သတိုး /People’s Spring
ရန်ကုန်မြို့ တောင်ဥက္ကလာပမြို့နယ် သံသုမာလမ်းပေါ်ရှိ စစ်ကောင်စီ၏ ခြေမြန်တပ်ရင်း(မခရ ၄၃၅ ၊၄၃၆)တပ်ရင်းကို အဝေးထိန်းမိုင်းများဖြင့် ဖောက်ခွဲတိုက်ခိုက်ခဲ့ကြောင်း Operation Flame (OF) အဖွဲ့၏သတင်းနှင့် ပြန်ကြားရေးတာဝန်ခံက လူထုနွေဦးသို့ပြောသည်။
“ကျွန်တော်တို့ နှစ်လုံးခွဲခဲ့တာဗျ။ မိန်းလမ်းမနဲ့ ဂိတ်နဲ့က ဝေးတော့ ပထမတစ်လုံးကို ခွဲပြီး ပေါက်ကွဲမှုကို လာကြည့်တော့မှ နောက်တစ်လုံးနဲ့ခွဲတာဗျ” ဟု ၎င်းက ပြောသည်။
Public Service Announcement
ယင်းတိုက်ခိုက်မှုကို ဩဂုတ် ၂၆ ရက် ည ၇နာရီကျော်တွင် လုပ်ဆောင်ခဲ့ခြင်းဖြစ်ပြီး စစ်ကောင်စီဘက်မှ အထိအခိုက်ရှိနိုင်ကြောင်း ၎င်းက ဆိုသည်။
“စစ်ဆင်ရေးပြီးဆုံးပြီးနောက် တော်လှန်ရေးအဖွဲ့သားများအားလုံး ဘေးကင်းရာသို့ ရောက်ရှိနေပြီဖြစ်ကြောင်း သတင်းထုတ်ပြန်လိုက်သည်။”ဟု OFက ထုတ်ပြန်ထားသည်။
တိုက်ခိုက်မှုနှင့်ပတ်သက်ပြီး တောင်ဥက္ကလာနှင့် မရမ်းကုန်းမြို့နယ်အတွင်းမှ ည ၇နာရီကျော်တွင် ပေါက်ကွဲသံနှစ်ချက်ကြားရကြောင်း ဒေသခံများက Hlaing Info သို့ သတင်းပေးပို့ထားကြောင်း ဖော်ပြထားသည်။
Operation Flame အဖွဲ့အနေဖြင့် ရန်ကုန်မြို့ရှိ မဟာမိတ်အဖွဲ့များဖြင့်ပူးပေါင်းကာ စစ်ကောင်စီကို အရှိန်မြှင့်တိုက်ခိုက်သွားမည်ဟု သတင်းထုတ်ပြန်ထားသည်။
၂၀၂၂ ဩဂုတ် ၁၇ရက်ကလည်း ခမရ(၄၃၅)တပ်ရှေ့ဂိတ် ဘန်ကာ၌ စစ်ကောင်စီတပ်သား တချို့ရှိနေချိန် URF(United Resistance Force)နှင့် DRF (Divine Ranger Force)တို့က ဗုံးခွဲတိုက်ခိုက်ခဲ့သေးသည်။
