ကျော်ဇော/People’s Spring
ပဲခူးတိုင်းအနောက်ခြမ်း၊ သာယာဝတီခရိုင် အတွင်း စစ်ကောင်စီတပ်က ပေါ်တာဆွဲဖမ်းဆီးလျှက်ရှိရာ ဖမ်းဆီးခံရသူ ၃၀၀ ခန့်ရှိလာပြီဖြစ်ကြောင်း ဒေသတွင်း စစ်ရေးသတင်းရင်းမြစ်များက လူထုနွေဦးသို့ ပြောသည်။
ပေါ်တာဆွဲဖမ်းဆီးမှုများတွင် မင်းလှမြို့နယ်တွင် ဒေသခံပြည်သူ ၈၀ ကျော်၊ အုတ်ဖိုမြို့နယ်တွင် ၈၀ ခန့်၊ လက်ပံတန်းမြို့နယ် ၄၀ ခန့်၊ ဇီးကုန် ၂၀ ကျော်နှင့် နတ္တလင်း ၂၅ ဦးခန့် အသီးသီးဖမ်းဆီးခံထားရပြီး မိုးညိုနှင့် သာယာဝတီမြို့နယ်များတွင်လည်း ပေါ်တာဆွဲမှုများဖြစ်ပေါ်နေသော်လည်း ဦးရေအတိအကျ မသိရသေးပေ။
အထက်ပါ ပေါ်တာဆွဲဖမ်းဆီးမှုများအနက် သြဂုတ် ၂၂ ရက်က မင်းလှမြို့နယ်၊ ရှားတောကွင်းကျေးရွာသို့ စစ်ကောင်စီတပ်များဝင်ရောက် ပေါ်တာဆွဲရာတွင် ကျောင်းသူနှစ်ဦးကိုပါ ဖမ်းဆီးခေါ်ဆောင်သွားကြောင်း ဒေသစစ်ရေးသတင်းရင်းမြစ်တစ်ဦးက ပြော သည်။
Public Service Announcement
“သူတို့ရွာထဲကို စကစတွေက ကားနဲ့လာပြီး ပေါ်တာဝင်ဆွဲတာကို ကောင်မလေးတွေက အစ်ကိုတို့ရေ ဒီမှာပေါ်တာဆွဲနေပြီဆိုပြီး လှမ်းသတိပေးတာ။ အဲလိုသတိပေးနေချိန်မှာ နောက်ဘက်ကနေ ခြေကျင်ပတ်ဝင်လာတဲ့အဖွဲ့နဲ့တိုးပြီး သတိပေးတဲ့ကျောင်းသူနှစ်ဦးကိုပါ ဖမ်းသွားတာ”ဟု ၎င်းက ဆက်ပြောသည်။
အလားတူ ဇီးကုန်းနှင့် အုတ်ဖိုမြို့နယ်များအတွင်း ပေါ်တာဆွဲဖမ်းဆီးခံရသူများတွင် စစ် တပ်ထောက်ခံသူများနှင့် ကြံ့ခိုင်ရေးပါတီဝင်အချို့ပါ ပါဝင်နေပြီး ပေါ်တာဆွဲခံရမည်စိုး၍ တိမ်းရှောင်နေသူများလည်းရှိနေကြောင်း ဒေသခံများထံမှ စုံစမ်းသိရသည်။
“အုတ်ဖိုက စစ်တပ်ထောက်ခံတဲ့ စစ်မှုထမ်း ဟောင်းရဲ့သား ပေါ်တာဆွဲခံရတာ။ သူ့သားကိုပြန်လွတ်ပေးစေချင်ရင် ထွေအုပ်မှာ ကင်းစောင့်ရမယ်ဆိုလို့ စစ်တပ်ဗိုလ်ကပြောလို့ သွားစောင့်ပေးတာတောင် ပြန်မလွတ်ပေးလို့ သူ့အဖေပေါက်ကွဲနေတယ်”ဟု ၎င်းဒေသခံက ရှင်းပြသည်။
ပေါ်တာဆွဲခံလိုက်ရသည့်လူငယ်မှာ ကိုစီဖိုးဆိုသူဖြစ်ပြီး အုတ်ဖိုမြို့နယ်၊ ဥတိုကျေးရွာမှဖြစ်ကာ စစ်မှုထမ်းဟောင်း ဦးချိုတူးဆိုသူ၏သားဖြစ်ကြောင်း၊ ၎င်းမှာ တာလမ်းဘေး၌ မြစ်ရိတ်နေစဥ် ဖမ်းဆီးခေါ်ဆောင်ခြင်းခံလိုက်ရကြောင်း အထက်ပါဒေသခံက ဆက်ပြောသည်။
စစ်ကောင်စီတပ်သည် တော်လှန်ရေးတပ်ဖွဲ့များနှင့် တိုင်းရင်းသားလက်နက်ကိုင်တပ်ဖွဲ့များ၏ တိုက်ခိုက်ခံရမှုကြောင့် နိုင်ငံတဝှမ်းစစ်ရှုံးနိမ့်မှုမျိုးစုံဖြင့်ရင်ဆိုင်နေရရာ စစ်မှုထမ်းရန် လူငယ်များအား အတင်းအဓ္ဓမတပ်သားသစ်စုစောင်းခြင်း၊ ပေါ်တာဆွဲခြင်းများကို ဆက်တိုက် လုပ်ဆောင်လျှက်ရှိသည်။
