People’s Spring
အာဏာသိမ်းစစ်ကောင်စီက ဒီနေ့ လွတ်လပ်ရေးနေ့မှာ လွတ်ငြိမ်းပေးရာမှာ ရန်ကုန်မြို့ အင်းစိန်ထောင်ကနေ အကျဉ်းသားအချို့ ပြန်လည်လွတ်မြောက်လာပါတယ်။
မွန်းလွဲပိုင်း ၁၂ နာရီ ခွဲဝန်းကျင်မှာ အကျဉ်းသားတွေကို စတင်လွှတ်ပေးတာပါ။
လွတ်ငြိမ်းခွင့်ရတဲ့အကျဉ်းသူ၊ အကျဉ်းသားတွေကို သယ်ဆောင်လာတဲ့ YBS ကားတွေ ထောင်ဝန်းထဲကနေ တစ်စီးပြီး တစ်စီးထွက်လာတာတွေ့ရပြီး ထောင်ပြင်ပမှာ မိသားစုတွေ၊ သက်ဆိုင်သူတွေကလည်း မျှော်လင့်တကြီးလာရောက်စောင့်ဆိုင်းနေကြတာတွေ့ရပါတယ်။
Public Service Announcement
ဒီနေ့ အင်းစိန်ထောင်ကနေ လွတ်ပေးတဲ့ အကျဉ်းသူ၊ အကျဉ်းသားဦးရေကို အတိအကျမသိရသေးပါဘူး။
လွတ်မြောက်လာသူ တစ်ဦးရဲ့ ပြောပြချက်အရတော့ အမျိုးသမီး အကျဉ်းသူ ၁၀၀ ခန့် လွှတ်ပေးပြီး နိုင်ငံရေးအကျဉ်းသား ၁၅ ဦးဝန်းကျင်ပါဝင်လာတယ်လို့သိရပါတယ်။
ဒါပေမယ့် People’s Spring အနေနဲ့ အင်းစိန်ထောင်ကနေ လွတ်မြောက်လာတဲ့ နိုင်ငံရေးအကျဉ်းသားဦးရေ ကို သီးခြားအတည်မပြုနိုင်သေးပါဘူး။
ဒီနေ့ ကျရောက်တဲ့ (၇၇) နှစ်မြောက် လွတ်လပ်ရေးနေ့မှာ အာဏာသိမ်းစစ်ကောင်စီက အကျဉ်းသူ ၊ အကျဉ်းသား ခြောက်ထောင်နီးပါး ကို လွှတ်ပေးမယ်လို့ ကြေညာထားပါတယ်။
စစ်တပ်အာဏာသိမ်းပြီးနောက် ဆန့်ကျင်မှုတွေနဲ့ဆက်စပ်ပြီး မတရား ဖမ်းဆီးခံခဲ့ရသူ စုစုပေါင်း ၂၈,၀၉၆ ဦးရှိပြီး အဲဒီအထဲက ၂၁,၄၉၉ ဦးဟာ ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူများအနက်မှ ၉, ၉၅၈ ဦးကတော့ ထောင်ဒဏ်တွေ ချမှတ်ခံထားရတယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP) က စာရင်းပြုစုထားပါတယ်။
