အမ်းနှင့်မင်းဘူးကြားရှိ စစ်တပ် တပ်စွဲထား​သော တရုတ်ဓါတ်​ငွေ့ပိုက်လိုင်းစခန်း နှင့် အ​မြောက်တပ်စခန်းကို AA သိမ်းပိုက်

ကဖေး/People’s Spring

ရခိုင်ပြည်နယ်၊ အမ်းမြို့နယ် သို့ စစ်ကောင်စီက လေကြောင်းမှ ပို့ဆောင်ခဲ့သည့် စစ်သားများ တပ်စွဲထားသော တောင်ဇောက်ရွာရှိ တရုတ်သဘာဝဓာတ်ငွေ့ပိုက်လိုင်းစက်ရုံနှင့်အမြောက်တပ်စခန်းကို အာရက္ခတပ်တော် (AA)က တိုက်ခိုက်သိမ်းယူလိုက်သည်။

အမ်းနှင့် မင်းဘူးမြို့ကြားရှိ တောင်ဇောက်ရွာမှ အဆိုပါစခန်းနှစ်ခုကို AA က ဒီဇင်ဘာလ ၂၂ရက်မှစ၍ တိုက်ခိုက်ခဲ့ပြီး ရက်သတ္တပတ် နှစ်ပါတ်ခန့်အကြာ ဇန်နဝါရီ ၅ ရက်တွင် သိမ်းယူခြင်းဟု ရခိုင်စစ်ရေးသတင်းရင်းမြစ်က ပြောသည်။

“စခန်းက အရမ်းမကြီးပေမယ့် AAက သတိထားပြီးတိုက်ခဲ့ရတယ်။ AAကတရုတ်စီမံကိန်းတွေကိုမထိအောင် ထိန်းပြီး စစ်ရေးဖော်ဆောင်တာ။ စစ်တပ်က တရုတ်ပိုက်လိုင်းကို အကာအကွယ်ယူထားတာ။ ဒါကို တရုတ် သိဖို့လိုတယ်” ဟု ရခိုင်စစ်ရေးသတင်းရင်းမြစ်ကပြောသည်။

Public Service Announcement

AAသည် အနောက်ပိုင်းတိုင်းစစ်ဌာနချုပ်(နပခ) ကို ဒီဇင်ဘာလ၂၀ရက်နေ့တွင် တိုက်ခိုက်သိမ်းပိုက်ခဲ့ပြီး အမ်းတစ်မြို့လုံးကိုထိန်းချုပ်လိုက်ကြောင်းကြေညာခဲ့သည်။ စစ်ကောင်စီက မကွေးတိုင်းဘက်မှတပ်ဖွဲ့ဝင်အများအပြားကိုလေကြောင်းမှပို့ဆောင်ခဲ့ပြီး တောင်‌‌ဇောက်ရွာအပါအဝင် တရုတ်ပိုက်လိုင်းတစ်လျှောက် အကာအကွယ်ယူ၍ နပခကို ပြန်လည်တိုက်ခိုက်ရန် စီစဥ်ခဲ့သည်။

ထို့ကြောင့် AAက ဆက်လက်ထိုးစစ်ဆင်တိုက်ခိုက်ခဲ့ပြီး အရေးကြီးသောစခန်းများကို သိမ်းယူခဲ့ခြင်းဖြစ်​ကြောင်း AAနှင့်နီးစပ်သည့် တော်လှန်ရေးတပ်ဖွဲ့တခုမှ ရဲဘော်တဦးကပြောသည်။

သို့​သော်စခန်းသိမ်းတိုက်ပွဲသတင်းကို AAကဇန်နဝါရီ ၆ ရက်အထိ့ မထုတ်ပြန်သေးပေ။ တောင်ဇောက်တောင်ရွာရှိတရုတ်သဘာဝဓာတ်ငွေ့ပိုက်လိုင်းစက်ရုံအတွင်း စက်ရုံဝန်ထမ်းအချို့အပြင် တရုတ်နိုင်ငံသားအချို့ကိုလည်း တွေ့ရှိခဲ့ကြောင်း စစ်ရေးသတင်းရင်းမြစ်ကပြောသည်။ အဆိုပါအချက်အလက်ကို People’s Sping က သီခြားအတည်ပြုနိုင်ခြင်းမရှိသေးပေ။

AA သည် နပခအား တိုက်ခိုက်သိမ်းပိုက်သည့်တိုက်ပွဲ၌ နပခဒုတိယတိုင်းမှူး ဗိုလ်မှူးချုပ်သောင်းထွန်းနှင့် တိုင်းဦးစီးချုပ်ဗိုလ်မှူးချုပ် ကျော်ကျော်သန်းတို့ကို ဖမ်းမိခဲ့သည်။ ထို့အပြင် AAက ၎င်းတို့ထိန်းချုပ်ထား​​သော​ အာရက္ခဒေသအတွင်း ရင်းနှီးမြှပ်နှံမှုများကို ဖိတ်​ခေါ်ပြီး ရင်းနှီးမြှပ်နှံမှု စီမံကိန်းများ ၊ ရင်းနှီးမြှပ်နှံသူများ၏ အသက်အန္တရာယ်ကိုAA ကအထူးဂရုစိုက်ကာကွယ်​စောင့်​ရှောက်သွားမည်ဟု ဒီဇင်ဘာ ၂၉ ရက်ထုတ်ပြန်ချက်တွင်​ဖော်ပြသည်။

နပခနှင့် အမ်းမြို့မှ ထွက်ပြေးနေသည့်စစ်ကောင်စီတပ်ဖွဲ့ဝင်များသည် မကွေးတိုင်းဘက်ရှိ ငဖဲ၊ ပဒါန်း၊ မင်းဘူးမြို့နယ်များသို့ ရောက်ရှိလာပြီး AA၏ မဟာမိတ်တော်လှန်ရေးတပ်ဖွဲ့များနှင့် PDF များက လိုက်လံဖမ်းဆီးနေသည်။

ဇန်နဝါရီလ၄ရက်နှင့်၅ရက်က တောင်ဇောက်ကျေးရွာအပါအဝင် အမ်းမြို့နယ်ဘက်မှ ထွက်ပြေးလာသည့် စစ်ကောင်စီတပ်ဖွဲ့ဝင် ၁၅ဦးကိုလက်နက်ခဲယမ်းများနှင့်အတူထပ်မံဖမ်းမိကြောင်း ချင်းကာကွယ်ရေးတပ်(အရှို)နှင့်လူထုတော်လှန်ရေး မဟာမိတ်အင်အားစု (PRA Magway) က ထုတ်ပြန်ထားသည်။

ယခုအခါ AA က အာရက္ခ​ပြည်နယ်တွင် မြို့နယ် ၁၄ မြို့နယ် ကို သိမ်းပိုက်ထားပြီး စစ်​တွေ ၊​ကျောက်ဖြူ ၊မာန်​အောင် သုံးမြို့နယ်သာ သိမ်းပိုက်ရန် ကျန်ရှိသည်။