ဧပြီ-၁၈၊၂၀၂၅။ဧရာ/People’s Spring
ဧရာဝတီတိုင်း၊ ဟင်္သာတခရိုင်၊ လေးမျက်နှာမြို့နယ်အတွင်း စစ်ကောင်စီတပ်စွဲထားသည့် ပန်းတောကြီးရွာမှစစ်တပ်စခန်းကို AA နှင့် ပူးပေါင်းတပ်များက တိုက်ခိုက်သိမ်းယူလိုက်ပြီး စစ်ကောင်စီမှ လေကြောင်းမှဗုံးကြဲနေသည်။
ပန်းတောကြီးရွာတွင် ဧပြီ ၁၅ ရက်မှ စ၍ တိုက်ပွဲပြင်းထန်ခဲ့ပြီး ဧပြီလ ၁၇ရက်တွင် စစ်ကောင်စီတပ်ဆုတ်ခွာထွက်ပြေးသွားရာ AAနှင့် ပူး ပေါင်းတပ်များက စစ်စခန်းကိုထိန်းချုပ်လိုက်ခြင်းဟု ဒေသခံတစ်ဦးကပြောသည်။
“တိုက်ပွဲမှာ စစ်ကောင်စီဘက်ကတော်တော်သေတယ်။ ထွက်ပြေးတဲ့သူတွေက မြို့ပေါ်ကိုရောက်လာတယ်။ရွာကိုစစ်တပ်ကဗုံးကြဲလို့ မီးလောင်နေတယ်။ တရွာလုံးထွက်ပြေးနေရပါတယ်” ဟု အဆိုပါဒေသခံကပြောသည်။
Public Service Announcement
ဧရာဝတီတိုင်းအတွင်းရေကြည် ၊ လေးမျက်နှာနှင့် အင်္ဂပူမြို့နယ်ကြား ပုသိမ်-မုံရွာလမ်းကြော၌ ပြီးခဲ့သည့် မတ်လ ၂၇ရက်အထိ အာရက္ခတပ်တော်(AA)၊PDFပူးပေါင်းတပ်များနှင့်စစ်ကောင်စီ တိုက်ပွဲများပြင်းထန်ခဲ့သည်။မတ်လ၂၈ရက်က ငလျင်လှုပ်ပြီးနောက်ပိုင်း အမျိုးသားညီညွတ်ရေးအစိုးရနှင့် မြောက်ပိုင်းမဟာမိတ်သုံးဖွဲ့ကအပစ်ရပ်လိုက်ခြင်းနှင့်အတူ AA၊PDFပူးပေါင်းတပ်က ထိုးစစ်ရပ်လိုက်ရာ တိုက်ပွဲအရှိန်လျော့သွားခဲ့သည်။ သို့သော်စစ်ကောင်စီကအပစ်ရပ်စာချုပ်ကိုဆက်လက်ချိုးဖောက်ပြီး လေကြောင်းတိုက်ခိုက်ခြင်း၊ မြေပြင်မှစစ်ရေးဖော်ဆောင်ခြင်းများ ပြုလုပ်နေကြောင်း AAက ဧပြီလ ၅ရက်၌ သတင်းထုတ်ပြန်ခဲ့သည်။
“AAထိုးစစ်ကို ကျနော်တို့မကြောက်ရဘူး။ ကျနော်တို့ကြောက်တာက စစ်တပ်ရဲ့ မီးရှို့ဖျက်ဆီးတာတွေကိုကြောက်တာ။ AAနဲ့ PDFက စခန်းသိမ်းပြီးပြီဆိုရင် လုံခြုံရေးအရာကန့်သတ်ထားကလွဲလို့ မီးရှို့ဖျက်ဆီးတာတွေမရှိဘူး”ဟုလေးမျက်နှာမြို့မှ လုပ်ငန်းရှင်တစ်ဦးကပြောသည်။
အင်္ဂပူ၊ လေးမျက်နှင့် ရေကြည်မြို့နယ်တို့ကို ဖြတ်သွားသည့်ပုသိမ် – မုံရွာလမ်းမပေါ်တွင်စစ်ကောင်စီတပ်ကကားများအားဖမ်းဆီးခြင်း၊ ပေါ်တာဆွဲခြင်း၊ ငွေတောင်းခြင်း၊ ဖမ်းဆီးထားသောယာဥ်များအားအသုံးပြု၍ ရွှေ့ပြောင်းခြင်းများ ပြုလုပ်နေ၍ ဒေသခံများသတိပြုသွားလာကြရန်ဧရာဝတီ PDF က သတိပေးချက်ထုတ်ပြန်သည်။
စစ်ကောင်စီသည် အရပ်သားပြည်သူများကို ပစ်မှတ်ထား၍တိုက်ခိုက်မှုများဆက်လက်ပြုလုပ်နေပြီး ရေကြည်နှင့်လေးမျက်နှာမြို့နယ်တွင် မတ်လ ၂၄ရက်မှ ၃၁ရက်အတွင်း အရပ်သားခြောက်ဦးသေဆုံးကာ နှစ်ဦးဒဏ်ရာရခဲ့သည်ဟုဧရာဝတီ PDFအမှတ် (၂၉) ဗျူဟာက သတင်းထုတ်ပြန်ထားသည်။
