လူမှု​ကူညီ​ရေးအဖွဲ့များ၏ ဆန်ကား ၁၁စီး ပူတာအိုသို့ရောက်ရှိပြီး ဒေသခံများအားမျှဝေ​​ရောင်း​ပေး

မိထက်/People’s Spring

လူမှုကူညီရေးအဖွဲ့များဦးဆောင်ပြီး မြစ်ကြီးနားမြို့မှ ကား ၁၁ စီးဖြင့် သယ်ဆောင်လာသော ဆန်အိတ်များ ပူတာအိုမြို့သို့ ရောက်ရှိခဲ့ပြီး ဒေသခံများအား မျှဝေရောင်းချခဲ့သည်။

ဆန်အိတ် စုစုပေါင်း ၈၀၀ခန့်သည် ပူတာအိုမြို့သို့ စက်တင်ဘာလ ၇ ရက်က ရောက်ရှိလာခြင်းဖြစ်ပြီး စက်တင်ဘာလ ၈ ရက် နှင့် ၉ ရက်တွင် ဒေသခံများအား မျှဝေရောင်းချခဲ့ခြင်းဖြစ်သည်။ သို့သော် လောက်ငမှုမရှိဘဲ လိုအပ်ချက်များရှိနေဆဲဟု လူမှုကူညီရေးအဖွဲ့များကပြောသည်။

“မလောက်ငပါဘူး။ဆန်လိုအပ်ချက်ကိုအလုံအလောက် မပေးနိုင်ဘူး ဖြစ်နေတယ်။ဆန်အပါအဝင်စားသောက်ကုန်တွေအားလုံးအတွက် အခက်အခဲတွေ ရှိနေတယ်” ဟု ဒေသခံတစ်ဦးကပြောသည်။

Public Service Announcement

ပူတာအိုခရိုင်အတွင်း မိုးရာသီကာလလမ်းပန်းဆက်သွယ်ရေးခက်ခဲခြင်းနှင့် မြစ်ကြီးနားနှင့်ပူတာအိုမြို့ကြား မြို့နယ်အချို့တွင်ဖြစ်ပွားသောတိုက်ပွဲများကြောင့် နောင်မွန်၊ခေါင်လန်ဖူး၊ပန်နန်းဒင်၊မချမ်းဘော့နှင့် ပူတာအိုမြို့တို့တွင် ဆန်ပြတ်လပ်နေပြီး ဒေသခံများ အခက်အခဲကြုံတွေ့နေရသည်။

ပူတာအိုမြို့ပေါ်တွင် ဆန်ကြမ်းတစ်အိတ် ကျပ် ၅သိန်း၊ ဆီတစ်လီတာတစ်ဗူး ၂ သောင်းကျပ်အထိ ဈေးပေါက်နေကြောင်း သတင်းရရှိသည်။

ပူတာအိုခရိုင်သည် လမ်းပန်းဆက်သွယ်ရွေးခက်ခဲသည့်ဒေသဖြစ်၍ ကုန်စျေးနှုန်းများမှာ ယခင်ကတည်းကပင် ပုံမှန်ထက်မြင့်တက်သည့် ဒေသဖြစ်သည်။ စစ်တပ်ကနိုင်ငံတော်အာဏာသိမ်းပြီးနောက် ဒေသတွင်းစားနပ်ရိက္ခာအခက်အခဲပိုမိုဆိုးရွားသွားပြီး ဒေသခံများသည် လူမှုကူညီရေးအဖွဲ့များ၏ အကူအညီကိုမျှော်လင့်နေရသည်။