ရှိန်း / People’s Spring
မန္တလေးနန်းတွင်းထဲက အလယ်ပိုင်းတိုင်းစစ်ဌာနချုပ်(လပခ) လုံခြုံရေးအတွက် မန္တလေးမြို့လယ်ခေါင်ကို စစ်တပ်အမိန့်နဲ့ အထပ်မြင့်အဆောက်အဦးဆောက်လုပ်ခွင့် ကန့်သတ်ထားတယ်လို့ ဆောက်လုပ်ရေးလုပ်ငန်းတွေဆီကစုံစမ်းသိရပါတယ်။
မန္တလေးနန်းတွင်းရဲ့အရှေ့ဘက် ၆၆လမ်းကနေ ၅၆လမ်းအထိ၊အနောက်ဘက်လမ်း၈၀ကနေ လမ်း၉၀အထိ၊တောင်ဘက် ၂၆လမ်းကနေ ၃၅ လမ်းအထိ၊ မြောက်ဘက် ၁၂ လမ်းကနေ ၅ လမ်းအထိ အထပ်မြင့်တိုက်ဆောက်လုပ်ခွင့်ကန့်သတ်ထားတာပါ။
မန္တလေးမြို့ရဲ့လမ်းတွေဟာ မြောက်ဘက်မြို့အဝင်ကို ၁ လမ်းအဖြစ်သတ်မှတ်ပြီးတောင်ဘက်ကို အစဥ်လိုက်နံပါတ်စဥ်ကြီးသွားတာပါ။
Public Service Announcement
အလားတူ မြို့အရှေ့ဘက်မှာလည်း မြို့ပတ်လမ်း၊၅၁လမ်းကနေ အနောက်(ဧရာဝတီမြစ်ဘက်)ကို ၅၂၊၅၃အလိုက် နံပါတ်စဥ်ကြီးသွားတာပါ။
လက်ရှိအထပ်မြင့်အဆောက်အဦး ဆောက်လုပ်ခွင့်ပိတ်လိုက်တဲ့ လမ်းနံပါတ်တွေကိုကြည့်မယ်ဆိုရင် မြို့ရဲ့အဓိကအချက်အချာကျတဲ့နေရာတွေအားလုံးကို ပိတ်ထားတာဖြစ်ပြီး ကျုံးအရှေ့ဘက်နဲ့အနောက်ဘက်ဆိုရင် မြို့ပတ်လမ်းဘေးတွေသာ အဆောက်အဦးဆောက်လုပ်ခွင့်ရတော့မှာဖြစ်ပါတယ်။
ဒီကိစ္စနဲ့ပတ်သက်ပြီး လူထုနွေဦးက ဒီလုပ်ငန်းစဥ်ကို သိတဲ့ ရင်းမြစ်တဦးဆီ မေးကြည့်တဲ့အခါ
“ဟုတ်တယ်။ဘယ်နေ့အထိပိတ်မယ်မသိဘူး “လို့ပြောပါတယ်။
၂၀၂၄ခုနှစ်အတွင်း မန္တလေးနန်းတွင်း ရှော့တိုက်ဒုံးနဲ့အကြိမ်ကြိမ်ပစ်ခတ်ခံခဲ့ရပြီး နောက်ဆုံးအကြိမ်ကတော့ စက်တင်ဘာလက ပစ်ခတ်ခံခဲ့ရတာပါ။
အဲဒီနောက်ပိုင်း တနေ့ကို ၅ကြိမ်လောက်အထိ နေ့ရော၊ညပါ မန္တလေးကျုံးဘေးပတ်လည်လူနေရပ်ကွက်တွေကို ကင်းထောက်လေယာဥ်နဲ့ စစ်ဆေးတာတွေရှိတယ်လို့မြို့ခံတွေကပြောပါတယ်။
