ကျော်ဇော/People’s Spring
ရေးမြို့နယ်၊ သံဖြူဇရပ်-ရေးလမ်းမကြီးပေါ်ရှိ စစ်ကောင်စီတပ် စစ်ဆေးရေးဂိတ်ကို ပစ်ခတ်တိုက်ခိုက်ခဲ့ကြောင်း မွန်ပြစ်သစ်ပါတီ(စစ်အာဏာရှင်တိုက်ဖျက်ရေး)MNSP-AD မှ ပြောရေး ဆိုခွင့်ရှိသူ နိုင်ကောင်းစကားက လူထုနွေဦးသို့ ပြောသည်။
ဖေဖော်ဝါရီ ၅ ရက် နံနက် ၆နာရီခန့်က ရေးမြို့နယ်၊ သံဖြူဇရပ်-ရေးလမ်းပိုင်း ကွမ်းဒူး နှင့် နှင်းစုံကျေးရွာကြား တံတားအနီးရှိ စစ်ကောင်စီတပ် စစ်ဆေးရေးဂိတ်ကို NMSP (AD)တပ်ဖွဲ့မှ အနီးကပ်ဝင်ရောက်တိုက်ခိုက်ခဲ့ခြင်းဟု ၎င်းက ပြောသည်။
“တံတားနားမှာ တပ်စွဲထားတဲ့ စစ်ကောင်စီတပ်စခန်းပေါ့နော်။ အဲဒီစခန်းကိုမှ စစ်ဆေးရေးဂိတ်အနေနဲ့ တပ်စွဲထားတာရှိတယ်။ အဲဒီစခန်းကို ကျနော်တို့တပ်ဖွဲ့တွေက ဝင်ရောက်တိုက်ခိုက်ခဲ့ခြင်း ဖြစ်တယ်။ တိုက်ပွဲကတော့ ၁နာရီဝန်းကျင် လောက် နှစ်ဘက်ရင်ဆိုင်ဖြစ်ပွားခဲ့တယ်”ဟု တိုက်ခိုက်မှုနှင့်ပတ်သက်ပြီး MNSP(AD)မှ ပြောခွင့်ရသူ နိုင်ကောင်းစကားက လူထုနွေဦးသို့ ပြောသည်။
Public Service Announcement
အဆိုပါ စစ်ကောင်စီအထိုင်စခန်းနှင့် စစ်ဆေးရေးဂိတ်တွင် စစ်ကောင်စီတပ်သား ၄၀ခန့်တပ်စွဲထားပြီး တိုက်ခိုက်မှုအတွင်း မျက်မြင်ငါးဦးသေဆုံး၍ ထိခိုက်ဒဏ်ရာရသူများလည်း အများအပြားရှိကာ တော်လှန်ရေးရဲ ဘော်တစ်ဦး ရှပ်ထိဒဏ်ရာ(မစိုးရိမ်ရ)ရခဲ့ကြောင်း ၎င်းက ဆက်ပြောသည်။
စစ်ကောင်စီတပ်၏ ထိခိုက်သေဆုံးမှုအပေါ် လူထုနွေဦးက သီးခြားအတည်မပြုနိုင်ပေ။
တိုက်ခိုက်ခံရပြီးနောက် စစ်ကောင်စီဘက်မှ ရေးမြို့နယ်၊ အာရုတောင်ကျေးရွာအခြေစိုက် ခမရ(၃၄၃)နှင့် ခမရ (၅၈၇)တပ်ရင်းတို့မှ လက်နက်ကြီးများဖြၚ့် ရမ်းသမ်းပစ်ခတ်မှုများရှိခဲ့ရှိခဲ့သော်လည်း MNSP(AD)မှ ရဲဘော်များ အောင်မြင်စွာဆုတ်ခွာနိုင်ခဲ့ကြောင်း အသိပေးထားသည်။
ပြီးခဲ့သည့် ဇန်နဝါရီ ၂၃ ရက်ကလည်း ရေးမြို့နယ်၊ ခေါဇာမြို့အခြေစိုက် စစ်ကောင်စီ၏ ခလရ-၃၁ တပ်ရင်းအား မွန်ပြည်သစ် ပါတီ (စစ်အာဏာရှင်တိုက်ဖျက်ရေး) MNSP-AD၊ မွန်ပြည်တော်လှန်ရေးတပ် (MSRF)နှင့် ပြည်သူ့ကာကွယ်ရေးတပ်မတော်(PDF)တို့ ပူးပေါင်းတိုက်ခိုက်ခဲ့သေးသည်။
