ဟန်နွေ/People’s Spring
ကရင်အမျိုးသားအစည်းအရုံး(KNU) တပ်မဟာ (၆) ဒူးပလာယာခရိုင် ကော့ကရိတ်မြို့နယ်တွင် စစ်ကောင်စီက လက်နက်ကြီးဖြင့်ပစ်ခတ်၍ အရပ်သားသေဆုံးထိခိုက်မှု ထပ်မံဖြစ်ပေါ်ခဲ့ပြီး သေဆုံးထိခိုက်သူများထဲတွင် ကလေးငယ်များ ပါဝင်သည်ဟု KNU ဗဟိုက အသိပေးသည်။
ဩဂုတ် ၉ရက် ညနေပိုင်းက စစ်ကောင်စီ၏ စွယ်တော်ကုန်း တပ်စခန်းမှ (၈၁)မမ လက်နက်ကြီးပစ်ခတ်ခဲ့၍ ထီးမူးထကျေးရွာအတွင်းကျရောက်ပေါက်ကွဲခဲ့ရာ (၉)လအရွယ် ကလေးငယ် တစ်ဦးသေဆုံးကာ (၅)နှစ်နှင့် (၄)နှစ်အရွယ် ကလေးငယ်တစ်ဦး အပါအဝင် ပြည်သူ ၅ဦး ဒဏ်ရာရခဲ့သည်ဟု ထုတ်ပြန်သည်။
Public Service Announcement
စစ်ကောင်စီတပ်သည် ကော့ကရိတ်မြို့နယ်အပါအဝင် KNU အုပ်ချုပ်နယ်မြေများအတွင်း လက်နက်ကြီး၊ လေကြောင်း တိုက်ခိုက်မှုများ မကြာခဏ ပြုလုပ်ခဲ့၍ အရပ်သား သေဆုံးထိခိုက်မှု မကြာခဏ ဖြစ်ပေါ်ခဲ့သည်။
KNU တပ်မဟာ(၁)နယ်မြေ သထုံခရိုင် ကျိုက်ထိုမြို့နယ်တွင်လည်း စစ်ကောင်စီက လက်နက်ကြီး ပစ်ခတ်ခဲ့၍ ပြည်သူအချို့ ထိခိုက်ဒဏ်ရာရရှိခဲ့သည်ဟုဆိုသည်။
ဩဂုတ် ၁၀ရက်ညပိုင်းက အမှတ်(၃၁၀) အမြောက်တပ်ရင်းစခန်းမှ လက်နက်ကြီး တစ်လုံးပစ်ခတ်ရာ အခိုင်ကျေးရွာအနီး ကျရောက်ပေါက်ကွဲပြီး အမျိုးသားတစ်ဦးဒဏ်ရာရခဲ့သည်ဟု ဆိုသည်။
ယခု ၂၀၂၄ ခုနှစ် ပထမနှစ်ဝက်အတွင်း စစ်ကောင်စီက အရပ်သား ပြည်သူများအား ပစ်မှတ်ထား လေကြောင်း ၊ လက်နက်ကြီး တိုက်ခိုက်ခြင်း အပါအဝင် စစ်ကောင်စီ၏ လူ့အခွင့်အရေးချိုးဖောက်မှုများကြောင့် KNU အုပ်ချုပ်နယ်မြေများအတွင်းရှိ ပြည်သူ ၁၃၀ ဦးကျော်သေဆုံးကာ ၄၃၀ဦးကျော် ဒဏ်ရာရခဲ့ကြောင်း KNUက ထုတ်ပြန်ထားသည်။
