မကွေးတိုင်း၊ အထက်မင်းလှမြို့နယ်၊ ရှမ်းတပ်ကြီးစခန်းဘက်မှနေ၍ ပုသိမ် – မုံရွာလမ်းအတိုင်း ကျောက်မီးသွေးတင်ကားဖြင့် ပုံဖျက်လာသည့် စစ်ကောင်စီတပ်သားများအား နှစ်ရက်ဆက် တိုက်ခိုက်ခဲ့ကြောင်း အထက်မင်းလှမြို့နယ်ပြည်သူ့ကာကွယ်ရေးအဖွဲ့(ပကဖ)မှ ပြောခွင့်ရသူတစ်ဦးက လူထုနွေဦးသို့ ပြောသည်။
စစ်ကောင်စီ၏ ရှမ်းတပ်ကြီးစခန်းနှင့် တစ်မိုင်ခွဲအကွာ ပုသိမ်-မုံရွာလမ်းအတိုင်း ဖေဖော်ဝါရီ ၁၇ ရက်က ကျောက်မီးသွေးတင်တွဲကားဖြင့် ပုံဖျက်လိုက်လာသည့် စစ်ကောင်စီတပ်သားများအား အထက်မင်းလှ ပကဖ၊ ပြည်သူ့လွတ်လပ်ရေးအဖွဲ့/ပြည်သူ့လွတ်လပ်ရေးတပ်တော်(PIO/PIA ) ပူးပေါင်းတပ်များက ခြုံခိုတိုက်ခိုက်ခဲ့ကြောင်း အသိပေးသည်။
အဆိုပါ တိုက်ခိုက်မှုအတွင်း စစ်ကောင်စီတပ်ကလည်း MA 15 အလတ်စားစက်သေနတ်(ငါးကြင်းမြှီး)၊ RPG၊ ၄၀ မမ ဗုံးပစ်လောင်ချာ၊ Drone များ အသုံးပြု ပြန်လည်ပစ်ခတ်ခဲ့ပြီး ၎င်းတို့ဘက်မှ ငါးဦးထက်မနည်း ထိခိုက်ဒဏ်ရာရပြီး ပြန်ဆုတ်သွားရာ အဆိုပါ ငါးဦးမှာသေဆုံးသွားကြောင်း အတွင်းသတင်းရရှိထားသည် အထက်မင်းလှ ပကဖ ပြောခွင့်ရသူက ပြောသည်။
Public Service Announcement
သို့သော် အဆိုပါအချက်နှင့်ပတ်သက်ပြီး လူထုနွေဦးက သီးခြားအတည်မပြုနိုင်ပေ။
ထို့နောက် ဖေဖော်ဝါရီ ၁၈ ရက်တွင်လည်း ရှမ်းတပ်ကြီးစခန်းဘက်မှ ပုသိမ် – မုံရွာလမ်းအတိုင်း လာသော စစ်ကောင်စီတပ်သားများအား မဟာမိတ်ပူးပေါင်းတပ်များက အနီးကပ်တိုက်ခိုက်ခဲ့ပြီး ရန်သူ့တပ်သားသုံးဦးထက်မနည်း ထိခိုက်ဒဏ်ရာရှိခဲ့ကြောင်း အထက်မင်းလှ ပကဖက အသိပေးသည်။
“၂ ရက် စစ်ကြောင်းက ရှမ်းတပ်ကြီးကလာတဲ့ စစ်ကြောင်းတွေပါ။ သူတို့က မင်းလှနဲ့ ပါဒါန်းဘက်ကနေပြီး ကျောက်မီးသွေးတွင်းသုံးတွဲကားကြီးတွေနဲ့ရော ဘုန်းကြီးကား အိမ်စီးကားတွေနဲ့ပါ အပြောက် အရပ်ဝတ်နဲ့ ရှမ်းတပ်ကြီးစခန်းကို အင်အားစုပြီးမှ တက်လာတာပါ”ဟု စစ်ကောင်စီတပ်လှုပ်ရှားမှုအခြေအနေကို အထက်မင်းလှ ပကဖမှ ပြောခွင့်ရသူက လူထုနွေဦးသို့ ပြောသည်။
အထက်ပါ နှစ်ရက်ဆက်တိုက်ခိုက်မှုတွင် မဟာမိတ်ပူးပေါင်းတပ်ဖွဲ့ဝင်များ ထိခိုက်မှုမရှိအောင်မြင်စွာ တိုက်ခိုက်နိုင်ခဲ့ပြီး စစ်ကောင်စီတပ်သားများသည် ရှမ်းတပ်ကြီးသို့ ဆုတ်ခွာမှုအချို့ရှိသလို ရုပ်အလောင်းနှင့် ဒဏ်ရာရသူများအား အိမ်းစီးကားနှစ်စီးဖြင့်သယ်၍ မင်းလှမြို့ပေါ်သို့ ပြန်လည်ဆုတ် ခွာ သည်များလည်းရှိကြောင်း ပကဖ တာဝန်ရှိသူက ရှင်းပြသည်။
အလားတူ ဖေဖော်ဝါရီ ၁၇ ရက်က တိုက်ခိုက်မှုတွင် ပုံသိမ်-မုံရွာလမ်းပိုင်းသို့ သရက်မြို့၊ ကပစ(၁၂)မှ စစ်ကူပေးရန် လက်နက်ခဲယမ်းသယ်ဆောင်လာသော စစ်ကားသည် မင်းလှမြို့နယ်၊ ထန်းကိုင်းကျေးရွာအနီး မတော်တဆပေါက်ကွဲမှုဖြစ်ကာ လိုက်ပါလာသော စစ်ကောင်စီတပ်သားရှစ်ဦးတွင် နှစ်ဦးသေ၍ ခြောက်ဦး ပြင်းထန်ဒဏ်ရာရရှိခဲ့သည်ဟု မင်းလှ ပကဖက အသိပေးသည်။
စစ်ကောင်စီတပ်သည် ပုသိမ် – မုံရွာလမ်းပိုင်း၌ တွဲကား၊ အိမ်စီးကား၊ ဘုန်းကြီးကားအပါအဝင် ပုံစံမျိုးစုံဖြင့် ပုံဖျက်၍ စစ်ရေးလှုပ်ရှားမှုများခပ်စိပ်စိပ်လုပ်ဆောင်နေ၍ ခရီးသွားမိဘပြည်သူများအနေဖြင့် စစ်ကောင်စီနှင့် ပူးပေါင်းဆောင်ရွက်နေမှုများ၊ ၎င်းတို့တပ် အခြေချရာနေရာများနှင့် နီးကပ်စွာနေထိုင်ခြင်းများ၊ သွားလာနေထိုင်ခြင်းများမပြုလုပ်ကြရန် အထက်မင်းလှ ပကဖက ထုတ်ပြန်ထားသည်။
မင်းလှမြို့နယ်အတွင်း ခရီးသွားလာလှုပ်ရှားမှုများအား မနက် ၆ နာရီမှ ညနေ ၆ နာရီအတွင်း သွားလာလှုပ်ရှားကြရန်နှင့် တော်လှန်ရေးတပ်ဖွဲ့များ၏ လုံခြုံရေးအစီအမံများအား တက်ကြွစွာ ထပ်မံ၍ပူးပေါင်းပါဝင်ဆောင် ရွက်ပေးကြရန် မေတ္တာရပ်ခံ ထုတ်ပြန်ထားသည်။
