ဇေအောင်/People’s Spring
မန္တလေးတိုင်း၊ ရမည်းသင်းမြို့နယ်၊ သပြေပင်ကျေးရွာတွင် ရုပ်အလောင်း ၃၀ကျော်တွေ့ရှိထားကာ စာရင်းအရ ၄၀ဦးခန့် ပျောက်ဆုံးနေပြီး သေဆုံးသူအရေအတွက် များပြားကြောင်း ဒေသခံများက ပြောသည်။
စက်တင်ဘာ ၁၁ရက်ကတည်းက မိုးရွာသွန်းမှုများပြားခြင်း၊ မြေပြိုခြင်းများကြောင့် ရမည်းသင်းမြို့နယ်၊ သပြေပင်ကျေးရွာ၌ ရုပ်အလောင်းအများအပြား တွေ့ရှိထားကြောင်း၊ ထို့အပြင်
Public Service Announcement
ဝါးဖြူတောင်အောက်ရွာ၊ ချောင်းဖျားရွာ၊ ကြွက်တောရွာနှင့် ကန်သာအေးကျေးရွာတို့မှ ပြည်သူများလည်း သေဆုံးပျောက်ဆုံးမှုများရှိနေကြောင်း ကူညီကယ်ဆယ်ရေးလုပ်ကိုင်နေသူများက ပြောသည်။
” ဒီနေ့အထိ သေဆုံးနဲ့ ပျောက်ဆုံး ၇၅ဦး စာရင်းရရှိထားတယ်။ ၃၀လောက်သေဆုံးပြီး ၄၀ ကျော်ပျောက်ဆုံးနေတယ်။ အခြေအနေအရ ဘယ်လိုမှအတိအကျမထွက်သေးဘူး။ မသိနိုင်သေးဘူး။ တောင်ပေါ်ကို တက်ဖို့လည်း လမ်းကြောကပြတ်နေတယ်။ တက်လို့မရဘူးဖြစ်နေတယ်။”ဟု ကူညီကယ်ဆယ်ရေးလုပ်ကိုင်နေသူတစ်ဦးက ပြောသည်။
ထို့အပြင် တောင်ပေါ်ကျေးရွာများတွင် ရွှေလုပ်ကွက်အများအပြားရှိပြီး ယင်းလုပ်ကွက်များ၌ နေထိုင်သည့် စာရင်းမပေါက်သောကျေးရွာအများအပြားလည်းရှိနေကြောင်း၊ အဆိုပါကျေးရွာများမှာလည်း ရွာလုံးကျွတ် မြေအောက်ရောက်သွား၍ သေဆုံးသူ များပြားကြောင်း ဒေသခံများက ပြောသည်။
“အလောင်းတွေကလည်း မကောက်ရသေးဘူး။ ပုပ်နေကုန်ပြီ။ ဒီနေ့နဲ့ဆို လေးညအိပ်ငါးရက်ရှိပြီ။ ၂၀ကျော်လောက် အလောင်းတွေကတွေ့တယ်။ ဖော်ရဦးမှာ။ ဒိုက်တွေအောက်တွေမှာလေ။ သပြေပင်ကတစ်ရွာလုံးပဲ။ တောင်ဘက်မှာလည်းရွာတွေကရှိသေးတယ်။”ဟု ရမည်းသင်း ဒေသခံတစ်ဦးက ပြောသည်။
သပြေပင်ကျေးရွာသည် ရွာ၏ ၉၀ရာခိုင်နှုန်းခန့် ရေအောက်ရောက်ခဲ့ပြီး လက်ရှိစာရင်းအရ
သေဆုံးသူ ဦးရေ ၃၀ခန့်နှင့်ပျောက်ဆုံး ၅၀ဦးခန့်ရှိနေကြောင်း၊ ထို့အပြင် ကားအစီးရေ ၂၇စီး ရေထဲမျောပါခဲ့ကြောင်း သွားရောက်ကူညီခဲ့သူ ကိုခိုင်ကြီးဆိုသူက လူမှုကွန်ရက်၌ ရေးသားသည်။
စစ်ကောင်စီ၏ ဝါဒဖြန့်တယ်လီဂရန်ချန်နယ်များတွင်လည်း ရမည်းသင်းမြို့နယ် ရေကြီးမှုတွင် စက်တင်ဘာလ ၁၁ရက်က ၁၀ဦးသေဆုံးပြီး စက်တင်ဘာလ ၁၂ရက်တွင် မြင်းနားရွာမှ ၇ ဦး၊ ကျီးနီကန်ရွာမှ ၂၈ဦး၊ တူးကုန်းရွာမှ သုံးဦး၊ သပြေပင်ရွာမှ ၈၀ဦး၊ ချောင်းဖျားရွာမှ ၁၀၀ဦး သေဆုံးပြီး စုစုပေါင်းသေဆုံးသူ ၂၂၈ဦး ရှိကြောင်း ရေးသားနေသည်။
ထို့အပြင် ရွာလုံးကျွတ် ရေထဲပါသွားသော ဝါးဖြူတောင် အထက်ရွာ၊ ဝါးဖြူတောင် အောက်ရွာနှင့် ရွှေတောမိုင်းတို့၏ သေဆုံးမှုမသိရသေး၍ သေဆုံးသူ အရေအတွက် မြင့်တက်လာနိုင်သည်ဟုလည်း ရေးသားနေကြသည်။
စစ်ကောင်စီလက်အောက်ခံ မီးသတ်ဌာနကလည်း ရမည်းသင်းနယ်၌ ရေဘေးကြောင့် သေဆုံးသူ ၁၇ ဦးရုပ်အလောင်းများ ဆယ်ယူနိုင်ခဲ့ကြောင်း သတင်းထုတ်ပြန်ထားသည်။
ယခုအခါ လမ်းပန်းဆက်သွယ်ရေးများပြတ်တောက်နေပြီး အင်တာနက်လိုင်းနှင့် ဖုန်းလိုင်းများပါ ဆိုးရွားနေကြောင်း ဒေသခံများက ပြောသည်။
