အမြန်လမ်းတွင် ရမည်းသင်းရေဘေးအလှူပြန်လာသည့် သံဃာတော်များ​၏ ကားတိမ်းမှောက်

ဇေအောင်/People’s Spring

ရန်ကုန် – မန္တလေးအမြန်လမ်းတွင် ရမည်းသင်းရေဘေးလှူဒါန်းပြီး ပြန်လာသည့်သံဃာတော်များ၏ ကားတစ်စီး တိမ်းမှောက်ခဲ့ရာ ကားပေါ်ပါ သံဃာတော်များ ထိခိုက်ဒဏ်ရာများရရှိခဲ့ကြောင်း သတင်းရရှိသည်။

ယမန်နေ့ (စက်တင်ဘာ ၁၉ရက်) နေ့လယ် ၁၂ နာရီခွဲခန့်က အမြန်လမ်းမကြီး၊ နေပြည်တော်-ရန်ကုန်လမ်းပိုင်း မိုင်တိုင် ၁၄၉/၇အနီးတွင် ရန်ကုန်မြို့သို့ မောင်းနှင်လာသည့် သံဃာတော်များလိုက်ပါလာသည့် ကားတစ်စီး တိမ်းမှောက်ခဲ့ကြောင်း ကယ်ဆယ်ရေးသမားများက ပြောသည်။

Public Service Announcement

ကားပေါ်၌ ရန်ကုန်တိုင်း၊ မှော်ဘီမြို့၊ ပန်းတစ်ပွင့်တောင်ဗုဒ္ဓတက္ကသိုလ်မှ သံဃာတော် ၉ ပါး လိုက်ပါလာပြီး ရမည်းသင်းမြို့နယ်မှ ရေဘေးသင့်ပြည်သူများအား လှူဒါန်းပြီးပြန်လာရာမှ ကားဘီးပေါက်ကာ တိမ်းမှောက်ခဲ့ခြင်းဖြစ်ကြောင်း ယင်းတက္ကသိုလ်မှ တာဝန်ရှိသူများက ပြောသည်။

“သိထားတာကတော့ ၇ ပါးဒဏ်ရာရတယ်။ ဟိုလိုအသက်အန္တရာယ်တော့ မရှိကြဘူးလို့ သိထားပါတယ်။”ဟု ပရဟိတကယ်ဆယ်ရေးသမားတစ်ဦးက ပြောသည်။

သံဃာတော်များမှာ စိုးရိမ်ရသည့်အခြေအနေမရှိတော့ကြောင်း ပန်းတစ်ပွင့်တောင်ဗုဒ္ဓတက္ကသိုလ်မှ တာဝန်ရှိသူများက ပြောသည်။

တိုင်ဖွန်းမုန်တိုင်းယာဂိ၏ နောက်ဆက်တွဲ မိုးသည်းထန်စွာရွာသွန်းမှုကြောင့် မြန်မာနိုင်ငံအနှံ့အပြားတွင် ရေကြီးရေလျှံခြင်းများနှင့် ပျက်စီးဆုံးရှုံးမှုများ ဖြစ်ပေါ်ခဲ့ရာ ရေကြီးခြင်းကြောင့် နေပြည်တော်၊ ပဲခူး၊ ကယား၊ ကရင်၊ မကွေး၊ မန္တလေး၊ မွန်၊ ရှမ်း အရှေ့ပိုင်းနှင့် တောင်ပိုင်းတို့ အပါအဝင် တိုင်းဒေသကြီးနှင့် ပြည်နယ် ကိုးခုရှိ ၅၉ မြို့နယ် ကို ထိခိုက်ခဲ့ကြောင်း၊ နိုင်ငံတစ်ဝန်း ရေဘေးသင့်သူ ခန့်မှန်းခြေ ၆၃၁,၀၀၀ ဦးခန့် ရှိကာ ရာနှင့်ချီ၍ သေဆုံးမှုများရှိခဲ့ပြီး အများအပြား ပျောက်ဆုံးလျက်ရှိကြောင်းကုလသမဂ္ဂလူသား ချင်းစာနာမှုဆိုင်ရာညှိနှိုင်းရေးရုံး (UNOCHA)က စက်တင်ဘာ ၁၆ ရက်တွင် ထုတ်ပြန်ထားသည်။