ဧပြီ ၆၊၂၀၂၅။ခွာညို/People’s Spring
စစ်ကိုင်းတိုင်း၊ ကလေးမြို့နယ်အတွင်း တော်လှန်ရေးတပ်ဖွဲ့များက မြေပြင်စစ်ရေးလှုပ်ရှားမှုမရှိဘဲ စစ်ကောင်စီက မစ်ဇိုင်းများဖြင့် ပစ်ခတ်နေကြောင်း သတင်းရရှိသည်။
ယနေ့ (ဧပြီ ၆ရက်)ည ၇နာရီခန့်မှစ၍ စစ်ကောင်စီက ကလေးမြို့အမြောက်တပ်အတွင်းမှ မစ်ဇိုင်းများဖြင့် ရမ်းသမ်းပစ်ခတ်နေ၍ ဒေသခံများက စိုးရိမ်နေသည်။
“အပစ်ရပ်တယ်ဆိုလို့ နားအေးပါးအေးနေရမယ်လို့မထင်နဲ့။ တစ်နေ့ခင်းလုံး Y12 လေယာဉ်ရော ဂျက်ဖိုက်တာပါပျံနေတာ။ ညကျတော့ မစ်ဇိုင်းနဲ့ ထုနေတာ”ဟု ကလေးမြို့ခံတစ်ဦးက ပြောသည်။
Public Service Announcement
ဧပြီ ၂ရက်မှ ၂၂ရက်အထိ ယာယီအပစ်ရပ်ကြောင်း ကြေညာထားသည့်စစ်ကောင်စီသည် ဒေသအများစုတွင် လေကြောင်းတိုက်ခိုက်ခြင်း၊ လက်နက်ကြီးများဖြင့် ပစ်ခတ်ခြင်းများ ဆက်တိုက်ပြုလုပ်နေသည်။
စစ်ကောင်စီသည် ၎င်းတို့ တဖက်သတ်ကြေညာထားသည့် အပစ်ရပ်ကြေညာချက်ကို လိုက်နာမှုမရှိဘဲ တိုက်ခိုက်မှုများပြုလုပ်နေသည်ဟု အာရက္ခတပ်တော်(AA)က ထုတ်ပြန်ထားသလို KIA၊TNLA၊KNU တို့ကလည်း ယင်းကဲ့သို့ ပြောကြားထားသည်။
ကလေးမြို့နယ်အတွင်း ယနေ့ညပိုင်း၌ လက်နက်ကြီးပစ်ခတ်မှုကြောင့် လူထိခိုက်မှုရှိ၊မရှိကို မသိရသေးပေ။ ကလေးမြို့နယ်ပြည်သူ့ကာကွယ်ရေးတပ်ဖွဲ့နှင့် နီးစပ်သူတစ်ဦးက တော်လှန်ရေးတပ်ဖွဲ့များအနေဖြင့် ယခုရက်ပိုင်း စစ်ရေးလှုပ်ရှားမှုလုံးဝမရှိကြောင်း ပြောသည်။
