ဖေဖော်ဝါရီ-၁၁၊၂၀၂၆။သတိုး/People’s Spring
ရန်ကုန်မြို့၊ မှော်ဘီမြို့မရဲစခန်းကနေ ပြည်သူတွေကို ပေါ်တာဆွဲဖမ်းဆီးဖို့ထွက်လာတဲ့ ကားကို လက်လုပ်မိုင်းတွေ၊ လက်ပစ်ဗုံးတွေနဲ့တိုက်ခိုက်ခဲ့တယ်လို့ မြို့ပြကြွက်အဖွဲ့တာဝန်ရှိသူက ပြောပါတယ်။
“ ရဲနဲ့ ပျူတွေ ညတိုင်းအိမ်စီးကားနဲ့ ထွက်ပြီး ပြည်သူတွေကို ပေါ်တာဆွဲတာသတင်းရလို့ စောင့်ပြီးတိုက်ခိုက်တာပါ။လက်လုပ်မိုင်း ၂လုံးနဲ့ အသီးအစစ် ၂လုံးနဲ့ပါ” လို့ တိုက်ခိုက်မှုနဲ့ ပတ်သက်ပြီး ပြောပါတယ်။
ဖေဖော်ဝါရီ ၁၀ရက် ည ၁၀နာရီလောက်မှာ တိုက်ခိုက်မှုလုပ်ခဲ့တာဖြစ်ပြီး ကားပေါ်မှာ ရဲ နဲ့ ပျူ စောထီး ၇ ဦးလောက်ပါတယ်လို့ ဆိုပါတယ်။
Public Service Announcement
” ကားကိုထိသွားပြီး အထဲမှာပါတဲ့ လူတွေလည်း ထိခိုက်မှုရှိပါတယ်။နေရာနဲ့ အခြေအနေကြောင့် ချက်ချင်းပြန်ဆုတ်လာရလို့ ဘယ်လောက်ထိခိုက်မိလဲဆိုတာတော့ သေချာရသေးပါဘူး” လို့ အထက်ပါတာဝန်ရှိသူက ပြောပါတယ်။
မှော်ဘီမြို့မှာ မနေ့ ဖေဖော်ဝါရီ ၁၀ရက် ညက ပေါက်ကွဲမှုဖြစ်တဲ့ အသံ ၂ကြိမ်ကြားရတယ်လို့ ဒေသခံတစ်ဦးက သတင်းပေးပို့လာကြောင်း Hlaing Info ရဲ့ တယ်လီဂရန်ချန်နယ်မှာ မနေ့ည ၁၀ နာရီခွဲက အသိပေးထားပါတယ်။
မြို့ပြကြွက်အနေနဲ့ စစ်အာဏာရှင်စနစ်ကျဆုံးချိန်အထိ တိုက်ပွဲဝင်သွားမှာဖြစ်ပြီး ပြည်သူတွေအနေနဲ့လည်း စစ်ကောင်စီအပါအဝင်သူတို့ရဲ့ လက်ကိုင်တုတ်တွေရဲ့ သတင်းတွေကို ပေးပို့တိုင်တန်းဖို့ တောင်းဆိုထားပါတယ်။
ရန်ကုန်မြို့မှာ စစ်ကောင်စီတပ်ဖွဲ့ဝင်တွေက အိမ်စီးကားတွေသုံးပြီး လူငယ်တွေကို ပေါ်တာဆွဲတာ ၊ အတင်းအဓမ္မဖမ်းဆီးတာတွေ ပြုလုပ်တဲ့ ဖြစ်စဉ်တွေရှိပါတယ်။
