ဟန်နွေ/People’s Spring
ကရင်အမျိုးသားကာကွယ်ရေးတပ်ဖွဲ့(KNDO) တပ်ဖွဲ့ ခေါင်းဆောင် ရဲဘော်များအနေဖြင့် မိမိတာဝန်များကို အသက်ပေးပြီး ကျေပွန်ကြရန် KNDO စစ်ဦးစီးချုပ် ဗိုလ်မှူးချုပ်စောရှီးလေက တိုက်တွန်း ပြောကြားသည်။
ဇူလိုင် ၁၆ရက်က ကျင်းပသည့် (၇၇)နှစ်မြောက် KNDOနေ့အခမ်းအနားတွင် စစ်ဦးစီးချုပ်က ထိုကဲ့သို့ ပြောကြားခဲ့ခြင်းဖြစ်သည်။
” ကျနော်တို့သည် တိုင်းပြည်၊ အဖွဲ့အစည်း၏ အလံတော်အောက်မှာ ကတိသစ္စာပြုထားသော တပ်ဖြစ်တဲ့ အတွက် ကရင်အမျိုးသားတွေကို ဖိနှိပ်ခံရမှုမှ လွတ်မြောက်စေရန်နှင့် လာရောက်ဖျက်စီးခံရခြင်း ရန်မှ ကာကွယ်ရန်အတွက် ကေအဲန်ဒီအိုတပ်ဖွဲ့ဝင်တွေကို တိုက်တွန်းချင်တာကတော့ မိမိတာဝန်တွေကို တိတိကျကျလုပ်ဆောင်ရမယ်။ စိတ်အားတင်းထားကြရမယ်။ တိုင်းပြည်နဲ့ လူမျိုးအတွက် သေရင်သေပါစေ အသက်ပေးရရင် ပေးရမယ်။ ကျနော် တို့ နယ်မြေကို လာရောက်ပြီးတော့ ကရင်အမျိုးသား နယ်မြေတွေကို လာရောက်လုယူတာတွေကို ဒီအတိုင်းရပ်ကြည့်မနေတော့ဘူး။ ကျနော်တို့ နောက်မဆုတ်ဘူး”ဟု ဗိုလ်မှူးချုပ်စောရှီးလေက ပြောသည်။
Public Service Announcement
ရဲဘော်များအနေဖြင့် အောင်မြင်မှုရသည်အထိ မိမိတာဝန်ကို ကျေပွန်စွာ ထမ်းဆောင်ကြရမည်ဟုလည်း စစ်ဦးစီးချုပ်က မှာကြားသည်။
“လူကြီးတွေ ပြောတာက ကျနော်တို့ ရဲရင် ရန်သူတွေ နောက်ဆုတ်သွားမယ်။ ကျနော်တို့ နောက်ဆုတ်ရင် ရန်သူရဲမယ်။ငါတို့ကြောက် နေမယ်ဆိုရင် ရန်သူ အနိုင်ရလိမ့်မယ်။ မကြောက်ပဲ ရဲရင့်မယ်ဆိုရင် ရန်သူက ငါတို့ကို ကြောက်လိမ့်မယ်။ အဲတာကြောင့် ကေအဲန်ဒီအိုတပ်ဖွဲ့ဝင်တွေကို ပြောချင်တာက နောက်မဆုတ်နဲ့၊ မကြောက်နဲ့၊ သေရမှာ မကြောက်နဲ့။ ဂုဏ်ရှိတဲ့သေခြင်းနဲ့ အလဟသ သေခြင်း ဘယ်တခုကိုရွေးမလဲဆိုတာ ဒီကနေ့ ဆုံးဖြတ်ရမှာဖြစ်တယ်”ဟု စစ်ဦးစီးချုပ် ဗိုလ်မှူးချုပ် စောရှီးလေက ပြောသည်။
ထို့အပြင် အများအတွက်အသက်ပေးရခြင်း၊ တိုင်းပြည်အတွက် အသက်ပေးရခြင်းအတွက် နောင်လာနောင်သားများက အမှတ်ရနေကြမည်ဖြစ်ကြောင်း ၎င်းက ဆိုသည်။
” စစ်ဦးစီးချုပ်ဘိုမြပြောခဲ့တာရှိတယ်။ တော်လှန်ရေးဟာ သတ်ရဲရမယ်။ သေရဲရမယ်။ တိုက်ရဲ၊ သေရဲအနိုင်ယူရဲရမယ်။ အဲတာကြောင့် သတ်ရဲရမယ်။ သေရဲရမယ် လို့ ခေါင်းဆောင်နဲ့ ရဲဘော် အားလုံးကို ပြောချင်ပါတယ်”ဟု ဗိုလ်မှူးချုပ်စောရှီးလေက ပြောသည်။
ကရင်အမျိုးသားကာကွယ်ရေးတပ်ဖွဲ့ (KNDO) အား ၁၉၄၇ ဇူလိုင် ၁၆ရက်က စတင်ဖွဲ့စည်းခဲ့ခြင်းဖြစ်သည်။
ကရင်အမျိုးသားများလွတ်မြောက်ရေးအတွက် ကေအဲန်ယူ-ကရင်အမျိုးသားအစည်းအရုံး၏ ကြိုးပမ်းမှုမှာ တချိန်တွင် လက်နက်ကိုင်တိုက်ပွဲအသွင်သို့ရောက်ရှိလာနိုင်သည့်အတွက် စစ်ဖက်ဆိုင်ရာအတွက် ကြိုတင် ပြင်ဆင်ခြင်းကာ ဖွဲ့စည်းခဲ့ခြင်းဖြစ်ပြီး ကရင်အမျိုးသားများအသက်အား ကာကွယ်စောင့်ရှောက်ပြီး လုံခြုံမှုရရှိစေရန် ရည်ရွယ်ခဲ့သည်။
ကရင်အမျိုးသားကာကွယ်ရေးတပ်ဖွဲ့သည် တော်လှန်ရေး၏ ကျောရိုးဖြစ်စေပြီး KNU၏ နိုင်ငံရေးလှုပ်ရှားဆောင်ရွက်မှု ပိုမိုအားကောင်းခိုင်မာလာစေရန် ရည်ရွယ်ဖွဲ့စည်းခဲ့ခြင်းဖြစ်သည်။
လက်ရှိတွင် KNDOတပ်ရင်း ရှစ်ရင်းရှိပြီး အာဏာသိမ်းစစ်ကောင်စီအား တော်လှန် တိုက်ခိုက်လျက်ရှိသည်။ ကရင်အမျိုးသားကာကွယ်ရေးတပ်(KNDO) လှုပ်ရှားနယ်မြေများ၌ ယခုနှစ် ဇန်နဝါရီမှ ဇွန်လအထိ KNDO ပါဝင်သည့် တိုက်ပွဲ ၆၇၂ကြိမ်ဖြစ်ခဲ့ရာ စစ်ကောင်စီတပ်မှ ၁၇၇ ဦး သေဆုံးပြီး ၁၃၃ဦး ဒဏ်ရာရခဲ့ကြောင်း KNUက ထုတ်ပြန်ထားသည်။
အဆိုပါ တိုက်ပွဲများအတွင်း ကရင်အမျိုးသားကာကွယ်ရေးတပ်(KNDO)မှ တပ်ဖွဲ့ဝင် ၂၃ဦး တိုင်းပြည်နှင့် လူမျိုးအတွက်အသက်ပေးခဲ့ရပြီး ၃၅ဦး ထိခိုက်ဒဏ်ရာရခဲ့သည်ဟုလည်း အသိပေးထားသည်။
