ဟန်နွေ/People’s Spring
ကရင်အမျိုးသားအစည်းအရုံး(KNU) ညောင်လေးပင်ခရိုင် ကျောက်ကြီးမြို့နယ်(လယ်ဒိုမြို့နယ်)တွင် စစ်ကောင်စီတပ်၏ ဒရုန်းဖြင့် ဗုံးကြဲ၍ အရပ်သား ပြည်သူ ၃ဦး ဒဏ်ရာရရှိခဲ့ကြောင်း KNUဗဟိုက ယနေ့ သတင်းထုတ်ပြန်သည်။
စက်တင်ဘာ ၁၃ရက် ညနေပိုင်းတွင် စစ်ကောင်စီတပ်သည် ကျောက်တံခါးဘောလုံးကွင်းမှ ဖျံတလင်း ကျေးရွာသို့ ဒရုန်းဖြင့် ဗုံးကြဲတိုက်ခိုက်ခဲ့ရာ (၅၅)နှစ်အရွယ် အမျိုးသမီးတစ်ဦး ဒဏ်ရာရရှိခဲ့ဟု ဖော်ပြသည်။
Public Service Announcement
ထို့ပြင် ဘုရားရှိခိုးကျောင်း တစ်ကျောင်း၊ နေအိမ် တစါလုံး၊ ဆိုင်ကယ် နှစ်စီးပျက်စီးခဲ့ဟု အသိပေးသည်။
စက်တင်ဘာ ၁၅ရက်တွင်လည်း စစ်ကောင်စီတပ်က အလိုင်ခင်ရွာမှ သဲဖြူရွာသစ်ကျေးရွာသို့ ဒရုန်းဖြင့် ဗုံးကြဲခဲ့ရာ မိခင်နှင့်ကလေးငယ်တို့ ဒဏ်ရာရရှိခဲ့သည်ဟု ဆိုသည်။ ဒဏ်ရာရရှိသည့် ကလေးငယ်မှာ (၈)လကျော်သာ ရှိသေးသည်ဟု KNU ဗဟိုက ထုတ်ပြန်သည်။
စစ်ကောင်စီတပ်သည် ညောင်လေးပင်ခရိုင် အပါအဝင် KNU အုပ်ချုပ်နယ်မြေများသို့ လေကြောင်း၊ လက်နက်ကြီးနှင့် ဒရုန်းပစ်ခတ်မှုများ မကြာခဏ ပြုလုပ်လျက်ရှိရာ အရပ်သားပြည်သူများစွာ ထိခိုက်သေဆုံးခဲ့ရသည်။
စစ်ကောင်စီတပ်သည် စက်တင်ဘာ ၁၃ရက်ကလည်း ညောင်လေးပင်ခရိုင် ရွှေကျင်မြို့နယ်သို့လည်း လက်နက်ကြီးများ ပစ်ခတ်ခဲ့ကြောင်း ဖော်ပြထားသည်။ ရွှေကျင်မြို့နယ် ဝေါ်ကေ့ရွာနှင့် ရှမ်းစုရွာအတွင်းသို့ လက်နက်ကြီးများ ပစ်ခတ်ခဲ့ကြောင်း ဖော်ပြထားသော်လည်း အရပ်သား ထိခိုက်မှု ရှိ၊မရှိ အခြေအနေ ဖော်ပြမထားပေ။
