▪︎နိုင်ငံတဝန်းတိုက်ပွဲများကြောင့်စိုက်ပျိုးမြေလျော့နည်းပြီး ရေကြီးရေလျှံမှုကြောင့်သီးနှံများပျက်စီးခဲ့သည့်ကြားမှ ဆန်ပြည်ပသို့စံချိန်တင်ရောင်းချခဲ့ခြင်းဖြစ်
နိုင်ငံခြားငွေလိုအပ်နေသည့် စစ်ကောင်စီက ပြည်ပသို့ ဆန်တင်ပို့မှုကို သလောက်တင်ပို့နေရာအောက်တိုဘာလအတွင်း စံချိန်တင်တင်ပို့ခဲ့ကြောင်း ဆန်စပါးအသင်းချုပ်ကထုတ်ပြန်သည့် အချက်အလက်များတွင်ဖော်ပြထားသည်။
စစ်ကောင်စီက အောက်တိုဘာလအတွင်း၌ ပြည်ပသို့ ဆန်တန်ချိန် ၄၂၀,၀၀၀ကျော်တင်ပို့ခဲ့ပြီး ယခုဘဏ္ဍာနှစ် ခုနှစ်လအတွင်း ဆန်တင်ပို့မှု အများဆုံးဖြစ်လာသည်။ ဆန်တန်ချိန် လေးသိန်းနှစ်သောင်းတင်ပို့ရာမှအမေရိကန် ဒေါ်လာ သန်း ၁၉၀ ခန့်ရရှိခဲ့သည်ဟုလည်းဆိုသည်။
ပြည်တွင်း၌ ဆန်ကုန်သည်များ၊ဆန်ရောင်းချသူများကို ဆန်းတင်ရောင်းသည်ဆိုကာဖမ်းဆီးထောင်ချပြီး ဆန်ရောင်းချမှုကို တင်းကြပ်ထားသော်လည်း စစ်ကောင်စီကိုယ်တိုင်ကမူ နိုင်ငံခြားငွေရရန် ပြည်ပသို့ ဆန်တင်ပို့ရောင်းချမှုကိုမူ တိုး၍ပြုလုပ်နေခြင်းဖြစ်သည်။ထိုအပြင် တိုက်ပွဲများကြောင့် ဒေသအချို့တွင် စပါးမစိုက်နိုင်သလို ၊မိုးကြီး ရေလွှမ်းမိုးမှုကြောင့် စပါးအပါအဝင်စိုက်ပျိုးသီးနှံများစွာပျက်စီးနေသည့်ကြားမှ ဆန်တင်ပို့မှုကို ပိုလုပ်နေခြင်းဖြစ်သည်။
Public Service Announcement
ပြီးခဲ့သည့် စက်တင်ဘာလတွင် ပြည်ပကို တင်ပို့မှုက တန် ၂၁၀,၀၀၀ ကျော်သာရှိခဲ့၍ အောက်တိုဘာလဆန်တင်ပို့မှုမှ နှစ်ဆတိုးခဲ့ခြင်းဖြစ်သည်။ ယခုဘဏ္ဍာနှစ်(၂၀၂၄-၂၀၂၅ )ပထမ ခြောက်လ ဖြစ်သော ဧပြီလမှ စက်တင်ဘာအထိ တစ်လလျင်တန်ချိန် နှစ်သိန်းဝန်းကျင်သာတင်ပို့ခဲ့ရာမှ အောက်တိုဘာလတွင် နှစ်ဆ တိုးပို့ခဲ့ခြင်းဖြစ်သည်။
စစ်ကောင်စီက ပုဂ္ဂလိက ကုမ္ပဏီ ၆၀ ခန့်ကို အသုံးပြု ယခုဘဏ္ဍာနှစ် ခုနှစ်လအတွင်း ( ၂၀၂၄ ဧပြီ ၁ ရက်မှ အောက်တိုဘာ ၃၁ရက်အထိ) ပြည်ပကို ဆန်တန်ချိန်စုစုပေါင်း ၁ဒသမ၃ သန်းကျော်တင်ပို့ပြီး ဒေါ်လာ သန်း ၆၅၀ခန့်ရရှိထားသည်။
“ပြည်တွင်းမှာ စိုက်ပျိုးထုတ်လုပ်မှု လျော့ကျနေချိန်မှာ ယခုလို ပြည်ပကို ဆန်တင်ပို့နေတာက ပြည်တွင်း စားနပ်ရိက္ခာဖူလုံမှုကို ထိခိုက်စေပါတယ်”ဟု စီးပွားရေးလုပ်ငန်းရှင်တစ်ဦးကပြောသည်။
စစ်ကောင်စီထံက ဆန်ဝယ်ယူသည့် နိုင်ငံများမှာ အင်ဒိုနီးရှား၊ဖိလစ်ပိုင်၊ တရုတ်၊ နိုင်ဂျာနှင့် ပေါ်တူဂီနိုင်ငံတို့ဖြစ်သည်။
စစ်ကောင်စီက ပြီးခဲ့သည့်၂၀၂၃-၂၀၂၄ ဘဏ္ဍာနှစ် တွင် ပြည်ပသို့ဆန်တန်ချိန် ၁ ဒသမ ၇ သန်းတင်ပို့ခဲ့ပြီး အမေရိကန် ဒေါ်လာ သန်း ၈၅၀ခန့်ရရှိခဲ့သည်။
