ဟန်နွေ ၊ကျောဇော /Peopel’s Spring
ထိုင်းနိုင်ငံတွင် အဖမ်းခံရပြီး စစ်ကောင်စီထံ ပြန်လည်လွှဲပြောင်းလာသည့် လူငယ် ၂၇ဦးကို စစ်မှုထမ်းခိုင်းရန် ကြိုးပမ်းစဉ် အဆိုပါ လူငယ်များက စစ်ကောင်စီတပ်အစောင့် စစ်သား ၂ဦးကို သတ်ဖြတ်ပြီးကရင်အမျိုးသားအစည်းအရုံး(KNU) ထားဝယ်ခရိုင် တပ်မဟာ(၄) KNDO တပ်ရင်း(၇)တပ်ခွဲ(၅)ထံ လာရောက်ခိုလှုံခဲ့ကြောင်း တပ်မဟာ(၄)က သတင်းထုတ်ပြန်ထားသည်။
ကရင်ဘာသာဖြင့် ဖော်ပြထားသည့် သတင်းထုတ်ပြန်ချက်ကို KNU သတင်းရင်းမြစ်က ဘာသာပြန်ပြောပြပေးရာ လူငယ် ၂ ဦးသည် စက်တင်ဘာ ပထမပတ်တွင် KNDO တပ်ရင်း(၇)တပ်ခွဲ (၅)ထံ ရောက်ရှိလာခြင်းဖြစ်သည်ဟုသိရသည်။
“အဲဒီ လူငယ် အားလုံးပေါင်း ၂၇ ယောက်ဟာ ထိုင်းနိုင်ငံမှာ အလုပ်လုပ်ရင်း သူတို့ကို ဖမ်းဆီးပြီး ဗမာပြည်ကိုပြန်ပို့တယ်။ အတင်းအကြပ်ပြန်ပို့တဲ့ သဘောဆောင်ပါတယ်။ အတင်းအကြပ်ပြန်ပို့ခံရတဲ့ လူငယ် အားလုံး ၂၇ယောက်ဟာ စကစ အာ
Public Service Announcement
ဏာပိုင်တွေဆီကို လက်လွှဲပေးလိုက်တယ်တဲ့။ အဲဒီလိုစကစ လက်ထဲကိုလွှဲအပ်ခံရတဲ့လူငယ်အားလုံးပေါင်း၂၇ယောက်ကို စကစနေပြီးတော့ တိုင်းဗဟို(၁၂)ဆီကို ပို့ပြီးတော့ အတင်းအကြပ် စစ်မှုထမ်းခိုင်းတယ်တဲ့။ တိုင်းဗဟို(၁၂)ကို ပို့ပြီးတော့စစ်မှုထမ်းခိုင်းဖို့အတွက် လမ်းမှာလှေ ၇ စီးနဲ့ အဲဒီလူငယ် ၂၇ယောက်ကို တင်ဆောင်လာတဲ့ လမ်းမှာပဲ စကစ အစောင့်နှစ်ယောက်ရှိတယ်တဲ့။အဲဒီမှာ သူတို့က အဲဒီ အစောင့်တွေကို သတ်ပြီးလွတ်မြောက်အောင်ထွက်ပြေးလာတယ်။ နောက်ဆုံးကျတော့ တပ်မဟာ(၄) KNDOတပ်ရင်း(၇)တပ်ခွဲ(၅)ဆီကိုလွတ်မြောက်ထွက်ပြေးလာတယ်လို့ပြောတယ်” ဟု KNU သတင်းရင်းမြစ်က ပြောပြသည်။
KNU တပ်မဟာ(၄)ကထုတ်ပြန်သည့် သတင်းတွင်လူငယ်များက စစ်ကောင်စီတပ်ဖွဲ့ဝင် ၂ဦးထံမှ သိမ်းရခဲ့သည့် လက်နက် ၂လက်ကို ယူဆောင်လာသည်ကိုလည်းဓာတ်ပုံမှတ်တမ်း၌ တွေ့ရသည်။
စစ်ကောင်စီ၏ အမှတ်(၁၂) တိုင်းဗဟိုလေ့ကျင့်ရေးသင်တန်းကျောင်းသည် တနင်္သာရီတိုင်းပုလောမြို့နယ်အတွင်းတည်ရှိသည့် လေ့ကျင့်ရေးကျောင်းဖြစ်သည်။
“ပင်လယ်ပြင်မှာ စက်လှေတစ်စီး ပျောက်သွားတယ်ဆိုတဲ့သတင်းတော့ ကြားလိုက်ရတယ်ဗျ။ ကျန်တဲ့အသေးစိပ်တော့ မသိရဘူး။ ဖြစ်တာက ထားဝယ်နဲ့ ပုလောကြား ပုလောမြို့နယ်အပိုင်ထဲမှာ”ဟု ပုလောမြို့နယ်မှစစ်ရေးသတင်းရင်းမြစ်တစ်ဦးက လူထုနွေဦးသို့ ပြောသည်။
စစ်ကောင်စီအနေဖြင့် ဒေသအသီးသီးတွင် စစ်ရေးရှုံးနိမ့်ပြီး စစ်အင်အား များ ပြုန်းတီးနေသည့် အခြေအနေတွင် ၂၀၂၄ ဖေဖော်ဝါရီလမှစ၍ စစ်မှုမထမ်းမနေရ ဥပဒေကို ပြဌာန်း၍ လူငယ်များကို အဓမ္မစုဆောင်းပြီး စစ်သင်တန်းပေး၍ ရှေ့တန်းပို့နေသလို နိုင်ငံတဝန်း ပေါ်တာဆွဲမှုကိုလည်းယခုလပိုင်းပိုလုပ်လာသည်။ထိုအပြင် အသက် ၃၅ နှစ်မှ ၆၅ နှစ်အရွယ်အထိ အမျိုးသားများကိုပါ ပြည်သူ့လုံခြုံရေးခေါင်းစဥ်ဖြင့် စစ်မှုထမ်းခိုင်းရန် စစ်ကောင်စီက ကြံစည်နေသည်။
စစ်သားသစ်အဖြစ်အဓမ္မစုဆောင်းပြီးစစ်သင်တန်း ရက်တိုသင်တန်းပေးကာရှေ့တန်းစေလွှတ်ခံရသောစစ်သားသစ်များ ရခိုင်ပြည်နယ် သံတွဲ ၊မောင်တောမြို့နယ်တိုက်ပွဲများအပါအဝင် နိုင်ငံတစ်ဝန်းတိုက်ပွဲများ၌ တွေ့ရများလာပြီး သေဆုံးမှုများနေကြောင်းတော်လှန်ရေး အင်အားစုများကပြောသည်။
