အိမ်သွင်/People’s Spring
အာရက္ခတပ်တော်(AA) ထိန်းချုပ်ထားသည့်တောင်ကုတ်မြို့အနီးရှိ ကျေးရွာတရွာကို စစ်ကောင်စီကလေကြောင်းမှဗုံးကြဲ၍ စစ်ဘေးရှောင်နှစ်ဦးသေဆုံးပြီး ၁၉ဦး ဒဏ်ရာရရှိသွားကြောင်း ရခိုင်ဒေသစစ်ရေးသတင်းရင်းမြစ်ကပြောသည်။
တောင်ကုတ်မြို့နှင့် ၆ မိုင်ခန့်အကွာရှိ ခရိုင်ရွာကို စစ်ကောင်စီက ဒီဇင်ဘာလ ၁ရက်ည ၉နာရီခန့်တွင် ဗုံးကြဲခဲ့ခြင်းဖြစ်သည်။
“မြို့အနားမှာတိုက်ပွဲပြင်းထန်နေတော့ ရွာတွေဘက်မှာ စစ်ရှောင်နေရတာကို စစ်တပ်ကသိသိကြီးနဲ့ လေကြောင်းကနေပစ်တာ။ သေတာ၊ ဒဏ်ရာရတာတွေက အရပ်သားတွေ၊ အမျိုးသမီးတွေလည်းပါပါတယ်။ တိုက်လေယာဉ်တွေ ဆက်ပျံနေတယ်” ဟု တောင်ကုတ်မြို့ခံတဦးကပြောသည်။
Public Service Announcement
အဆိုပါလေကြောင်းတိုက်ခိုက်မှုကြောင့် အမျိုးသမီးတစ်ဦး၊ အမျိုးသားတစ်ဦးသေဆုံးပြီး ကလေးငယ်အချို့အပါအဝင် ၁၉ဦးဒဏ်ရာရရှိခဲ့သည်ဟု သိရသည်။
တောင်ကုတ်မြို့နယ်မှ စစ်ကောင်စီစခန်း၁၀ ခုကို တိုက်ခိုက်သိမ်းယူပြီးနောက် မြို့ကို ထိန်းချုပ်ထားသည်ဟု AAက နိုဝင်ဘာ ၂၉ ရက်သတင်းထုတ်ပြန်ထားသည်။ လက်ကျန်စခန်းသုံးခုဖြစ်သည့် စစ်ဆင်ရေးကွပ်ကဲမှုဌာနချုပ် စကခ (၅) တပ်မဌာနချုပ်နှင့် ခမရ (၃၄၆) နှင့် ခမရ (၅၄၄)ကို ဆက်လက်ထိုးစစ်ဆင်တိုက်ခိုက်နေသည်ဟုလည်းအသိပေးထားသည်။
စစ်ကောင်စီလေ ကြောင်းတိုက်ခိုက်မှုကြောင့် ထိခိုက်သေဆုံးသူများသည် မြို့ပေါ်တိုက်ပွဲများအတွင်း AAက မြို့ခံများကို ဘေးလွတ်ရာသို့ ပို့ဆောင်ထားသူများဖြစ်သည်။ မြို့သိမ်းတိုက်ပွဲတိုက်ခိုက်နေစဉ်ကလည်း AAက တောင်ကုတ်မြို့ကို လေကြောင်းမှတိုက်ခိုက်ရာ အရပ်သား ၅၀ဦးထက်မနည်း သေဆုံးခဲ့ကြောင်း ရခိုင်စစ်ရေးသတင်းရင်းမြစ်အချို့နှင့် ရခိုင်အခြေစိုက်သတင်းဌာနများက ဖော်ပြထားသည်။
စကခ (၅) တပ်မဌာနချုပ်နှင့် ခမရ (၃၄၆) နှင့် ခမရ (၅၄၄)ကို စခန်းသိမ်းတိုက်ပွဲများ ဆက်လက်ပြင်ထန်းနေပြီး ပုသိမ်နှင့် မကွေးလေဆိပ်မှတက်သည့်လေယာဉ်များဖြင့်စစ်ကောင်စီက လေကြောင်းတိုက်ခိုက်၍ ပစ်ကူပေးနေသည်။ လက်ကျန်တပ်ရင်းများ နှင့် ဌာနချုပ်ကို အပြီးသတ်သိမ်းပိုက်ရန် AA ကိုးစစ်ဆင်နေပြီးတိုက်ပွဲများပြင်းထန်နေသည်။
၂၀၂၄ ဇန်ဝါရီမှ အောက်တိုဘာအထိ ၁၀လအတွင်း စစ်ကောင်စီတပ်၏ လေကြောင်းတိုက်ခိုက်မှုကြောင့် နိုင်ငံတစ်ဝန်း အရပ်သား ၅၄၀ဦး သေဆုံးပြီး ရခိုင်ပြည်နယ်က ၁၅၉ ဦးဖြင့် အများဆုံးပါဝင်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)က နိုဝင်ဘာ ၆ ရက်တွင် ထုတ်ပြန်ထားသည်။
နိုဝင်ဘာ၂၇ ရက်ကလည်း AA ထိန်းချုပ်ထားသည့် ရခိုင်ပြည်နယ်တောင်ပိုင်း သံတွဲမြို့နယ်ကို စစ်ကောင်စီက လေကြောင်းတိုက်ခိုက်ရာ ဒေသခံ ၈ ဦးထက်မနည်း ဒဏ်ရာရရှိခဲ့သည်။
