သာယာဝတီထောင်ဆီ ထောင်ပြောင်းခံရတဲ့နိုင်ကျဉ်းတွေ ညှဉ်းပန်းခံရ

ဆိုင်းမင်း/People’s Spring

အင်းစိန်အကျဉ်းထောင်ကနေ သာယာဝတီထောင်ဆီ ဇွန်လအတွင်း ပြောင်းရွှေ့ခံရတဲ့ နိုင်ငံရး အကျဉ်းသားတွေ ညှဉ်းပန်းနှိပ်စက်ခံနေရတယ်လို့ မိသားစုဝင်အချို့ထံကသိရပါတယ်။

ထောင်ကို စတင်ရောက်ရှိချိန်ထောင်ဗူးဝမှာကတည်းက နိုင်ငံရေးအကျဉ်းသားတွေကို ထောင်ပုံစံထိုင်ခိုင်းပြီး အကြောင်းမဲ့ ရိုက်နှက်တာတွေ ပြုလုပ်ခဲ့တယ်လို့ နိုင်ကျဉ်းမိသားစုဝင် က ပြောပြပါတယ်။

Public Service Announcement

အကျဉ်းထောင်ဝန်ထမ်းတွေဟာ ဆဲဆို ကြိမ်းမောင်းတာ ၊ နံပါတ်တုတ်၊ ရာဘာကြိုးတွေနဲ့ အပြင်းအထန် ရိုက်နှက်တာ ၊ ခြေချင်းထောက်ခတ်တာအပြင် တိုက်ပိတ်တာတွေကိုပါ လုပ်ဆောင်နေတာပါ။

တိုက်ပိတ်ခံရသူအကျဉ်းသား ၃ဦးထက်မနည်းရှိတယ်လို့သိရပါတယ်။

” ကျမသားလေးက အမြင်မတော်တာကို ဝင်ပြောမိလို့ ဝန်ထမ်းတွေက ဝိုင်းရိုက်တာ၊ပြီးတော့ တိုက်ပိတ်ခံလိုက်ရတယ်”လို့ နိုင်ငံရေးပုဒ်မနဲ့ ထောင်တသက်တကျွန်းခံနေရသူရဲ့ မိခင်ဖြစ်သူကပြောပါတယ်။

သာယာဝတီထောင်ဆီ ပြောင်းရွှေ့ခံရတဲ့ နိုင်ငံရေးအကျဉ်းသားတွေကိုထောင်အာဏာပိုင်တွေ ဟာ ဖိနှိပ်တာ ၊ ရိုက်နှက် တာတွေကို ရည်ရွယ်ချက်ရှိရှိပြုလုပ်နေတာလို့ အဲဒီထောင်ကနေ လွတ်မြောက်လာတဲ့ နိုင်ငံရေးအကျဉ်းသူဟောင်းတစ်ဦးကလည်းပြောပြပါတယ်။

“ နိုင်ကျဉ်းအမျိုးသားတွေဆို ထောင်ဗူးဝမှာ တင်တယောက်ချင်း ရိုက်တာ ၊ ရိုက်တဲ့သံတွေထောင်ထဲက အတိုင်းသားကြားရတာ ” လို့ အဲဒီနိုင်ငံရေးအကျဉ်းသူဟောင်းက ဆိုပါတယ်။

ပြီးခဲ့တဲ့ ဇွန်လကုန်ပိုင်းက ရာနဲ့ချီတဲ့ နိုင်ငံရေးအကျဉ်းသားတွေကို ပဲခူးတိုင်းက ဒိုက်ဦးထောင်နဲ့ သာယာဝတီ ထောင်တွေ ဆီ ပို့လိုက်တာပါ။

သာယာဝတီထောင်ဟာ နိုင်ငံရေးအကျဉ်းသားတွေကို နှိပ်စက်ရာမှာ ကိုလိုနီခေတ်ကနေ စစ်အစိုးရ အဆက်ဆက်မှာ နာမည်ဆိုးနဲ့ကျော်ကြားတဲ့ထောင်ဖြစ်ပါတယ်။