သတိုး/People’s Spring
ရန်ကုန်မြို့ မှော်ဘီမြို့နယ် ပြည်လမ်းပေါ်ရှိ တပ်မတော်အုပ်ချုပ်မှုသင်တန်းကျောင်း ဂိတ်ကင်းကို ပြင်းအားမြင့်လက်ပစ်ဗုံးများဖြင့် ပစ်ခတ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင်များထိခိုက်မှုရှိနိုင်ကြောင်း Yangon Army (YA)မှတာဝန်ရှိသူက ပြောသည်။
“အကြမ်းဖက်မင်းအောင်လှိုင်လက်အောက်ခံ တပ်မတော်အုပ်ချုပ်မှု့သင်တန်းကျောင်းရှိ ဂိတ်ကင်းအားYangon Army (YA) ၊ အနောက်ပိုင်းခရိုင် ပကဖ အဖွဲ့တို့ပူးပေါင်း၍ပြင်းအားမြင့်လက်ပစ်ဗုံးများဖြင့်ထိထိရောက်ရောက်တိုက်ခိုက်နိုင်ခဲ့ပါသည်။ လုံခြုံရေးစစ်ခွေးများပြင်းပြင်းထန်ထန်ထိခိုက်သွားပါသည်။” ဟု ၎င်းက ပြောသည်။
Public Service Announcement
ဩဂုတ် ၂၄ ရက် ည ၇ နာရီခွဲခန့်တွင် အဆိုပါ တိုက်ခိုက်မှုကိုလုပ်ဆောင်ခဲ့ခြင်းဖြစ်ပြီး ထိခိုက်မှုအခြေအနေ အသေးစိတ်မသိရသေးကြောင်း ၎င်းကဆိုသည်။
မှော်ဘီမြို့၌ ည ၇ နာရီခွဲအချိန်ခန့်က ပေါက်ကွဲသံ သုံးကြိမ်ခန့်ကြားရကြောင်း ဒေသခံပြည်သူတစ်ဦး၏ သတင်းပေးချက်ကို ရန်ကုန်သတင်းများကို ဖော်ပြပေးနေသည့် Hlaing Info က အသိပေးထားသည်။
“ပြည်သူအားမျိုးစုံဖိနှိပ်အနိုင်ကျင့်နေသောမတရားဥပဒေထုတ်ပြီး ပြည်သူအား စစ်မှုမထမ်းမနေရဥပဒေကိုအားပေးအားမြောက်ပြုနေသော
အုပ်ချုပ်ရေးမှူးများကိုကျွန်ုပ်တို့အနေဖြင့် ထိထိရောက်ရောက်တိုက်ခိုက်သွားမည် ဖြစ်ကြောင်းထပ်မံအသိပေးလိုက်ပါသည်။”ဟု YA၏ ထုတ်ပြန်ချက်၌ ဖော်ပြထားသည်။
ထပ်မံ၍ စစ်ရေးပစ်မှတ်များကို မဟာမိတ်အဖွဲ့များ နှင့်ပူးပေါင်း၍ ဆက်လက်တိုက်ခိုက်သွားမည်ဖြစ်သောကြောင့် ပြည်သူများအနေဖြင့် စစ်ကောင်စီနှင့်ပတ်သက်သည့်နေရာများကို ဝေးဝေးမှရှောင်ကြရန် YAက သတိပေးထားသည်။
