ကျောက်ကြီးမြို့နယ်တွင် စစ်ကောင်စီ လက်နက်ကြီးကြောင့် အရပ်သားတစ်ဦး ထပ်မံသေဆုံး

ထားမြတ်/People’s Spring

ကရင်အမျိုးသားအစည်းအရုံး(KNU) တပ်မဟာ(၃) ညောင်လေးပင်ခရိုင်၊ ကျောက်ကြီးမြို့နယ်တွင် စစ်ကောင်စီတပ်က လက်နက်ကြီးဖြင့် ပစ်ခတ်၍ အရပ်သားတစ်ဦး သေဆုံးခဲ့ကြောင်း KNUဗဟိုက ယနေ့(နိုဝင်ဘာ ၈ရက်) သတင်းထုတ်ပြန်သည်။

နိုဝင်ဘာ ၆ရက် နံနက်ပိုင်းက စစ်ကောင်စီ၏ ခလရ(၂၆၄) တပ်ရင်းမှ (၁၂၀)မမ လက်နက်ကြီး ငါးလုံး ပစ်ခတ်ခဲ့ရာ ငဖယ်အင်းကျေးရွာအတွင်း ကျရောက်ပေါက်ကွဲခဲ့ပြီး (၄၇)နှစ်အရွယ် အမျိုးသား တစ်ဦးသေဆုံးကာ အမျိုးသားတစ်ဦး ဒဏ်ရာရရှိခဲ့သည်။

ထို့ပြင် ခရစ်ယာန်ဘုရားရှိခိုးကျောင်း တစ်ကျောင်းထိခိုက်ပျက်စီးခဲ့ဟု အသိပေးသည်။

Public Service Announcement

စစ်ကောင်စီတပ်သည် ကျောက်ကြီးမြို့နယ်တွင် KNU အုပ်နယ်နယ်မြေများအတွင်းအရပ်သား ပြည်သူလူထု နေထိုင်ရာများသို့ လက်နက်ကြီးများ ပစ်ခတ်ခြင်း၊ လေကြောင်းတိုက်ခိုက်ခြင်းများ မကြာခဏ ပြုလုပ်လျက်ရှိရာ အရပ်သားသေဆုံးထိခိုက်မှုများဆက်တိုက်ဖြစ်ပေါ်လျက်ရှိသည်။

ကျောက်ကြီးမြို့နယ်တွင် ယခု နိုဝင်ဘာလဆန်းပိုင်း၌ စစ်ကောင်စီတပ် စစ်ကြောင်းထိုးဝင်ရောက်နေ၍ ဒေသတွင်း တော်လှန်ရေးတပ်ဖွဲ့များနှင့် တိုက်ပွဲဖြစ်ပွားမှုရှိခဲ့သည်။

နိုဝင်ဘာ ၁ရက်က ကျောက်ကြီးမြို့နယ် ရွာကြီးအင်းကျေးရွာတွင် စစ်ကောင်စီတပ် စစ်ကြောင်းအား PDFနှင့် KNLA ပါဝင်သည့် တော်လှန်ရေး ပူးပေါင်းတပ်က တိုက်ခိုက်ခဲ့ရာ စစ်ကောင်စီတပ်က ၁၀ဦးသေဆုံးကာ ထိခိုက်ဒဏ်ရာရသူများစွာရှိခဲ့သည်ဟု PDFတောင်ပိုင်း စစ်ဒေသ ကအသိပေးထုတ်ပြန်ထားသည်။