တာရာ/People’s Spring
မကွေးတိုင်းအတွင်းရှိ ပွင့်ဖြူမြို့နယ်နှင့် စေတုတ္တရာမြို့နယ်ကြားရှိ ကျေးရွာကို ၅ ရွာကို စစ်ကောင်စီတပ်က ယနေ့(နိုဝင်ဘာ ၂၈ ရက်)တွင် ရွာလုံးကျွတ်မီးရှို့ဖျက်ဆီးခဲ့ကြောင်း ဒေသခံများက ပြောသည်။
အင်အား ၂၀၀ခန့်ရှိသည့် စစ်ကောင်စီတပ်က ယနေ့နံနက်အစောပိုင်း ၈နာရီခန့်တွင် စေတုတ္တရာမြို့နယ်ရှိ ကျောက်ပုံ၊ခဲပစ်နှင့် ညောင်ကုန်းကျေးရွာတို့ကို မီးရှို့ခဲ့ပြီး ညနေ ၂ နာရီခန့်တွင် ပွင့်ဖြူမြို့နယ်ရှိ လယ်မနှင့်ကျွဲခြံကျေးရွာတို့ကို မီးရှို့ခဲ့ခြင်းဖြစ်သည်ဟု အဆိုပါရွာသားများက ပြောသည်။
“စေတုတ္တရာနဲ့ ပွင့်ဖြူ ဆင်လူးရွာက ပျူတွေပေါင်းပြီး မီးရှို့သွားတာပါ။ မီးခိုးလုံးတွေကို အဝေးကနေ မြင်နေရတယ်”ဟု ဒေသခံတစ်ဦးက ပြောသည်။
Public Service Announcement
စစ်ကောင်စီတပ် မီးရှို့မှုကြောင့် အဆိုပါဒေသရှိ ရွာသူ၊ရွာသား ၄၀၀၀ ကျော်မှာ ထွက်ပြေးတိမ်းရှောင်နေရသည်ဟုလည်း ဒေသခံများက ပြောသည်။
စစ်ကောင်စီတပ်သည် အဆိုပါ ကျေးရွာ ၅ ရွာမှ နေအိမ်အားလုံးကို မီးရှို့ဖျက်ဆီးခဲ့ခြင်းဟု ဒေသခံများက ပြောသည်။
စစ်ကောင်စီ၏ ကာကွယ်ရေးပစ္စည်းထုတ်လုပ်ရေးတပ် ကပစ- ၂၀၊ ခလရ (၂၅၅)နှင့် ဆင်လူးကျေးရွာမှ ပျူစောထီးများပါဝင်ကြောင်း ဒေသခံများကပြောသည်။
လက်ရှိတွင် စစ်ရေးတင်းမာမှုများကြောင့် ဒေသခံတော်လှန်ရေးတပ်များက ပုသိမ် – မုံရွာ ကားလမ်းပိုင်းအပါအဝင် ပွင့်ဖြူမြို့နယ်နှင့် စေတုတ္တရာမြို့နယ်ကို ချိတ်ဆက်ထားသည့် လမ်းများကို သွားလာခွင့်ပိတ်ထားသည်။
