အိမ်သွင်/People’s Spring
ကချင်ပြည်နယ်၊ ကန်ပိုက်တီမြို့နယ်မှKIA ၏ထိုးစစ်ကြောင့် တရုတ်နိုင်ငံဘက်သို့ပြေးထွက်ပြေးခဲ့ပြီး မူဆယ်ပြန်ပို့ခံရသော စစ်ကောင်စီတပ်ဖွဲ့ဝင်သုံးရာကျော်သည် ဗန်းမော်မြို့တိုက်ပွဲသို့စစ်ကူအဖြစ်ပို့ဆောင်ခံလိုက်ရကြောင်း ရှမ်းပြည်နယ်မြောက်ပိုင်းသတင်းမြစ်များကပြောသည်။
ကချင်လွတ်လပ်ရေးတပ်မတော်(KIA)က ပြီးခဲ့သည့်နိုဝင်ဘာလတွင် ကချင်ပြည်နယ် ကန်ပိုက်တီမြို့ကို တိုက်ခိုက်သိမ်းပိုက်စဉ် စစ်ကောင်စီတပ်ဖွဲ့ဝင် ၃၀၂ဦးသည် တရုတ်နိုင်ငံဘက်သို့ပြေးသွားခဲ့သည်။ တရုတ်အစိုးရက စစ်ကောင်စီထံသို့ ရွှေလီမှတဆင့် မယ်ဆယ်မြို့သို့ နိုဝင်ဘာလ၂၃ရက်နေ့တွင် ကားများဖြင့်ပို့၍ ပြန်လွှဲပြောင်းပေးခဲ့သည်။
၎င်းတို့ကို မူဆယ်ခံစစ်အတွက် စစ်ကောင်စီကပြင်ဆင်ပြီး မူဆယ်မြို့အခြေစိုက် တပ်မ(၉၉)တွင်ကနဦး ထားခဲ့သည်ဟု ရှမ်းပြည်နယ်မြောက်ပိုင်း စစ်ရေးသတင်းမြစ်တစ်ဦးကပြောသည်။
Public Service Announcement
သို့သော် KIAက ဗန်းမော်မြို့သိမ်းတိုက်ပွဲကို ဒီဇင်ဘာလ၄ရက်နေ့တွင်စတင်တိုက်ခိုက်ပြီး တိုက်ပွဲများပြင်းထန်နေစဉ် တရုတ်ဘက်ပြေးခဲ့သောအဆိုပါစစ်သားများကို ဒီဇင်ဘာလ၂၂ရက်နေ့မှစ၍ စစ်ကောင်စီက ဗန်းမော်မြို့သို့ ပို့ဆောင်နေခြင်းဖြစ်သည်။
“တရုတ်ကိုပြေးသွားလို့ နယ်စပ်ကနေပြန်ပို့ခံရတဲ့ သူတွေ အကုန် ဗန်းမော်ကိုရောက်သွားပြီ။အစက မူဆယ်အတွက်ဆိုပြီး ထားတာ” ဟု ရှမ်းပြည်နယ်မြောက်ပိုင်းသတင်းရင်းမြစ်ကပြောသည်။
စစ်ကောင်စီသည် စစ်ကူများကို မူဆယ်မှဗန်းမော်သို့ ရဟတ်ယာဉ်များဖြင့် အကြိမ်ကြိမ်ပို့ဆောင်နေခြင်းဖြစ်သည်။
“၂၂ရက်နေ့က တစ်နေ့တည်း ငါးခေါက်သယ်တယ်။ အဲဒီနောက်ပိုင်း နေ့တိုင်းလာလာသယ်နေတာ။ တရုတ်က ပြန်ပို့တဲ့သုံးရာကျော် မူဆယ်မှာတစ်ယောက်မှမကျန်တော့ဘူး”ဟု မူဆယ်မြို့ခံတစ်ဦးကပြောသည်။
ဗန်းမော်မြို့သိမ်းတိုက်ပွဲသို့ စစ်တပ်က တပ်မ (၉၉) မှတပ်ရင်း ၂ရင်း ၊ တပ်မ (၈၈)မှတပ်ရင်း၂ ရင်းကို ရဟတ်ယာဥ်များဖြင့် ပို့ဆောင်ခဲ့ကြောင်း ကချင်စစ်ရေးရင်းမြစ် တဦးကပြောသည်။ ထိုသို့ပို့ရာတွင် လတ်တလောတိုက်ပွဲမဖြစ်တော့သော ရှမ်းမြောက်မှ စစ်သားများ ပါဝင်ကြောင်း ၎င်းကဆက်ပြောသည်။
မူဆယ်နှင့် ဗန်းမော်မြို့သည် နမ့်ခမ်း-မန့်ဝိန်းကြီး-မံစီလမ်းဖြင့် ကုန်းလမ်းဆက်သွယ်ရေးရှိသော်လည်း နမ့်ခမ်းမြို့ကို တအာင်းလွတ်မြောက်ရေးတပ်မတော်(TNLA)၊ မန့်ဝိန်းကြီးနှင့်မံစီမြို့ကို KIA က သိမ်းပိုက်ထိန်းချုပ်ထားပြီးဖြစ်သည်။ ထို့ကြောင့်စစ်ကောင်စီသည် ရဟတ်ယာဉ်ဖြင့်သာ စစ်ကူပို့နိုင်သည့်အခြေအနေဖြစ်သည်။
မူဆယ်မြို့မှစစ်ကူပို့ဆောင်ခံရသူများကို KIA က ပိတ်ဆို့တိုက်ခိုက်ရာ စစ်ကြောင်းအလိုက် အထိနာကြောင်း သတင်းများထွက်ပေါ်နေသည်။
KIA၏ ဗန်းမော်မြို့သိမ်းတိုက်ပွဲသည် ၂၆ရက်ရှိလာပြီဖြစ်ပြီး စစ်ကောင်စီ၏စခန်းအများအပြားကို သိမ်းပိုက်ထားပြီးဖြစ်သည်ဟု ကချင်စစ်ရေးသတင်းမြစ်အချို့ကဆိုသည်။
စစ်ကောင်စီသည် တပ်ဖွဲ့ဝင်အင်အားအလွန်နည်းနေပြီး မြောက်ပိုင်းမဟာမိတ်သုံးဖွဲ့ဖော်ဆောင်ခဲ့သည့် ၁၀၂၇ စစ်ဆင်ရေး၊ မန္တလေးတိုင်းနှင့်စစ်ကိုင်းတိုင်းမှ မြို့သိမ်းတိုက်ပွဲများ၊ ရခိုင်ပြည်နယ်တွင် အာရက္ခတပ်တော်(AA)၏မြို့သိမ်းတိုက်ပွဲများ၊ ချင်းပြည်နယ်မှမြို့သိမ်း တိုက်ပွဲများတွင် စစ်သုံ့ပန်း ရာထောင်ချီ၍ ဖမ်းဆီးခံနေရသည်။ စစ်ကောင်စီက စစ်မှုထမ်းဥပဒေကို အကြောင်းပြ၍ စစ်သားစုဆောင်းခဲ့သော်လည်း ထွက်ပြေးမှုများ၊ တိုက်ပွဲအတွင်းသေဆုံးမှုများနေသည်။
ဒီဇင်ဘာလ၂၇ရက်နေ့က ဧရာဝတီတိုင်းပုသိမ်မြို့တွင် စစ်မှုထမ်းသင်တန်းဆင်းသည်ကို စစ်ကောင်စီဒုတိယခေါင်းဆောင် တို့ဗိုလ်ချုပ်မှူးကြီးစိုးဝင်းနှင့် ကြည်း၊ရေ၊လေထိပ်ပိုင်းခေါင်းဆောင်များကိုယ်တိုင်လာရောက်၍ စစ်ကောင်စီအတွက်စစ်တိုက်ပေးရန်စည်းရုံးရေးဆင်းခဲ့သည်။
(KIA ၏ ကန်ပိုက်တီမြို့သိမ်းတိုက်ပွဲတွင်တရုတ်ထွက်ပြေးသောစစ်သားများကို တရုတ်စစ်တပ်က မူဆယ်သို့ ကားများဖြင့် ပြန်ပို့စဥ်။ဓါတ်ပုံ-File Photo ၊CJ)
