ကျော်ဇော/People’s Spring
ပဲခူးတိုင်း၊ ဖြူးမြို့နယ်တွင် ကျေးရွာများစစ်ကြောင်းထိုးနေသည့် စစ်ကောင်စီတပ်ကို ကရင်အမျိုးသားလွတ်မြောက်ရေးတပ်မတော် (KNLA)၊ PDF ပူးပေါင်းတပ်များက ကြားဖြတ်တိုက်ခိုက်ခဲ့ရာ စစ်ကောင်စီဘက်မှ ခုနစ်ဦးထက်မနည်းသေဆုံးကြောင်း ဖြူးမြို့နယ် ပြည်သူ့ကာကွယ်ရေးအဖွဲ့(ပကဖ)မှ တာဝန်ရှိသူတစ်ဦးက ပြောသည်။
ယမန်နေ့(သြဂုတ် ၂၀)နံနက် ၁၀နာရီခန့်က ဖြူးမြို့တောင်ဘက် သင်္ကန်းမြှောင်ကျေးရွာမှ ထွက်လာသော စစ်ကောင်စီတပ်စစ်ကြောင်းကို လိပ်ပေါရွာနှင့် စက်ကုန်းကျေးရွာကြား၌ ကြားဖြတ်တိုက်ခိုက်ခဲ့ခြင်းဖြစ်ပြီး စစ်ကောင်စီတပ်မှ အရာရှိတစ်ဦးအပါအဝင် ခုနစ်ဦးသေဆုံးကာ ဒဏ်ရာရသူများလည်းရှိကြောင်း သိရသည်။
ထို့ကြောင့် စစ်ကောင်စီတပ်က ထိခိုက်ဒဏ် ရာရသူများအား ကားသုံးစီးဖြင့် လာရောက်သယ်ထုတ်သွားပြီး လိပ်ပေါ်ရွာဘုန်းကြီး ကျောင်းအတွင်းဝင်ရောက်တပ်စွဲ၍ ဒေသခံပြည်သူ ၂၅ ဦးထက်မနည်းကို ဓားစာခံအဖြစ်ဖမ်းဆီးထားကြောင်း ဖြူးမြို့နယ် ပကဖမှ တာဝန်ရှိသူတစ်ဦးက ပြောသည်။
Public Service Announcement
“ဥပုသ်နေ့ကတည်းက ဖမ်းထားတာ။ လိပ်ပေါဘုန်းကြီးကျောင်းထဲမှာ အခုထိ ၂၅ယောက်ကျန်သေးတယ်။ မ(အမျိုးသမီး)တစ်ဦး၊ ကျား(အမျိုးစား)၂၄ ဦးထားတယ်”ဟု ၎င်းက ဆက်ပြောသည်။
တိုက်ပွဲဖြစ်ပွားပြီးနောက် တော်လှန်ရေးအင်အားစုများမှ နယ်မြေရှင်းလင်းရေးဆောင် ရွက်ရာ စစ်ကောင်စီတပ်အသုံးပြုသော ကျည်အချို့နှင့် ကျောပိုးအိတ်များ သိမ်းဆည်းရရှိခဲ့ပြီး တော်လှန်ရေးပူးပေါင်းတပ်များ အထိအခိုက်မရှိ ဆုတ်ခွာနိုင်ခဲ့ကြောင်း ဖြူးမြို့နယ် ပကဖမှ အသိပေးသည်။
အဆိုပါတိုက်ခိုက်မှုကို ဖြူးမြို့နယ် ပကဖတိုက်ခိုက်ရေးအဖွဲ့၊ ဖြူးမြို့နယ်(ပ.က.ဖ) Drone အဖွဲ့၊ ဒေါင်းဖြူစစ်ကြောင်း Drone အဖွဲ့၊ အာဠာဝကစစ်ကြောင်းနှင့် တပ်မဟာ (၃)၊ ရင်း(၈) KNLA တော်လှန်ရေးအင်အားစုများ ပူးပေါင်းတိုက်ခိုက်ခဲ့ခြင်းဖြစ်သည်။
လက်ရှိအခြေအနေတွင် စစ်ကောင်စီတပ်များ လိပ်ပေါကျေးရွာ၌ ဆက်ရှိနေပြီး အင်အားဖြည့်တင်းမှုများလုပ်ဆောင်လျှက်ရှိရာ နှစ်ဖက်စစ်ရေးအခြေအနေ တင်းမာနေဆဲဖြစ်၍ ပြည်သူများ သတိပြုနေထိုင်ကြရန် တော်လှန်ရေးတပ်ဖွဲ့များက သတိပေးထားသည်။
“စခ၊ရခ တွေလာရင် ဝေးဝေးနေပေးပါ။ မိမိလုံခြုံရေးအတွက် ပုံးကျင်းပြုလုပ်ထားကြပါ။ သတင်းကူထောက်ပေးခြင်းအားဖြင့်ကူ ညီပေးစေချင်ပါတယ်”ဟု ဖြူးမြို့နယ် ပကဖက မေတ္တာရပ်ခံထားသည်။
သြဂုတ် ၃ ရက်ကလည်း ဖြူးမြို့နယ် ပကဖ ဒရုန်းအဖွဲ့မှ ညောင်ပင်သာမြို့ အရှေ့ဘက် မြို့မ ၃ လမ်းနှင့် မြို့မ ၂ လမ်းအဆုံးရှိ ရွာလယ် ဘုန်းကြီးကျောင်းတွင် စခန်းချနေသော စစ်ကောင်စီတပ်သားများကို ဒရုန်းဖြင့် ဗုံးသီးချတိုက်ခိုက်ရာ နှစ်ဦးဒဏ်ရာရသွားခဲ့သည်။
