ကန်ပက်လက်မြို့ စစ်ကောင်စီ လေကြောင်း တိုက်ခိုက်မှု ပြည်သူအချို့ထိခိုက်၊ နေအိမ်နှင့်ရုံး၂၀ ပျက်စီး

ဧပြီ ၃၊၂၀၂၅။ဟန်နွေ/People’s Spring

ချင်းပြည်နယ်၊ ကန်ပက်လက်မြို့နယ်အား စစ်ကောင်စီက ယမန်နေ့တွင် လေကြောင်းမှ ဗုံးကြဲတိုက်ခိုက်ခဲ့ရာ ပြည်သူအချို့ထိခိုက်မှုရှိခဲ့ပြီး နေအိမ်နှင့် ရုံးအဆောက်အဦး ပျက်စီးမှုများ ရှိခဲ့ကြောင်း ကန်ပက်လက်မြို့နယ်ပြည်သူ့အုပ်ချုပ်ရေးအဖွဲ့က အသိပေးသည်။

စစ်ကောင်စီသည် ဧပြီ ၂ရက် နေ့လည် ၁နာရီ ၁၅ မိနစ်ခန့်တွင် တိုက်လောယဉ်ဖြင့် အကြိမ်ကြိမ် ဗုံးကြဲခဲ့ရာ ပြည်သူ့ နေအိမ်များ၊ အစိုးရ အဆောက်အဦးများ ထိခိုက်ပျက်စီးခဲ့သည်ဟုဆိုသည်။

ပြည်သူများ​၏ နေအိမ် ၅လုံး ၊ ထွေအုပ်ရုံး၊ ကျေးလက်ဦးစီးမှူးရုံး၊ ရွေးကောက်ပွဲကော်မရှင်ရုံး၊ မြို့နယ် စသုံးလုံးရုံး၊ မြို့နယ်စီမံကိန်းရုံးများ စုစုပေါင်း အဆောက်အဦး အလုံး ၂၀ ပျက်စီးခဲ့သည်ဟု ဆိုသည်။

Public Service Announcement

ထို့ကြောင့် ကန်ပက်လက်မြို့နယ်နှင့် မြို့ပေါ် ရပ်ကွက်နေ ပြည်သူများအနေဖြင့် လေကြောင်းရန် အထူးပြုဂရုပြုနေထိုင်ကြရန် မြို့နယ် ပအဖက ကြေညာထားသည်။

စစ်ကောင်စီသည် ယခုရက်ပိုင်းအတွင်း ချင်းပြည်နယ် ကန်ပက်လက်နှင့် မင်းတပ်မြို့များကို တိုက်ပွဲမရှိဘဲ လေကြောင်း တိုက်ခိုက်ခဲ့ခြင်းဖြစ်သည်ဟု ဒေသ သတင်းရင်းမြစ်က ပြောသည်။

လေကြောင်းတိုက်ခိုက်မှုကြောင့် မင်းတပ်မြို့နယ်တွင်လည်း အဆောက်အဦး ထိခိုက်ပျက်စီးမှုများ ရှိခဲ့ကြောင်း မင်းတပ် ပအဖ တာဝန်ရှိသူ ဆလိုင်းယောမာန်က အသိပေးထားသည်။

စစ်ကောင်စီသည် ငလျင်ဘေး ကြုံနေရချိန်၌ပင် တိုက်ပွဲဖြစ်ပွားရာဒေသ၊ တိုက်ပွဲဖြစ်ပွားမှုမရှိသည့် နယ်မြေဒေသများကို လေကြောင်း ဗုံးကြဲတိုက်ခိုက်မှုများ ဆက်တိုက်ပြုလုပ်ခဲ့ပြီး ယမန်နေ့ညပိုင်းတွင် ဧပြီ ၂ရက်မှ ၂၂ရက်အထိ ယာယီ အပစ်ရပ်စဲကြောင်း ကြေညာခဲ့သည်။

စစ်ကောင်စီအနေဖြင့် ၎င်းတို့ ကြေညာချက်ပါအတိုင်း ပြည်သူလူထုအသက်အိုးအိမ်စည်းစိမ်ကို ထိခိုက်ပျက်စီးစေခြင်းအပါအဝင် စစ်ရေးလှုပ်ရှားမှုဆိုင်ရာများကို လိုက်နာရန် လိုအပ်ကြောင်း ကချင်လွတ်လပ်ရေးတပ်မတော် (KIA)က တန်ပြန်ထုတ်ပြန်သည့် အပစ်ရပ်ကြေညာချက်တွင် ထပ်မံ သတိပေးထားသည်။