ကျော်ဇော/People’s Spring
တနင်္သာရီတိုင်း၊ လောင်းလုံးမြို့နယ်ရှိ စစ်ကောင်စီ၏ လက်ခတ်တောင် တာဝါတိုင်စခန်းကုန်းကိုတော်လှန်ရေးတပ်များက စီးနင်းတိုက်ခိုက်ခဲ့ရာ သေနတ်တစ်လက်နှင့် ကျည်ဘောက်ကိုးခု ရရှိခဲ့ကြောင်း ဒူရကစစ်ကြောင်းမှ ပြောခွင့်ရသူတစ်ဦးက ပြောသည်။
မတ်လ ၁၃ ရက်နေ့ နံနက် ၇ နာရီခန့်က စစ်တပ်အထိုင်ချတပ်စွဲထားသော လက်ခတ်တောင်စခန်းကုန်းအားသွားရောက်တိုက်ခိုက်ခဲ့ရာ အပြန်အလှန်ပစ်ခတ်မှု ၆ နာရီခန့်ဖြစ်ပွားခဲ့ကြောင်း၎င်းက ပြောသည်။
အဆိုပါ စီးနင်းတိုက်ခိုက်မှုတွင် စစ်ကောင်စီဘက်မှ ၁၂ ဦးသေဆုံးခဲ့ပြီး MA3 သေနတ်တစ်လက်၊ ကျည်ဘောက်ကိုးခု၊ လက်ပစ်ဗုံးသုံးလုံးနှင့် အခြားစစ်သုံးပစ္စည်းအချို့ သိမ်း ဆည်းရရှိခဲ့သည်ဟု ဒူရကစစ်ကြောင်းက အသိပေးသည်။
Public Service Announcement
“စခန်းက ရခါနီး တာဝါတိုင်ကုန်းလေးတခုပဲကျန်တော့တာပါ။ လေယာဥ်နဲ့ နှစ်ကြိမ်ကြဲတော့ ဝင်လုံးလို့ဘယ်လိုမှအဆင်မပြေလို့ အခြေအနေကြည့်ပြီး ပြန်ဆုတ်လိုက်ရတာပါ”ဟု ဒူရကစစ်ကြောင်းပြောခွင့်ရသူတစ်ဦးက လူထုနွေဦးသို့ ပြောသည်။
စစ်ကောင်စီစခန်းကုန်း စီးနင်းတိုက်ခိုက်မှုမှာ အနီးကပ်ရင်ဆိုင်တိုက်ပွဲတစ်ခုဖြစ်ပြီး တာဝါတိုင်ကုန်းတစ်ခုသာ ရရှိရန်ကျန်ရှိနေစဥ် စစ်ကောင်စီက လေယာဥ်ဖြင့် ဗုံးနှစ်ကြိမ်ကြဲချခဲ့ ၍ ဆုတ်ခွာလာရခြင်းဖြစ်ကြာင်း ၎င်းက ရှင်းပြသည်။
လက်ခတ်တောင်တာဝါတိုင်စခန်းကုန်းအား စီးနင်းနေစဥ် စစ်ကောင်စီကြဲချသည့် ဗုံးသီးများမှာ လက်ခတ်တောင်ပေါ်ရှိ စေတီများနှင့် ဘုန်းတော်ကြီးကျောင်းဝင်းအ တွင်းကျရောက်ပြီး အဆောက်အအုံများထိခိုက်ပျက်စီးခဲ့သည်။ ထို့အပြင်အပြင် ယာဥ်တစ်စီးလည်းပျက်စီးသွားကြောင်း ဒူရကစစ်ကြောင်းထံမှ သိရသည်။
လက်ခတ်တောင် တာဝါတိုင်စခန်းကုန်းအား တိုက်ခိုက်မှုကို ဒူရကစစ်ကြောင်း၊ ရေဖြူပြည်သူ့ကာကွယ်ရေးတပ်ဖွဲ့၊ ထားဝယ်ခရိုင်အမှတ်(၂)တပ်ရင်း(TS)တို့ ပူးပေါင်းတိုက်ခိုက်ခဲ့ခြင်းဖြစ်သည်။
မတ်လ ၈ ရက်နေ့ကလည်း လောင်းလုံးမြို့ပေါ်ရှိ စစ်ကောင်စီ၏ မြို့နယ်ရဲစခန်း၊ ထွေအုပ်ရုံးနှင့် စစ်ဘက်ရေးရာလုံခြုံရေးတပ်ဖွဲ့ (စရဖ)ရုံးစသည့်သုံးနေရာကို ထားဝယ်ခရိုင်တပ်ပေါင်းစုမှ တပြိုင်နက်တိုက်ခိုက်ခဲ့ရာ စစ်ကောင်စီတပ်သား ၁၀ ဦးခန့်သေဆုံးကြောင်း တပ်ပေါင်းစုက ထုတ်ပြန်ထားသည်။
