ရွှေကျင်၊ ကျောက်ကြီးနှင့် မုန်းမြို့နယ်ကိုစစ်ကောင်စီ လက်နက်ကြီးဖြင့် ပစ်ခတ်၊အရပ်သား ထိခိုက်မှု၊ နေအိမ်ပျက်စီးမှုရှိ

ဟန်နွေ/People’s Spring

ကရင်အမျိုးသားအစည်းအရုံး(KNU) အုပ်ချုပ်နယ်မြေ ညောင်လေးပင်ခရိုင် ရွှေကျင်၊ ကျောက်ကြီးနှင့် မုန်းမြို့နယ်အတွင်းရှိ ပြည်သူလူထု နေထိုင်ရာနေရာများသို့ စစ်ကောင်စီက လက်နက်ကြီးများဖြင့် ပစ်ခတ်မှုများ ဆက်လက်လုပ်ဆောင်ခဲ့ကြောင်း KNU ဗဟိုက ယမန်နေ့တွင် ထုတ်ပြန်သည်။

စက်တင်ဘာ ၃၀ရက်က ပိန်းဇလုပ်အခြေစိုက် ခလရ-၂၆၄ တပ်ရင်းမှ ၁၂၀ မမ လက်နက်ကြီး (၂)လုံးပစ်ခတ်ခဲ့ရာ ကျောက်ကြီး(လယ်ဒို) မြို့နယ် ခင်ကန့်လန့်ကျေးရွာအတွင်း ကျရောက် ပေါက်ကွဲခဲ့ပြီး ကျေးရွာဒေသခံတစ်ဦး ထိခိုက်ဒဏ်ရာရရှိကာ နေအိမ်ပျက်စီးမှုလည်းရှိခဲ့သည်ဟု ဖော်ပြသည်။

Public Service Announcement

ထို့ပြင် စက်တင်ဘာ ၂၈ရက်ကလည်း ရွှေကျင် (ဆောထိ)မြို့နယ်သို့ စစ်ကောင်စီ၏ ခလရ-၂၆၄ တပ်ရင်းမှ ၁၂၀မမ လက်နက်ကြီး (၂)လုံး ပစ်ခတ်ခဲ့ရာ ဂွေးကုန်းကျေးရွာအနီးတွင်ကျရောက် ပေါက်ကွဲခဲ့ဟု ထုတ်ပြန်သည်။ ယင်းနေ့ညပိုင်းတွင် လက်နက်ကြီး (၇)လုံး ထပ်မံပစ်ခတ်ခဲ့ရာ လက်နက်ကြီး (၂)လုံးမှာ အင်းပရိတ်ကျေးရွာအနီး ကျရောက်ပေါက်ကွဲခဲ့ပြီး ကျန် (၅)လုံးမှာ လိန်ပင်ဝိုင်းကျေးရွာ စာသင်ကျောင်းဘက် ကျရောက်ပေါက်ကွဲခဲ့သည်ဟု ဆိုသည်။

စက်တင်ဘာ ၂၉ရက်တွင်လည်း လက်နက်ကြီး ဆက်လက်ပစ်ခတ်ခဲ့၍ ချိုအေးကျေးရွာအတွင်းကျရောက်ပေါက်ကွဲခဲ့ကြောင်း ဖော်ပြသည်။

မုန်း(မူး)မြို့နယ်အတွင်းလည်း စစ်ကောင်စီက စက်တင်ဘာ ၂၇ရက်တွင် လက်နက်ကြီးဖြင့် ပစ်ခတ်ခဲ့ရာ အင်ကွင်းကျေးရွာအနီး ကျရောက် ပေါက်ကွဲခဲ့သည်ဟု ဆိုသည်။

စစ်ကောင်စီတပ်သည် KNU အုပ်ချုပ်နယ်မြေအတွင်းရှိ ကျေးရွာများသို့ လက်နက်ကြီး ၊ လေကြောင်း၊ ဒရုန်းတိုက်ခိုက်မှုများ မကြာခဏ ပြုလုပ်ခဲ့၍ အရပ်သား ထိခိုက်သေဆုံးမှုများ မကြာခဏ ဖြစ်ပေါ်လျက်ရှိသည်။ ဒေသခံများသည် စစ်ဘေးအပြင် စက်တင်ဘာအတွင်း ရေဘေးကိုလည်း ကြုံခဲ့ကြရပြီး အရေးပေါ် အကူအညီများ လိုအပ်လျက်ရှိဟု KNUက အသိပေးထားသည်။