မိထက်၊ဇေအောင်/People’s Spring
ရေကြီးနစ်မြုပ်နေသည့်ဒေသများမှ ရေဘေးရှောင်စခန်းများတွင် အစာအဆိပ်သင့်မှုများ ခပ်စိပ်စိပ်ဖြစ်လာပြီး ယနေ့(စက်တင်ဘာ ၁၈ရက်)ညနေတွင် ပဲခူးတိုင်း၊ အုတ်တွင်းမြို့နယ် ဝက်ဖြူကုန်ကျေးရွာ ရေဘေးရှောင်စခန်း၌ လူ ၄၀ဦး အစာအဆိပ်သင့်မှုဖြစ်ခဲ့သည်။
” ကြက်ဥဟင်းစားပြီး ဖြစ်တာပါ။ နေတဲ့နေရာကလည်း မိုးအေးတာနဲ့ ဆက်စပ်မယ်။ နည်းနည်းပြင်းထန်တဲ့သူ ၃၀ကို ဆေးရုံကိုပို့လိုက်တယ်။ ကျန်တဲ့သူတွေကိုလည်း ကျန်းမာရေးစစ်ဆေးမှုတွေလုပ်နေတယ်”ဟု ဝက်ဖြူကုန်ကျေးရွာဒေသခံတစ်ဦးက ပြောသည်။
Public Service Announcement
အဆိုပါ ရေဘေးရှောင်စခန်းမှ ကလေးငယ်နှင့် သက်ကြီးတွေကိုများ အစာအဆိပ်သင့်ခြင်းဖြစ်ပြီး တောင်ငူဆေးရုံတွင် ကုသမှုခံယူနေရကြောင်း သတင်းရရှိသည်။
နေပြည်တော်၊ တပ်ကုန်းမြို့နယ်၊ ချောင်းခြားကျေးရွာတွင်လည်း စက်တင်ဘာ ၁၇ ရက် နံနက်က ရေဘေးကယ်စခန်း၌ လူ ၁၁၅ဦး အစာအဆိပ်သင့်မှုဖြစ်ခဲ့သည်။
ထို့အပြင် နေပြည်တော်၊ တပ်ကုန်းမြို့နယ်၊ ကြက်သွန်ခင်းအုပ်စု၊ ချောင်းကြားကျေးရွာ၊ ကယ်ဆယ်ရေးစခန်းတွင် လာလှူသည့်ဒံပေါက်ထုပ်များ စားသုံးမိ၍ ရေဘေးသင့်ပြည်သူ ၁၀၀ကျော် အစာအဆိပ်သင့်မှုဖြစ်ပွားခဲ့ကြောင်း သတင်းရရှိသည်။
ရေကြီးနစ်မြုပ်မှု ဖြစ်ပွားခဲ့သည့် တပ်ကုန်းမြို့နယ်၊ ချောင်းကြားကျေးရွာ ကယ်ဆယ်ရေးစခန်းတွင် ယမန်နေ့ (စက်တင်ဘာ ၁၇ ရက်) ညနေ ၆ နာရီခန့်က အလှူရှင်များလာသည့် ဒံပေါက်ထုပ်များ စားမိ၍ ရေဘေးသင့်ပြည်သူ ၁၀၀ကျော် အစာအဆိပ်သင့်မှုဖြစ်ပွားခဲ့ကြောင်း ဒေသခံများက ပြောသည်။
ရေဘေးသင့်ပြည်သူများမှာ အော့အန်ခြင်း၊ ဝမ်းပျက်ဝမ်း လျှောခြင်းများ ဖြစ်ပွားခဲ့၍ ပျဉ်းမနားမြို့၊ ကုတင် ၁၀၀ ဆေးရုံသို့ ပို့ဆောင်ပေးခဲ့ကြောင်း အကြင်နာကုသိုလ်ပြု လူမှုအထောက်အကူအဖွဲ့၏ တာဝန်ရှိသူက ပြောသည်။
” ဒံပေါက်စားမိသွားတဲ့သူတော်တော်များများ အန်တာတို့ ဝမ်းသွားတာတို့ ဖြစ်ကုန်တာပေါ့။ ကလေးတွေကအစပေါ့။ နည်းနည်းစိုးရိမ်ရတဲ့ ကလေး ငါးဦးခြောက်ဦးကိုတော့ နေပြည်တော်ကုတင်၅၀၀ ကို ရွှေ့ထားတယ်။”ဟု အကြင်နာကု သိုလ်ပြု လူမှုအထောက်အကူအဖွဲ့၏ တာဝန်ရှိသူက ပြောသည်။
ဒံပေါက်မစားမီကလည်း ထိုကယ်ဆယ်ရေးစခန်း၌ သောက်သုံးရေပြတ်လပ်၍ ရေဘေးဒုက္ခသည်များမှာ နီးစပ်ရာရေကိုသာ သောက်သုံးခဲ့ရကြောင်း ကယ်ဆယ်ရေးသမားများက ပြောသည်။ အဆိုပါ အစာအဆိပ်သင့်သူများကို ဆေးရုံသို့တင်ပို့ကုသခဲ့ပြီးနောက် ပြန်လည်သက်သာလာပြီဟု သတင်းရရှိသည်။
ရေဘေးသင့်ပြည်သူများအား ဝေငှမည့်ထမင်းထုပ်များအား ဆိုင်အချို့မှ မှာယူသူများလည်းရှိပြီး ထမင်းများမနပ်ခြင်း၊ အချိန်နောက်ကျ၍ ထမင်းထုပ်များ သိုးသွားခြင်းများလည်း ဖြစ်ပေါ်နေကြောင်း လူမှုကူညီရေးသမားအချို့က ပြောသည်။
တိုင်ဖွန်းမုန်တိုင်းယာဂိ၏ နောက်ဆက်တွဲ မိုးသည်းထန်စွာရွာသွန်းမှုကြောင့် မြန်မာနိုင်ငံ အနှံ့အပြားတွင် ရေကြီးရေလျှံခြင်းများနှင့် ပျက်စီးဆုံးရှုံးမှုများ ဖြစ်ပေါ်ခဲ့ရာ ရေကြီးခြင်းကြောင့် နေပြည်တော်၊ ပဲခူး၊ ကယား၊ ကရင်၊ မကွေး၊ မန္တလေး၊ မွန်၊ ရှမ်း အရှေ့ပိုင်းနှင့် တောင်ပိုင်းတို့ အပါအဝင် တိုင်းဒေသကြီးနှင့် ပြည်နယ် ကိုးခုရှိ ၅၉ မြို့နယ် ကို ထိခိုက်ခဲ့ကြောင်း၊ နိုင်ငံတစ်ဝန်း ရေဘေးသင့်သူ ခန့်မှန်းခြေ ၆၃၁,၀၀၀ ဦးခန့် ရှိကာ ရာနှင့်ချီ၍ သေဆုံးမှုများရှိခဲ့ပြီး အများအပြား ပျောက်ဆုံးလျက်ရှိကြောင်းကုလသမဂ္ဂလူသား ချင်းစာနာမှုဆိုင်ရာညှိနှိုင်းရေးရုံး (UNOCHA)က စက်တင်ဘာ ၁၆ရက်တွင် ထုတ်ပြန်ထားသည်။
