတွေ ရရှိစေမယ့်၊ မြန်မာ့အရေး ပြေလည်အောင် အာဆီယံရဲ့ ဘုံသဘောတူညီချက် ၅ ရပ်နဲ့အညီ အကောင်အထည် ဖော်နိုင်မယ့် ရည်ရွယ်ချက်မျိုးအတွက် ဖြစ်တယ်လို့လည်း ထုတ်ပြန်ချက်ကဆိုပါတယ်။
အင်ဒိုနီးရှားဟာ မြန်မာ့နိုင်ငံရေး ပြဿနာနဲ့ ပတ်သက်လို့ လူမြင်ကွင်း နောက်ကွယ်မှာ အပတ်တကုတ် ဆွေးနွေးညှိနှိုင်းမှုတွေ လုပ်ဆောင်နေပေမယ့် အခြေအနေ ပေါင်းစုံကြောင့် တိုးတက်မှုတွေ နှေးကွေးတာမျိုး ကြုံနေရကြောင်းလည်း သံတမန်ရေး အသိုက်အဝန်းနဲ့ နီးစပ်သူတွေက မှတ်ချက်ပေးထားပါတယ်။
အင်ဒိုနီးရှားဟာ အာဆီယံဥက္ကဌ အဖြစ်တာဝန်ယူထားချိန်မှာ မြန်မာ့ပြသာနာဖြေရှင်းနိုင်ဖို့အတွက် တော်လှန်ရေးအင်အားစုတွေ ၊ စစ်ကောင်စီ အပါအဝင် အလွာမျိုစုံကသက်ဆိုင်သူတွေနဲ့အကြိမ်ပေါင်း ၁၈၀ ကျော် တွေ့ဆုံဆွေးနွေးခဲ့တယ်လို့ ဆိုပါတယ်။
▪︎ကိုးကား-ရိုက်တာ