မေ ၄၊၂၀၂၅။မိုးမိုး/People’s Spring
မကွေးတိုင်း၊ မင်းဘူးခရိုင်၊ စလင်းမြို့နယ်တွင် စစ်ကောင်စီတပ်နှင့် တိုက်ပွဲများ နေ့စဉ်နီးပါး ဖြစ်ပွားနေပြီး စစ်ကောင်စီက လေကြောင်းမှ ဗုံးကြဲတိုက်ခိုက်နေသည်ဟု မင်းဘူးခရိုင် အမှတ်(၅)တပ်ရင်း သတင်းပြန်ကြားရေး တာဝန်ရှိသူက ပြောသည်။
ယမန်နေ့ (မေလ ၃ရက်) ညပိုင်းက စလင်းမြို့နယ်အတွင်း စစ်ကောင်စီ လေကြောင်းတိုက်ခိုက်ခဲ့မှု အခြေအနေနှင့်ပတ်သက်၍ မေးမြန်းရာ ဒေသစစ်ရေး အခြေအနေကို ပြောပြခြင်းဖြစ်သည်။
မေလ ၃ရက် ည ၈နာရီခန့်က စလင်းမြို့နယ် ကုက္ကိုလ်တန်းရွာနှင့် နေပူကန်ကျေးရွာအနီးကို Y12 ဖြင့် ၆ကြိမ် ဗုံးကြဲတိုက်ခိုက်ခဲ့ရာ ဗုံး ၄၉ လုံးကြဲချခဲ့သည်ဟု PDF မင်းဘူးခရိုင် တပ်ရင်း(၅) တာဝန်ရှိသူက ပြောသည်။
Public Service Announcement
“ပြည်သူရော၊ PDF ရော အထိအခိုက်မရှိပါဘူး။သူတို့ စစ်ကြောင်းပိတ်မိနေလို့ ကြဲတာ ဖြစ်နိုင်ပါတယ်။ အင်အား ၁၅၀ခန့်ပါတဲ့ စစ်ကြောင်းက ထိတွေ့တိုက်ပွဲကတော့ နေ့တိုင်းနီးပါး ရှိနေပါတယ်”ဟု ၎င်းက ပြောသည်။
လက်ရှိတွင် ဒေသတွင်း စစ်ရေးအခြေအနေများ ရှိနေသေး၍ အသေးစိတ် ပြောကြား၍ မရသေးဟုလည်း တပ်ရင်း(၅) တာဝန်ရှိသူက ပြောသည်။
စလင်းမြို့နယ်အတွင်း ထိုးစစ်ဆင်လာသည့် စစ်ကောင်စီတပ်ကို စလင်းအခြေစိုက် တပ်ရင်း(၁)၊ တပ်ရင်း(၅)၊ ဒေါင်းစစ်အောင် Local PDF နှင့် အခြားအဖွဲ့များ စုပေါင်း ခုခံတိုက်ခိုက်နေကြောင်း ပြောသည်။
