ဇော်ရမ်း/People’s Spring
လားရှိုးမြို့အခြေစိုက် အရှေ့မြောက်တိုင်းစစ်ဌာနချုပ်(ရမခ)ကို မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA )က သိမ်းပိုက်ထိန်းချုပ်ပြီးနောက် စစ်ကောင်စီကမိုင်းရယ်မြို့တွင် ဌာနချုပ်အသစ်ဟုဆိုကာထပ်မံဖွင့်လှစ်လိုက်ကြောင်းစုံစမ်းသိရသည်။
ရမခဌာနချုပ်ကို မိုင်းရယ်ဗျူဟာထဲတွင် ဖွင့်လိုက်ခြင်းဖြစ်ပြီး လားရှိုးနှင့် ကျောက်မဲမြို့ကိုပြန်လည်တိုက်ခိုက်ရန်နှင့်လတ်တလောတိုက်ပွဲများပြင်းထန်နေသည့် သီပေါမြို့ခုခံစစ်အတွက် အသစ်ခန့်ထားသော ရမခတိုင်းမှူး ဆိုသော ဗိုလ်ချုပ်မြင့်ကျော်ထွန်းက ထိုနေရာမှ ကွပ်ကဲနေကြောင်း နေပြည်တော်စစ်ရေးသတင်းရင်းမြစ်ကပြောသည်။
Public Service Announcement
စစ်ကောင်စီက ရမခ မရှိတော့သော်လည်းဗိုလ်ချုပ်မြင့်ကျော်ထွန်းကို ရမခတိုင်းမှူးအဖြစ် ဩဂုတ်လ ၁၁ရက်မှ ခန့်အပ်ခဲ့ခြင်းဖြစ်သည်။ပြီး မူလက စစ်ကောင်စီတပ်လေ့ကျင့်ရေးအရာရှိချုပ်ရုံးမှ ဒုတိယလေ့ကျင့်ရေးအရာရှိချုပ်ဖြစ်သည်။
” မိုင်းရယ်က လားရှိူး၊သီပေါနဲ့ တန့်ယန့်မြို့တွေနဲ့ ဆက်တယ်။ အခုကတော့ မိုင်းရယ်ဗျူဟာမှာ ရမခအသစ်တည်တယ်။ ရှမ်းမြောက်မှာ သူတို့(စစ်ကောင်စီ)ရသလောက် ပြန်ယူချင်တဲ့ စဉ်းစားချက်ရှိတယ်။ လက်တွေ့အခြေအနေအရ မလွယ်ပါဘူး” ဟု စစ်ရေးသတင်းရင်းမြစ်တဦးက ပြောသည်။
ရှမ်းပြည်နယ်မြောက်ပိုင်းဒေသတစ်ခုလုံးတွင် စစ်ကောင်စီ တပ်ရှိသော မြို့နယ် လေးမြို့နယ်သာကျန်ရှိတော့ပြီး မိုင်းရယ်အပါအဝင်ဖြစ်သည်။ မူးဆယ် ၊သီပေါ ၊မိုင်းရယ် နှင့် တန့်ယန်းမြို့တို့တွင်သာစစ်ကောင်စီတပ်ကျန်ရှိသည်။ ထိုလေးမြို့တွင်လည်း သီပေါမြို့ရှိစစ်တပ်စခန်းများကို TNLA ဦးဆောင်သောပူးပေါင်းတပ်များကထိုးစစ်ဆင်တိုက်ခိုက်၍ မြို့ကိုထိန်းချုပ်ထားနိုင်ပြီဖြစ်ကာ စစ်တပ် တပ်ရင်း သုံးခုဖြစ်သော ခလရ (၂၃ ) ၊ခမရ (၅၀၃ ) ၊ ခမရ (၅၀၄)တို့တွင်သာစစ်တပ်ကျန်၍ ခံစစ်ဖြင့်တိုက်နေခြင်းဖြစ်သည်။
မူဆယ်၁၀၅ မိုင်ကိုလည်း ညီနောင် မဟာမိတ် ၃ ဖွဲ့ကတိုက်ခိုက်သိမ်းပိုက်ထားပြီး စစ်တပ်မှာ မြို့ပေါ်တွင်သာကျန်ရှိတော့ခြင်းဖြစ်သည်။ တန့်ယန်းမြို့တွင်လည်း ဝပ်တပ်ဖွဲ့-UWSA တပ်ဖွဲ့များဝင်ရောက်တပ်စွဲထားသည်။ မိုင်းရယ် မြို့တွင်လည်း SSPP/SSA တပ်ဖွဲ့က ဇူလိုင် ၁၂ ရက်တွင် ဒေသတည်ငြိမ်ရန်ဆိုကာ အင်အား ၁၀၀၀ ကျော်ဖြင့် ဝင်ရောက်တပ်စွဲခဲ့သေးသည်။
မိုင်းရယ်မြို့သည်လားရှိုးခရိုင်တွင်ပါဝင်ပြီး ရှမ်းပြည်နယ်တောင်ပိုင်းနှင့် ဆက်စပ်နေသည်။ ၁၀၂၇ စစ်ဆင်ရေးနှစ်ခုစလုံး၌ မိုင်းရယ်မြို့အနီးဝန်းကျင်တွင် တိုက်ပွဲအချို့ဖြစ်ပွားခဲ့သည်။ လတ်တလောတွင် တိုက်ပွဲဖြစ်ပွားခြင်းမရှိဟု ဒေသခံအချို့ကပြောသည်။
ပြီးခဲ့သည့် ဇူလိုင်လက လားရှိုးမြို့ကို MNDAAက စတင်တိုက်ခိုက်ပြီးနောက် ဇူလိုင် တတိယပါတ်တွင် ရမခတိုင်းမှူးဗိုလ်ချုပ်စိုးတင့်ကိုစစ်ကောင်စီက ရာထူးမှ ထုတ်ပယ်ပြီး မူဆယ်အခြေစိုက်တပ်မ(၉၉)တပ်မမှူး ဗိုလ်ချုပ် စိုးလှိုင်ကို အစားထိုးခန့်အပ်ခဲ့သည်။ တိုင်းမှူးဟောင်းဗိုလ်ချုပ်စိုးတင့်သည် ရမခတွင်ပင်ရှိနေစဉ် MNDAAက လားရှိုးမြို့သိမ်းတိုက်ပွဲအတွင်းဖမ်းဆီးခဲ့သည်။
ဗိုလ်ချုပ်စိုးလှိုင်သည် မူဆယ်၌ပင် ဆက်လက်ရှိနေခြင်းဖြစ်ပြီး ယခုအခါ ၎င်းအား ထပ်မံထုတ်ပယ်၍ ဗိုလ်ချုပ်မြင့်ကျော်ထွန်းကို တာဝန်ပေးခြင်းဖြစ်သည်။ တဆက်တည်းတွင် ရမခဌာနချုပ်ကို မိုင်းရယ်ဗျူဟာ၌ နေရာချခြင်းဖြစ်သည်။
ကမခတိုင်းစစ်ဌာနချုပ်တစ်ခု ဆုံးရှုံးရခြင်းသည် အာဏာသိမ်းစစ်အုပ်စုအတွင်း အလွန်တုန်လှုပ်စေခဲ့သည်။MNDAAက ဩဂုတ်လ ၃ရက်တွင် ရမခအား သိမ်းယူပြီး နာရီပိုင်းအတွင်း ရမခခုခံစစ်ကို တိုက်ရိုက်ညွှန်ကြားခဲ့သည့် အမှတ် ( ၂ ) စစ်ဆင်ရေးအထူးအဖွဲ့ (ကစထ ၂) မှူးဒုဗိုလ်ချုပ်ကြီးနိုင်နိုင်ဦးအား စစ်ကောင်စီကအပြစ်လွှဲချကာရာထူးမှ ထုတ်ပယ်ခဲ့သည်။
ဒုဗိုလ်ချုပ်ကြီး နိုင်နိုင်ဦးအစား ကစထ (၂)မှူးအဖြစ် စစ်ကောင်စီ ပြည်ထဲရေးဝန်ကြီးဌာန ဒုတိယဝန်ကြီးနှင့် ရဲချုပ်ဒုတိဗိုလ်ချုပ်ကြီးနီလင်းအောင်ကို ခန့်အပ်ခဲ့သည်။
လက်ရှိတွင် မိုင်းရယ်မြို့အနီးပတ်ဝန်းကျင်ရှိ လားရှိုးမြို့နယ်တခုလုံးကို MNDAAက ထိန်းချုပ်ထားသည်။
အရှေ့မြောက်တိုင်းစစ်ဌာနချုပ် (နမခ)ကွပ်ကဲမှုအောက်ရှိ ဒေသကွပ်ကဲမှုစစ်ဌာနချုပ် တစ်ခု၊ အခြေချ စစ်ဗျူဟာအဖွဲ့ သုံးဖွဲ့၊ လှုပ်ရှားစစ်ဗျူဟာအဖွဲ့နှစ်ဖွဲ့နှင့် ခြေလျင်/ခြေမြန်တပ်ရင်း (၁၆)ရင်းအား ရှမ်းမြောက် ၁၀၂၇စစ်ဆင်ရေး အပိုင်း(၁)နှင့် အပိုင်း(၂)အတွင်း သြဂုတ်လဆန်းအထိ့ မြောက်ပိုင်းညီနောင်သုံးမဟာမိတ် သုံးဖွဲ့နှင့် အပိုင်း(၂)
တွင် ကိုးကန့်တပ် (MNDAA) ပူးပေါင်းတပ်များက တိုက်ခိုက်သိမ်းပိုက်ခဲ့သည်။လားရှိုးမြို့ သိမ်းပြီးနောက် သြဂုတ် ၅ ရက်တွင်စစ်ကောင်စီတပ်ဖွဲ့ဝင် ၂၀၀၀ ခန့်ရှိသည်ဆိုသော
စကခ(၁) နှင့် ခမရ(၅၀၁)၊ ခမရ(၅၀၂) အပါအဝင် ကျောက်မဲမြို့နယ်ရှိ စစ်တပ်စခန်းအားလုံးကို TNLA ဦးဆောင်သော ပူးပေါင်းတပ်များကထပ်ံသိမ်းပိုက်ခဲ့သည်။ထိုကြောင့် ၁၀၂၇ ပထမလှိုင်းတွင် ညီနောင် ၃ ဖွဲ့က မြို့ ၁၇ မြို့ ၊ ဒုတိယလှိုင်းတွင် တော်လှန်ရေးတပ်ဖွဲ့များက ယခုအချိန်ထိ မြို့ ၆ မြို့ကို သိမ်းပိုက်ထိန်းချုပ်ထားသည်။ထိုအပြင်
နောင်ချို မြို့ရှိစစ်တပ်စခန်းများကိုအ ပြီးသတ်သိမ်းပိုက်ရန် ထိုးစစ်ဆင်တိုက်ခိုက်နေသလို ၊မူဆယ်မြို့ရှိ စစ်ကောင်စီတပ်များကိုလည်း အလင်းဝင်ရန် ကမ်းလှမ်းထားကြောင်းသတင်းရရှိသည်။
