စစ်ကောင်စီတပ် ၃၀ ထက်မနည်းသေဆုံး၊၁၃ဦး ဖမ်းမိ၊ လက်နက်မျိုးစုံ ၈၀ကျော် သိမ်းရ
မေ ၁၁၊၂၀၂၅။ကဖေး/People’s Spring
တောင်ပိုင်းတိုင်းစစ်ဌာနချုပ်(တပခ)လက်အောက်ခံ ခမရ(၅၉၈)တပ်ရင်းဌာနချုပ်အား ကရင်အမျိုးသားအစည်းအရုံး၊ တပ်မဟာ(၃)၏ ပူးပေါင်းမှုဖြင့် PDF တောင်ပိုင်း အမှတ်(၁)စစ်ဆင်ရေးနယ်မြေနှင့် အမှတ်(၂)စစ်ဆင်ရေးနယ်မြေတို့၏ အစီအစဉ်ဖြင့် တိုက်ခိုက်သိမ်းပိုက်ခဲ့ကြောင်း အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာနက သတင်းထုတ်ပြန်သည်။
အဆိုပါ စခန်းသိမ်းတိုက်ပွဲအတွင်း စစ်ကောင်စီတပ်မှ ၃၀ဦးထက်မနည်းသေဆုံးပြီ ၁၃ဦး ဖမ်းမိထားကာ လက်နက်ကြီးများအပါအဝင် လက်နက်မျိုးစုံ (၈၃)လက် သိမ်းဆည်းနိုင်ခဲ့ကြောင်း NUG၏ ကာကွယ်ရေးဝန်ကြီးဌာနက ထုတ်ပြန်သည်။
Public Service Announcement
ပဲခူးတိုင်း၊ ရွှေကျင်မြို့နယ်၊ ညောင်ခြေထောက်ကျေးရွာရှိ စစ်ကောင်စီ၏ ခမရ(၅၉၈)တပ်ရင်းဌာနချုပ်ကို ပြည်သူ့ကာကွယ်ရေးတပ်မတော်(PDF)၊ တောင်ပိုင်း အမှတ်(၁)စစ်ဆင်ရေးနယ်မြေ နှင့် အမှတ်(၂)စစ်ဆင်ရေးနယ်မြေတို့၏အစီအစဉ်၊ ကရင်အမျိုးသားအစည်းအရုံး၊ တပ်မဟာ(၃)၏ ပူးပေါင်းပါဝင်မှုဖြင့် မေလ ၈ရက်က တိုက်ခိုက်သိမ်းပိုက်ခဲ့ခြင်းဟု ဆိုသည်။
အဆိုပါတိုက်ပွဲတွင် စစ်ကောင်စီတပ်ဖွဲ့ဝင် ရုပ်အလောင်း ၃၀ဦးတွေ့ရှိရပြီး စစ်သုံ့ပန်း ၆ဦးနှင့် မိသားစုဝင် ၇ဦး ဖမ်းဆီးထိန်းသိမ်းခဲ့ကာ တပ်ရင်းမှုးအပါအဝင် အရာရှိများနှင့် တပ်သား ၅၀ခန့်မှာ စခန်းစွန့်ခွာထွက်ပြေးသွားကြောင်း ထုတ်ပြန်ထားသည်။
ထို့အပြင် ပွိုင့် 5 စက်သေနတ်၊ ၇၅ နောက်ပွင့်၊ ၈၁မမ၊ ၆၀မမ လက်နက်ကြီးများအပါအဝင် လက်နက်မျိုးစုံ ၈၃လက် ၊ဂျန်မာစက် (၃)လုံးနှင့် ခဲယမ်းများ သိမ်းဆည်းရမိခဲ့ကြောင်း အသိပေးထားသည်။
စစ်ဆင်ရေးအတွင်း ပြည်သူ့ကာကွယ်ရေးတပ်မတော်၊တောင်ပိုင်း အထူးစစ်ဆင်ရေးတပ်ဖွဲ့ – SOF(အထူးလှုပ်ရှားဗျူဟာ)၊ အမှတ် (၁) စစ်ဆင်ရေးနယ်မြေ၊ ဗျူဟာ (၂၇)မှ နဂါးဖြူတပ်ရင်း၊ တောင်ညိုတပ်ရင်း၊ ၇၈၀၅ တပ်ရင်း၊ ၇၈၀၁ တပ်ရင်း၊ ဒေါနတပ်ရင်း၊ Southern Eagle တပ်ရင်း၊ SOG တပ်ရင်း၊ ရန်ကုန်တိုင်းအထူးချေမှုန်းရေးတပ်ဖွဲ့ ၊ ရောင်နီဒရုန်းအထူးတပ်ဖွဲ့၊ Cloudwings ဒရုန်းအထူးတပ်ဖွဲ့၊ ရန်ကုန်တိုင်းပကဖ တိုက်ခိုက်ရေးအဖွဲ့များ၊ မွန်ပကဖ တိုက်ခိုက်ရေးအဖွဲ့များ ၊ အမှတ် (၂) စစ်ဆင်ရေးနယ်မြေ ဗျူဟာ(၂၀)မှ ၃၇၀၄ တပ်ရင်း၊ ၅၁၀၁ တပ်ရင်း၊ ရန်ကုန်ဗျူဟာစစ်ကြောင်း၊ ပဲခူးတိုင်းပကဖ တိုက်ခိုက်ရေးအဖွဲ့များ၊ LDF တပ်ဖွဲ့များဖြစ်သော KRF၊ UDF ရော့ကက်နှင့်ဒရုန်းတပ်ဖွဲ့များ ပူးပေါင်းပါဝင်ခဲ့ကြပြီးကရင်အမျိုးသားအစည်းအရုံး(KNU)တပ်မဟာ(၃)မှ တပ်ရင်း(၇)နှင့် ဒရုန်းအဖွဲ့များ လက်တွဲတိုက်ပွဲဝင်ခဲ့ကြကြောင်း ထုတ်ပြန်ထားသည်။
ရွှေကျင်မြို့နယ်တွင် ခမရ(၅၉၈)တပ်ရင်းအပြင် နောက်ထပ် စစ်တပ်ရင်းနှစ်ခုနှင့် ရဲစခန်း၊ ဌာနဆိုင်ရာရုံးများကျန်ရှိနေသေးသည်။
စစ်ကောင်စီက ယနေ့(မေလ ၁၁ရက်)နံနက်အထိ လေကြောင်းတိုက်ခိုက်မှုများပြုလုပ်နေကြောင်း သတင်းရရှိသည်။ ခမရ(၅၉၈)တပ်ရင်း စခန်းသိမ်းတိုက်ပွဲအတွင်း ပူးပေါင်းတပ်ဖက်တွင်လည်း ထိခိုက်ကျဆုံးမှုအချို့ ရှိခဲ့သည်။
KNU၊PDFနှင့် ပူးပေါင်းတပ်များသည် ပဲခူးတိုင်း၊တနင်္သာရီတိုင်းနှင့် ကရင်ပြည်နယ်မှ စစ်ကောင်စီစခန်းများကို ဆက်လက်တိုက်ခိုက်နေသည်။
