ကဖေး/People’s Spring
ရခိုင်ပြည်နယ် နှင့် ဧရာဝတီတိုင်းအစပ်တွင် တိုက်ပွဲပြင်းထန်နေပြီး ဖေဖော်ဝါရီ ၃ ရက်နေ့တိုက်ပွဲ၌ စစ်ကောင်စီစခန်းတစ်ခုကို AAနှင့် ပူးပေါင်းတပ်ကထပ်မံ သိမ်းယူလိုက်ပြီး စစ်ကောင်စီဗိုလ်ကြီးတစ်ဦးလည်းသေဆုံးသွားကြောင်း စစ်ရေးသတင်းအရင်းအမြစ်အချို့ကပြောသည်။
ဖေဖော်ဝါရီလ၃ရက်နေ့က သာပေါင်းမြို့နယ် ကျားခေါင်းရွာမှ စစ်ကောင်စီစခန်းကို အာရက္ခတပ်တော်(AA)နှင့် ပူးပေါင်းတပ်များက တိုက်ခိုက်သိမ်းယူလိုက်ပြီး ယင်းတိုက်ပွဲတွင် စစ်ကောင်စီဘက်မှ ထိခိုက်သေဆုံးမှုများပြားခဲ့ကြောင်း မြေပြင်သတင်းရင်းမြစ်တစ်ဦးကပြောသည်။
“ဒဏ်ရာရတွေကိုကားတွေနဲ့သယ်ထုတ်သွားတယ်။ ဗိုလ်ကြီးအဆင့်ရှိသူတစ်ယောက်ပါတယ်။ လူနာတင်ကား ပေါ်မှာပဲသေတယ်လို့သတင်းရတယ်။ သေတာလည်းများတယ်လို့ကြားရတယ်” ဟု ဒေသခံတစ်ဦးကပြောသည်။
Public Service Announcement
ကျားခေါင်းရွာသည် ဇန်နဝါရီလ၁၆ရက်နေ့က AAသိမ်းယူခဲ့သည့် ရွှေသောင်ယံမြို့နယ်၊ ဘောမိကျေးရွာနှင့်ဆက်စပ်တည်ရှိသည်။ဘောမိရွာတိုက်ပွဲပြီးသည့်နောက်ပိုင်း သာပေါင်းမြို့နယ်အတွင်းတိုက်ပွဲဆက်ဖြစ်နေခြင်းဖြစ်သည်။
“ချောင်းဖျားလို့လည်းခေါ်တယ်။ဂွရယ်၊ သာပေါင်းရယ်၊ ရွှေသောင်ယံရယ် ဆုံတဲ့နေရာတွေပေါ့။ အဲဒီကနေငါးသိုင်းချောင်းဘက်ကိုတက်လည်းရတယ်” ဟု ဒေသခံတစ်ဦးကပြောသည်။
ကျားခေါင်းရွာမှ စစ်ကောင်စီတပ်စခန်းကိုအာရက္ခတပ်တော်(AA)နှင့်ပူးပေါင်းတပ်များက ဖေဖော်ဝါရီ ၃ ရက်နေ့က တိုက်ခိုက်သိမ်းယူစဉ်သာပေါင်းမြို့ပေါ်မှစစ်တပ်က လက်နက်ကြီးအချက်ပေါင်းများစွာပစ်ခတ်ခဲ့သည်။ လက်နက်ကြီးသံနှင့် ပစ်ခတ်သံများညနက်ပိုင်းအထိ ဆူညံစွာကြားခဲ့ရသည် သာပေါင်းနှင့် ရွှေ သောင်ယံမြို့ခံများကပြောသည်။မြေပြင်မှစခန်းကျ၍ ရမ်းသမ်းပစ်ခတ်ခြင်းဟု ဒေသခံအချို့ကပြောသည်။
ကျားခေါင်းရွာတွင်ပြီးခဲ့သည့် ဇန်နဝါရီလနှောင်းပိုင်းမှစ၍ တိုက်ပွဲပြင်းထန်ခဲ့ပြီး ဇန်နဝါရီလ၂၈ ရက်နေ့တိုက်ပွဲ၌ သာပေါင်းမြို့မရဲစခန်းမှူးဒုရဲမှူး ဝင်းနိုင်ဦးသည် AA၏ စနိုက်ဘာကျည်ထိမှန်သေဆုံးခဲ့သေးသည်။
ရခိုင်ပြည်နယ်နှင့်ဆက်စပ်နေသော ဧရာဝတီတိုင်း၊မကွေးတိုင်းနှင့် ပဲခူးတိုင်းမှ မြို့နယ်အချို့တွင် တိုက်ပွဲများဖြစ်နေကြောင်း AAက ဇန်နဝါရီ ၂၇ ရက်တွင်တရားဝင်သတင်းထုတ်ပြန်ထားသည်။ဧရာဝတီတိုင်းတွင်ပွိုင့်(၂၆၃) နှင့် ပွိုင့်(၃၆၉)စခန်းတို့ကိုသိမ်းပိုက်ပြီးနောက် ကျားခေါင်းရွာမှစခန်းကိုထပ်မံသိမ်းပိုက်နိုင်ခဲ့ခြင်းဖြစ်သည်။
ထို့အပြင်တောင်ကုတ်မြို့နယ်နှင့်ထိစပ်နေ သော ရခိုင်ရိုးမတောင်တန်း ပေါ်မှ စစ်တောင်စီ၏ မိုးထိတောင်စခန်းကို ဇန်နဝါရီလ ၂၆ရက်တွင်တိုက်ခိုက်သိမ်းယူခဲ့သည်။
