ပဲခူးတိုင်းအရှေ့ခြမ်း ၊ ရွှေကျင်မြို့နယ်ထဲမှာ ၂၀၂၃ ခုနှစ် တစ်နှစ်တာအတွင်း စစ်ကောင်စီတပ်ရဲ့တိုက်ခိုက်မှုတွေကြောင့် ကျေးရွာပေါင်း ၃၀ ကျော်က ဒေသခံပြည်သူသုံး သောင်းနီးပါး ထွက်ပြေးတိမ်းရှောင်ရတယ်လို့ KNU ဗဟိုက ဒီနေ့မှာ ဖော်ပြပါတယ်။
ကျေးရွာထဲ လက်နက်ကြီးနဲ့ပစ်ခတ်တာ ၊ လေကြောင်းတိုက်ခိုက်တာတွေကြောင့် ကျေးရွာ ၃၁ ရွာက ပြည်သူတွေ ထွက်ပြေးခဲ့ရတာလို့ KNU က ဆိုပါတယ်။
နိုဝင်ဘာလ တစ်လထဲမှာတင် ရွှေကျင်မြို့နယ်ထဲက ကျေးရွာ ၁၉ ရွာထဲကို လက်နက်ကြီး အလုံးရေ ၈၀ ကျော်ကျရောက်ပေါက်ကွဲခဲ့တယ်လို့ KNU ရဲ့ဖော်ပြချက်မှာတွေ့ရပါတယ်။
လက်နက်ကြီးကျရောက်ပေါက်ကွဲမှုတွေကြောင့် ချောင်းဝရွာက အသက် ၅၂ နှစ်အရွယ် ဦးမင်းနိုင်နဲ့ ဝိုင်သစ်ဆိပ်ရွာက အသက် ၅၄ နှစ်အရွယ် ဒေါ်တင်ဌေးတို့ သေဆုံးခဲ့ရတယ်လို့သိရပါတယ်။
Public Service Announcement
ဒါအပြင်ဂွေးကုန်းရွာက အသက် ၇ နှစ်အရွယ် ကလေး အပါအဝင် ဒေသခံ ၃ ဦး လက်နက်ကြီးစ ထိမှန်ဒဏ်ရာရတယ်လို့KNU ကပြောပါတယ်။
အရပ်သားနေအိမ်တွေ ပျက်စီးတာ ၊ဒေသခံတွေရဲ့ နွားတွေ ထိခိုက်သေဆုံးမှု ရှိခဲ့တယ်လို့သိရပါတယ်။
ရွှေကျင်ဟာ ကရင်ပြည်နယ်နဲ့ထိစပ်နေတဲ့ ပဲခူးတိုင်းအရှေ့ခြမ်းညောင်လေးပင်ခရိုင်ထဲမှာပါပြီး KNU ၊ PDF တပ်တွေနဲ့ စစ်ကောင်စီတပ်တွေကြားတိုက်ပွဲတွေ မကြာခဏ ဖြစ်လေ့ရှိပါတယ်။
