ဒီဇင်ဘာ ၂၃၊ ၂၀၂၅။ မေရီ/People’s Spring
မန္တလေးတိုင်း၊ ရမည်းသင်းမြို့နယ်မှာ ဆီပုံးတွေတင်လာတဲ့ကားကို ဆိုင်ကယ်က ဝင်တိုက်မိလို့ မီးလောင်ပြီး ကိုယ်ဝန်ဆောင်အမျိုးသမီးတစ်ဦးအပါအဝင် ပြည်သူ ၃ဦး သေဆုံးခဲ့ပါတယ်။
ဒီဇင်ဘာ ၂၁ ရက် ညနေ ၄ နာရီကျော်က ရမည်းသင်းမြို့နယ်၊ စံပြသိမ်ကုန်းရွာ၊ ကြက်ရှာလမ်းခွဲအနီးမှာ ဆီပုံးတွေနဲ့ ကုန်တွေတင်လာတဲ့ကားကို ဆိုင်ကယ်တစ်စီးက ဝင်တိုက်မိခဲ့ကြောင်း၊ အဲဒီလို ဝင်တိုက်မိရာကနေ ဆီပုံးတွေပေါက်ကာ မီးလောင်ကျွမ်းမှုဖြစ်ပွားပြီး ဆိုင်ကယ်ပေါ်က ဇနီးမောင်နှံနဲ့ ကားပေါ်က အမျိုးသားတစ်ဦးတို့ သေဆုံးခဲ့ကြောင်း ဒေသခံများက ပြောပါတယ်။
“ ရှေ့ကကားကို နောက်ကဆိုင်ကယ်သမားက ဝင်တိုက်တာ။ ကားမှာဆီပုံးတွေရော ကုန်အပြည့်နဲ့ဆီပုံးတွေပြုတ်ကျပြီး ကားကမီးအရင်လောင်တာ။ ချောင်းထဲကျတဲ့တစ်ယောက်က မနေ့က ညနေကမှ ဆုံးသွားပါတယ်” လို့ ဒေသခံတစ်ဦးက ပြောပါတယ်။
Public Service Announcement
ကားဟာ အလှူခံဌာနကို အလှူငွေထည့်ဖို့ ရပ်ရာကနေ နောက်ကဆိုင်ကယ်က ဝင်တိုက်မိခဲ့တာဖြစ်ကြောင်း သိရပါတယ်။
ဆိုင်ကယ်ပေါ်က လင်မယားအနက် ဇနီးဖြစ်သူမှာ ကိုယ်ဝန်ဆောင်သည်ဖြစ်ပြီး ရမည်းသင်းမြို့ ရွာတန်းအုတ်ဖိုအနောက်ရွာမှာ နေထိုင်ကာ ရွှေမြင်တင်ဘုရားပွဲသွားရာကနေ တိုက်မိခဲ့ခြင်းဖြစ်ကြောင်း ဒေသခံများက ပြောပါတယ်။
မီးလောင်ကျွမ်းမှုဖြစ်ဖြစ်ချင်း ဘေးက ပြည်သူတွေက ဝိုင်းဝန်းငြှိမ်းသတ်ခဲ့ကြပေမဲ့ အခြားအကူအညီတွေ ချက်ချင်းရောက်မလာနိုင်ကြတာကြောင့် ဆုံးရှုံးမှူကြီးမားခဲ့ခြင်းဖြစ်ကြောင်း ဒေသခံတွေက ပြောပါတယ်။
