မိုးကောင်း ဆားမှော်ရွာတွင် တိုက်ပွဲပြင်းထန်နေ

အိမ်သွင်/People’s Spring

ကချင်ပြည်နယ်၊ မိုးကောင်းမြို့နယ်၊ ‌ဆားမှော်ကျေးရွာတွင် စစ်ကောင်စီ၊ SNA ပူးပေါင်းတပ်နှင့် ကချင်လွတ်လပ်ရေးတပ်မတော်(KIA)၊PDF ပူးပေါင်းတပ်တို့ တိုက်ပွဲပြင်းထန်နေသည်။

ယမန်နေ့(မတ်လ ၁၄ရက်)ကစ၍ တိုက်ပွဲဖြစ်နေပြီး ယ‌နေ့တွင် စစ်ကောင်စီတပ်က လက်နက်ကြီးများ ဆက်တိုက်ပစ်ခတ်နေသည်ဟု ဆိုသည်။

” KIAတပ်မဟာ(၉)၊ တပ်ရင်း (၄၄)က ဦးဆောင်ချနေတာ။တိုက်ပွဲက ပြင်းထန်တယ်။ စစ်တပ်က လက်နက်ကြီး အရမ်းသုံးနေတယ်”ဟု ဒေသခံတစ်ဦးက ပြောသည်။

Public Service Announcement

မိုးကောင်းမြို့ပေါ်တွင် တိုက်ပွဲဖြစ်နိုင်သည်ဟူသော သတင်းများကြောင့် ဒေသခံအချို့မှာ တိမ်းရှောင်ရန် ပြင်ဆင်မှုများပြုလုပ်နေသည်ဟု သတင်းရရှိသည်။

” မိုးကောင်းက ဖြစ်ရင်ပွဲအမြန်ပြတ်နိုင်တယ်။ သူတို့ဘက်က မစသေးလို့တိုက်ပွဲမဖြစ်သေးတာ ဟုတ်တယ်”ဟု မိုးကောင်းမြို့တွင် တာဝန်ကျနေသည့် မီးသတ်တပ်ဖွဲ့တစ်ဦးက ပြောသည်။

ယခုတိုက်ပွဲဖြစ်‌နေသော ဆားမှော်ကျေးရွာအနီးတွင် ပြီးခဲ့သည့် ၂၀၂၄ ဒီဇင်ဘာက တိုက်ပွဲအပြင်းအထန်ဖြစ်ခဲ့ဖူးသည်။ KIA တပ်မဟာ(၉)၊ တပ်ရင်း (၄၄) နယ်မြေအတွင်း စစ်ကောင်စီနှင့် SNA ပူးပေါင်းအင်အား ၃၀၀ခန့်ပါ စစ်ကြောင်းဝင်လာ၍ KIAပူးပေါင်းတပ်က တိုက်ခိုက်ခြင်းဖြစ်သည်။

စစ်ကောင်စီနှင့် SNA ပူးပေါင်းစစ်ကြောင်း အထိအခိုက်များစွာဖြင့် ပြန်လည်ဆုတ်ခွာသွားခဲ့ရသည်။

KIAသည် ကချင်ပြည်နယ်အတွင်း ဗန်းမော်မြို့သိမ်းတိုက်ပွဲကို ဒီဇင်ဘာ ၄ရက်ကစတင်၍ တိုက်ခိုက်နေပြီး ယနေ့အထိ တိုက်ပွဲများဆက်လက်ပြင်းထန်နေသည်။